މަރުވެފައިވާ އެންމެންގެ ހަށިގަނޑު ހަވާލު ކޮށްފައިވާ ކަމަށް ހަމާސް އިން ބުނެފި

އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ހުއްޓާލުމަށް ވެފައިވާ އެއްބަސްވުމުގެ ދަށުން، ހަމާސް ޖަމާއަތުގެ ބެލުމުގެ ދަށުގައި ތިބި ރަހީނުންގެ ތެރެއިން މަރުވެފައިވާ އެންމެންގެ ހަށިގަނޑުތައް ހަވާލު ކޮށްފައިވާ ކަމަށް އެ ޖަމާއަތުން ބުނެފި އެވެ.

ބުދަ ދުވަހު ހަމާސް ޖަމާއަތުން ބުނެފައި ވަނީ، އެ ޖަމާއަތުގެ ބާރުގެ ދަށުގައި ތިބި މަރުވެފައިވާ ރަހީނުންގެ ތެރެއިން، ލިބެން ހުރި ހުރިހާ މީހުންގެ ހަށިގަނޑުތައް އިސްރާއީލްއާ ހަވާލު ކޮށްފައިވާ ކަމަށެވެ. އިސްރާއީލްގެ އަސްކަރިއްޔާ އިން ނެރެފައިވާ ބަޔާނެއްގައި ބުނެފައި ވަނީ، އިތުރު ދެ މީހުންގެ ހަށިގަނޑު ރެޑް ކްރޮސްއާ ހަވާލު ކޮށްފައިވާ ކަމަށެވެ.

އެމެރިކާގެ ރައީސް ޑޮނަލްޑް ޓްރަމްޕްގެ މެދުވެރިކަމާ އެކު ވެވުނު ހަނގުރާމަ ހުއްޓާލުމުގެ އެއްބަސްވުމުގެ ދަށުން، ހޯމަ ދުވަހުން ފެށިގެން ހަމާސް އިން ވަނީ ރަހީނުން މިނިވަން ކުރަން ފަށައިފަ އެވެ. އެގޮތުން އެންމެ ފުރަތަމަ ވަނީ ދިރި ތިބި 20 ރަހީނުން މިނިވަންކޮށް، އިސްރާއީލްއާ ހަވާލު ކޮށްފަ އެވެ. އޭގެ ބަދަލުގައި އިސްރާއީލް އިން ވަނީ، އެ ޤައުމުގެ ހައްޔަރުގައި ތިބި ފަލަސްޠީނުގެ 2000 އާ ގާތް ކުރާ އަދަދަކަށް ރައްޔިތުން މިނިވަން ކޮށްފަ އެވެ.

ބުދަ ދުވަހުގެ ލަސް ގަޑިއެއްގައި ހަމާސް އިން ދެ ހަޑިގަނޑު ހަވާލު ކުރުމުގެ ކުރިން، ހަމާސް އިން ވަނީ މަރުވެފައިވާކަން އެނގޭ 28 ރަހީނުންގެ ތެރެއިން ހަތް މީހެއްގެ ހަށިގަނޑު އިސްރާއީލްއާ ހަވާލު ކޮށްފަ އވެެ. އަދި އިތުރު އެއް ހަށިގަނޑު ވެސް ވަނީ ހަވާލު ކޮށްފަ އެވެ. ނަމަވެސް އިސްރާއީލް އިން ބުނެފައި ވަނީ، އޭގެ ތެރެއިން އެކަކީ ރަހީނުންގެ ތެރެއިން މީހެއްގެ ހަށިގަނޑު ނޫން ކަމަށެވެ.

ހަމާސްގެ ހަތިޔާރުވެރި ބައި ކަމަށްވާ އަލް ޤައްސާމް ބްރިގޭޑްސް އިން ބުނެފައި ވަނީ، އެ ޖަމާއަތަށް ލިބެން ހުރި ހުރިހާ ހަށިގަނޑެއް ހަވާލުކޮށް ނިމިފައިވާ ކަމަށެވެ. އަދި އިތުރު ހަށިގަނޑުތައް ހޯދުމަށް ވަގުތާއި، ވަސީލަތްތައް ބޭނުންވާނެ ކަމަށް ވަނީ ބުނެފަ އެވެ.

ދިރި ތިބި ރަހީނުން މިނިވަން ކޮށްފައިވާއިރު، ހަމާސްގެ ބެލުމުގެ ދަށުގައި ތިބި މަރުވެފައިވާ މީހުންގެ ހަށިގަނޑުތައް ހަވާލު ކުރުމަށް ވެސް އެ ޤައުމުގެ ރައްޔިތުން އަންނަނީ ގޮވާލަމުންނެވެ. އެކަމާ ގުޅިގެން އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ އަށް އަދި ވެސް ދަނީ ޕްރެޝަރު ބޮޑު ވަމުންނެވެ.

އިސްރާއީލްގެ ހަރުކަށި ސިޔާސަތުގެ ސެކިއުރިޓީ މިނިސްޓަރު އިޓަމާ ބެން ގްވީރް ވަނީ ހަމާސް އިން ހުރިހާ ހަށިގަނޑުތައް ހަވާލު ނުކޮށްފި ނަަމަ، ޣައްޒާ އަށް ފޯރުކޮށްދޭ އެހީ ހުއްޓާލާނެ ކަމަށް ބުނެ އިންޒާރު ވެސް ދީފަ އެވެ.