ރަފަހް ހުޅުވާލަން އިސްރާއީލް އިން ނިންމައިފި

ޣައްޒާ ގައި ހިންގަމުން އައި ހަނގުރާމަ ހުއްޓާލަން އެއްބަސްވުމާ އެކު، ޣައްޒާގެ ރަފަހް ހުޅުވާލަން އިސްރާއީލް އިން ނިންމައިފި އެވެ.

އިސްރާއީލް ސަރުކާރުގެ ބްރޯޑްކާސްޓަރު ކޭއޭއެން އިން ހާމަ ކޮށްފައިވާ ގޮތުގައި، އިންސާނީ އެހީ އެތެރެ ކުރުމުގެ ފުރުސަތު ދިނުމުގެ ގޮތުން ބުދަ ދުވަހު އިސްރާއީލް އިން ރަފަހް ހުޅުވާލާނެ އެވެ.

ރަފަހް ސަރަހައްދު ހުޅުވާލަން އިސްރާއީލް އިން ނިންމުމާ އެކު، އދ އާއި ހުއްދަ ލިބިފައިވާ ބައިނަލްއަޤުވާމީ ޖަމިއްޔާތަކާއި، އަމިއްލަ ވިޔަފާރި ތަކާއި އަދި އެހީ ދެ ޤައުމު ތަކުން 600 ޓްރަކްގެ އިންސާހީ އެހީ ޣައްޒާ އަށް ފޮނުވުމަށް ހަމަޖެހިފައިވާ ކަމަށް ވަނީ ބުނެފަ އެވެ.

މި ނިންމުން ނިންމާފައި ވަނީ، ހަމާސް އިން މަރުވެފައިވާ ރަހީނުންގެ އިތުރު ހަތަރު ހަށިގަނޑު އިސްރާއީލާ ހަވާލު ކުރުމާ ގުޅިގެންނެވެ. މިއީ ހުކުރު ދުވަހު ހަނގުރާމަ ހުއްޓާލުމުގެ އެއްބަސްވުމުގެ ދަށުން ކޮށްފައިވާ ކަމެކެވެ.

އެމެރިކާގެ ރައީސް ޑޮނަލްޑް ޓްރަމްޕްގެ މެދުވެރިކަމާ އެކު ހަނގުރާމަ ހުއްޓާލުމަށް ވެވުނު އެއްބަސްވުމުގެ ދަށުން، ހުކުރު ދުވަހު ހަނގުރާމަ ހުއްޓާލުމަށްފަހު 72 ގަޑިއިރުގެ ތެރޭގައި ދިރި ހުރި އަދި މަރުވެފައިވާ ހުރިހާ ރަހީނުން ދޫކޮށްލަން ވަނީ ހިމަނައިފަ އެވެ.

އެއާއެކު ހަމާސް އިން ވަނީ އެ ޖަމާއަތުގެ ބެލުމުގެ ދަށުގައި ތިބި ރަހީނުންގެ ތެރެއިން ދިރި ތިބި 20 މީހުން މިނިވަން ކޮށްފަ އެވެ. އަދި ހަމާސް އިން ވަނީ އެ މަރުވެފައިވާ ރަހީނުންގެ ތެރެއިން ބައެއް މީހުން ހަށި ގަނޑު ވެސް އިސްރާއީލްއާ ހަވާލު ކޮށްފަ އެވެ.

އިސްރާއީލުގެ ހަރުކަށި ސިޔާސަތުގެ ވަޒީރު އިޓަމާ ބެން ގްވިރް އަންގާރަ ދުވަހު ބުނެފައި ވަނީ، ހަމާސް އިން އަސީރުންގެ ހަށިގަނޑުތައް އަނބުރާ ނުދީފި ނަމަ، ޣައްޒާ އަށް ފޮނުވާ އެހީ ހުއްޓާލާނެ ކަމަށެވެ.

ކޭއޭއެން އިން ބުނާ ގޮތުގައި، ރަފަހް ހުޅުވާލުމަށް ނިންމީ، ހަމާސް އިން ބުދަ ދުވަހު އިތުރު ހަތަރު ހަށިގަނޑު އަނބުރާ ދޭން ނިންމާފައިވާކަން އެނގުމާ ގުޅިގެންނެވެ. ނަމަވެސް މިކަން ހަމާސް އިން މިހާތަނަށް ކަށަވަރު ކޮށްދީފައި ނުވެ އެވެ.

ހަނގުރާމައިގެ ސަބަބުން ޣައްޒާގައި ދިމާވެފައިވާ އިންސާނީ ބޮޑު ހާލަތާ ގުޅިގެން، އދ އާއި އެހީދޭ ޖަމިއްޔާ ތަކުން ވަނީ ރަފަހް ހުޅުވާލުމަށް މީގެ ކުރިން ވެސް ގޮވާލައިފަ އެވެ. މިއަހަރުގެ އޮގަސްޓު މަހުގެ ތެރޭގައި އދ އިން ވަނީ ޣައްޒާގައި ހައި ހޫނުކަން އޮތް ކަމަށް ކަނޑައަޅައިފަ އެވެ.