ސިނގިރެޓް ވައްކަން: "ފުޓޭޖްތައް 3 މަސް ވަންދެން ހުންނާނެ، މިއީ އާދައިގެ ބަޔަކަށް ވާނެ ކަމެއް ނޫން."
ދައުލަތުގެ ބެލުމުގެ ދަށުގައި ހުރި ސިނގިރެޓް ކޮންޓެއިނަރު ދެ ކޮންޓެއިނަރު ހުޅުމާލެ ޕޯޓަލުން ވަގަށް ވަނީ ނަގާފައި
އެމްޕީއެލްގެ ކުރީގެ ބޯޑު މެމްބަރު އިބްރާހިމް އަބްދުﷲ ރާއްޖެޓީވީގެ ޓީވީ ޓޯކް ޕްރޮގްރާމްގައި ވާހަކަދައްކަވަނީ
ވަގަށް ނެގި 13 މިލިއަން ސިނގިރެޓް ކޮންޓެއިނަރތައް ވަގަށް ނަގާފައި ވާ ސަރަހައްދުގެ ސަލާމަތީ ކަންކަމަށް ބަލާއިރު މިއީ އާދައިގެ ބަޔަކަށް އެކަނި ކުރެވޭނެ ވައްކަމެއް ނޫން ކަމަށް އެމްޕީއެލްގެ ކުރީގެ ބޯޑު މެމްބަރު އިބްރާހިމް އަބްދުﷲ ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެޓީވީގެ ޓީވީ ޓޯކް ޕްރޮގްރާމްގައި ވާހަކަދައްކަވަމުންނެވެ.
ރާއްޖެ އަށް ގަވައިދާއި ޚިލާފަށް އެތެރެކުރަން އުޅުނު ސިނގިރެޓް ކޮންޓެއިނަރތަކެއް ވަގަށް ނެގީ ދައުލަތުގެ ބެލުމުގެ ދަށުގަ ހުއްޓާ އެވެ. ދެ ކޮންޓެއިނަރގެ ސިނގިރެޓް ވަގަށް ނެގީ އެމްޕީއެލްގެ ބެލުމުގެ ދަށުން ހުޅުމާލެ ޕޯޓަލްގައި ބަހައްޓާފައި ހުއްޓާއެވެ.
މި ކޮންޓެއިނަރތައް ގެއްލުނު ތަނަކީ ބައިނަލްއަޤުވާމީ މިންގަނޑުތަކާއި އެއްގޮތަށް ފުރިހަމަކުރަން ޖެހޭ ވަރަށް ގިނަ ކަންކަން ފުރިހަމަކޮށްފައި ހުރި ތަންތަން ކަމަށާއި އެތަނުން އެއްޗެއް ގެއްލުމަކީ ނުވަތަ ވަގަށް ނެގުމަކީ އިއްތިފާގެއް ނޫން ކަމަށް އޭނާ ވަނީ ވިދާޅުވެފައެވެ. މިއީ ބަޔަކު ރާވައިގެން ހިންގާފައިވާ ބޮޑު ޖަރީމާ އެއް ކަމަށް އޭނާ ސިފަކުރެއްވިއެވެ. އެތަނުގެ ވީޑިއޯ ކަސްޓަމްސް އަށް ވެސް ފެންނަން ހުންނާނެ ކަމަށާއި އެތަނުގެ ފުޓޭޖްތައް ގެއްލުވާލުމަކީ އެއީ އާދައިގެ ސްޓާފުންތަކަކަށް ކުރެވޭނެ ކަމެއް ނޫން ކަމަށް އޭނާ ވަނީ ވިދާޅުވެފައެވެ.
އިބްރާހިމް އަބްދުﷲ ވިދާޅުވީ މިފަދަ މުދާތައް ބަހައްޓަން ޖެހޭ އުސޫލުތައް ބަޔާންކޮށް، ކޮންމެ ކަމަކަށް ވަރަށް ސާފު އެސްއޯޕީތަކެއް އެކުލަވާލާފައިވާ ކަމަށެވެ. އަދި ތަނުގެ އަލިކަން ހުންނަން ޖެހޭ މިންވަރާއި، ތަނުގެ ކެމެރާތައް ހުންނަ މިންވަރަށް ވެސް ވަކި އުސޫލުތަކެއް ކަނޑައެޅިފައިވާތީ މިފަދަ ވައްކަމެއް ކުރެވޭނީ ވަރަށް ފުޅާކޮށް އެކަން ރާވާ ވިލަރެސްކޮށްގެން ކަން އޭނާގެ ވާހަކައިގައި ވަނީ ފާހަގަކުރައްވާފައެވެ.
"އެމްޕީއެލް އިން މިދިޔަ ވެރިކަމުގައި ހުޅުމާލެ ފަޅި ދޯދިޔާ ވީމަ، އެކަން ހަރުދަނާ ކުރީ. އެތާ ހުންނަ ކެމެރާތައް އެއީ ކުޅޭ ކުޅޭ އެއްޗިއްސެއް ނޫން. އެ ނިވައެއް ނުލެވޭނެ. ސަރވަރގެ އެކްސެސް ވެސް ހުންނާނީ ވަރަށް މަދު ބަޔަކަށް." އޭނާ ވިދާޅުވިއެވެ.
އެ ތަނުގެ ކެމެރާ ސިސްޓަމް އަކީ ބެކަޕް ވެސް ހުރި ކެމެރާ ސިސްޓަމްތައް ކަަމަށާއި 3 މަސް ދުވަހުގެ ރެކޯޑިން އާއި ފުޓޭޖް ހުންނަ ގޮތަށް ތަނުގެ ވީޑިއޯ ރެކޯޑް ސިސްޓަމްގެ އިންތިޒާމްތައް ނިމިދިޔަ ސަރުކާރުން ހަމަޖައްސާފައިވާނެ ކަމަށް އޭނާ ވިދާޅުވިއެވެ.
