ހުޅުމާލޭ ވިޔަފާރި ބަނދަރުގައި ބަހައްޓައިފައި ހުރި 2 ކޮންޓެއިނަރު ސިނގިރޭޓް ގެއްލުމާއި ގުޅިގެން ހުށަހެޅި މައްސަލަ ސަރުކާރު މެމްބަރުން ބޭރުކޮށްލައިފި
ހަތިޔާރާއި ގޮވާ ތަކެއްޗާއި އަދި އެ ނޫންވެސް ދިވެހިރާއްޖެ އަށް އެތެރެކުރުން މަނާ ތަކެތި ފަސޭހަ ކަމާއެކު އެތެރެ ކުރެވޭނޭ މަގު މިހާރު ހުޅުވިފައިވާކަން މިކަމުން އެނގޭ ކަމަށް މައްސަލައިގައިވޭ
އެމްޑީޕީ ގެ ޕާލިމެންޓަރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް
ހުޅުމާލޭ ވިޔަފާރި ބަނދަރުގައި ބަހައްޓައިފައި ހުރި 2 ކޮންޓެއިނަރު ސިނގިރޭޓް ގެއްލުމާ ގުޅިގެން ހުށަހެޅި ކުއްލި މައްސަލަ ރައްޔިތުންގެ މަޖިލީހުގައި ހިމެނޭ ސަރުކާރު މެމްބަރުން ބޭރުކޮށްލައިފިއެވެ.
ބުދަ ދުވަހު ކުރިއަށް ގެންދިޔަ ޖަލްސާއަށް މި މައްސަލަ ހުށަހެޅުއްވީ ހިތަދޫ ދެކުނު ދާއިރާގެ އެމްޑީޕީ އަށް ނިސްބަތްވާ މެންބަރު އިބްރާހީމް ނާޒިލް އެވެ.
ޕީއެންސީގެ މެޖޯރިޓީ އޮންނަ މަޖިލީހުން މިމައްސަލަ ބޭރުކޮށްލުމަށް 34 މެންބަރުން ވޯޓު ދިން އިރު، ބަހުސް ކުރުމަށް ފެންނަ ވޯޓު ދެއްވީ 8 މެންބަރުންނެވެ.
މެމްބަރު ނާޒިލް ހުށަހެޅުއްވި ކުއްލި މައްސަލައިގައި ބުނެފައިވަނީ ދިވެހިރާއްޖޭގައި ސިނގިރޭޓުން ނަގަމުން އައި ޑިއުޓީ، ކުއްލިއަކަށް ބޮޑުކުރުމާ ގުޅިގެން، ސިނގިރޭޓުގެ އަގުތައް އިންތިހާ އަށް އުފުލުމުގެ ނާޖާއިޒު ފައިދާ ނަގައި، ބޮޑު އަގުގައި ވިއްކުމަށް ޓަކައި ބައެއް ފަރާތްތަކުން ޑިއުޓީ ނުދައްކައި ވަގަށް ސިނގިރޭޓު އެތެރެކޮށް ވިއްކަމުންދިއުމުގެ ސަބަބުން ސިނގިރޭޓުގެ ކަޅު ބާޒާރެއް އުފެދިފައިވާ ކަމަށާއި، ރާއްޖެ އަށް ވަގަށް އެތެރެ ކުރަމުންދާ ސިނގިރޭޓު ދުވަހެއް ދުވަހަކަށް އިތުރުވަމުން ދާއިރު، އަތުލައިގަނެވެނީ އޭގެ ތެރެއިން މަދު މިންވަރެއް ކަމަށެވެ. އަދި އަތުލައިގަނެވޭ ފަހަރުތަކުގައި ވެސް، އެކަށީގެންވާ ފިޔަވަޅު އެޅިފައިނުވާކަމާއި އެ ކަންކަމުގައި، ގާނޫނު ތަންފީޒުކުރާ އިދާރާތަކުގެ އިހުމާލާއި ބައިވެރިވުން ވަރަށް ފުޅާކޮށް އޮތްކަމަށް ބެލެވޭ ކަމަށް މައްސަލާގައި ބުނެފައިވެއެވެ.
ރާއްޖެ އަށް ވަގަށް އެތެރެކުރަނިކޮށް މޯލްޑިވްސް ކަސްޓަމްސް ސާރވިސް އިން ހިފަހައްޓައި، މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ބެލުމުގެ ދަށުގައި ހުޅުމާލެ ވިޔަފާރި ބަނދަރުގައި ބަހައްޓައިފައި ހުރި، އެންމެ ބޮޑު ސައިޒުގެ 2 ސިނގިރޭޓު ކޮންޓެއިނަރު އެތަނުން ވަގަށް ނަގައިފައިވާ ކަމަށް މައުލޫމާތު ލިބެމުންދާ ކަމަށާއި، މި 2 ކޮންޓެއިނަރުގައި ހުރި 13.6 މިލިއަން ސިނގިރޭޓު ގެއްލުމުން، މޯލްޑިވްސް ކަސްޓަމްސް ސާރވިސް ނުވަތަ މޯލްޑިވްސް ޕޯޓްސް ލިމިޓެޑުން މިހައިތަނަށް އެއްވެސް ކަމެއް ހާމަކޮށްފައި ނުވުމުގެ ސަބަބުން، އެ އިދާރާތަކުގެ ސީދާ ބައިވެރިވުން ނުވަތަ އިހުމާލު މި ކަމުގައި އޮތް ކަމަށް ބަލައި، ރައްޔިތުންގެ ތެރޭގައި ނުހަނު ބޮޑަށް މި ކަމުގެ ކަންބޮޑުވުން އެބައޮތް ކަމަށް މައްސަލަގާއި ބުނެފައިވެއެވެ.
މީގެ އިތުރުން މި ސިނގިރޭޓުތަކުގެ ޑިއުޓީގެ ގޮތުގައި އަރާނެކަމަށް ލަފާކުރާ 100 މިލިއަނަށް ވުރެ ގިނަ ރުފިޔާ އަކީ ދައުލަތަށް ލިބިގެންދިޔަ ބޮޑު މާލީ ގެއްލުމެއްކަން ފާހަގަވާ ކަމަށާއި، ރައްޖެ އަށް އެތެރެކޮށް، ޕޯޓުގައި ބަހައްޓައިފައި ހުންނަ މުދާ މި ފަދައިން ގެއްލުމަކީ، ޕޯޓު ހިންގާ އެމްޕީއެލްއަށް ޕޯޓުގެ ސެކިއުރިޓީ ނުބެލެހެއްޓޭކަން ހާމަވާ ކަމެއްކަމާއި، އެކަމުގެ ސަބަބުން، ވިޔަފާރިވެރިން އެތެރެކުރާ މުދަލަށް އެއްވެސް ރައްކާތެރިކަމެއް ނެތްކަން ހާމަވާ ކަމަށެވެ. އަދި ރައްޖެ އަށް އެތެރެކުރާ މުދަލާއި ތަކެތި ބަލައިފާސްކުރުމާއި ބެލެހެއްޓުމުގައި މޯލްޑިވްސް ކަސްޓަމްސް ސާރވިސް އިން އިހުމާލުވަމުންދާކަން ފާހަގަވާ ކަމަށް މެންބަރު ނާޒިލް ހުށަހެޅި ކުއްލި މައްސަލާގައި ބުނެފައިވެއެވެ.
ވިޔަފާރި ބަނދަރުތަކަށް ބާލާ މުދަލާއި ތަކެތި ބަލައި ފާސްކުރުމާއި، ބަނދަރުގައި ބަހައްޓައިފައި ހުންނަ ވަގުތު ބެލެހެއްޓުމުގެ ކަންކަން މިހާ ދޯހަޅިކޮށް އޮންނަކަން ހާމަވުމަކީ، މަސްތުވާތަކެއްޗާއި، ހަތިޔާރާއި ގޮވާ ތަކެއްޗާއި އަދި އެ ނޫންވެސް ދިވެހިރާއްޖެ އަށް އެތެރެކުރުން މަނާ ތަކެތި ފަސޭހަ ކަމާއެކު އެތެރެ ކުރެވޭނޭ މަގު މިހާރު ހުޅުވިފައިވާކަން އެނގިގެންދާ ސަބަބެއް ކަމަށާއި، މިކަމުގެ ސަބަބުން، މުޖުތަމައުގެ ތެރޭގައި މަސްތުވާތަކެތީގެ ވިޔަފާރި ކުރުމާއި ބޭނުން ކުރުން އިހުނަށްވުރެ އިތުރުވުން އަދި، ހަތިޔާރު ނުވަތަ ގޮވާ ތަކެތި ބޭނުންކޮށްގެން ޓެރަރިސްޓް ހަމަލާއެއް ދިނުން ފަދަ ޖަރީމާތަކެއް ހިންގުމުގެ ފުރުސަތު ނުހަނު ބޮޑަށް އޮތް ސަބަބެއް ކަމަށެވެ. އަދި ގައުމުގެ ސަލާމަތާ ގުޅޭ މި ފަދަ ކަމަކީ، އަންނާން އޮތް ބޮޑު ނުރައްކަލެއްގެ ރަނގަބީލެއް ކަމަށެވެ.
މިއީ، އެންމެ މައްސަލައެއް ކަމަށްވީ ނަމަވެސް، މި ކަމަކީ ގައުމީ ސަލާމަތައް އަދި އިގުތިސާދަށް ނުރައްކާ ވާގޮތަކަށް ހިނގަމުންދާ ކަންކަމުގެ ތެރެއިން ކަމެއްކަން ފާހަގަވާ ސަބަބަށް ޓަކައި، މި ކަމަކީ، ކޮންމެހެން ރައްޔިތުންގެ މަޖިލީހުގައި ބަހުސްކުރެވެންވާނެ މައްސަލައެއްކަން ފާހަގަކޮށްފައިވެއެވެ.
