ޣައްޒާގެ ހަމަޖެހުން ޤާއިމު ކުރުމަށް އެމެރިކާގެ ނުފޫޒު ވަރަށް މުހިންމު: ވޭންސް

އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ހުއްޓުމަކަށް ގެނައުމުގެ އެއްބަސްވުން ޤާއިމު ކޮށްފައިވާއިރު، ޣައްޒާގެ ހަމަޖެހުން ޤާއިމު ކުރުމަށް އެމެރިކާގެ ނުފޫޒު ވަރަށް މުހިންމު ކަމަށް އެ ޤައުމުގެ ނައިބު ރައީސް ޖޭޑީ ވޭންސް ވިދާޅުވެއްޖެ އެވެ.

ވޭންސް ވިދާޅުވެފައި ވަނީ ހަމާސް ޖަމާއަތުގެ ބެލުމުގެ ދަށުގައި ތިބި އިސްރާއީލްގެ ހުރިހާ ރަހީނުން ވަރަށް އަވަހަށް މިނިވަން ކުރެވޭނެ ކަމަށާއި، ޣައްޒާގެ މުސްތަޤުބަލުގެ ހަމަޖެހުން ކަށަވަރު ކުރުމަށް އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން ބޭނުންވާ ހުރިހާ ފިޔަވަޅެއް އަޅާނެ ކަމަށެވެ.

އެންބީސީ ނިއުސްގެ މީޓް ދަ ޕްރެސް އަށް ދެއްވި އިންޓަވިޔުގައި ވޭންސް ވިދާޅުވެފައި ވަނީ ރަހީނުން އެއްކޮށް މިނިވަން ކުރުމަކީ ކޮންމެހެން ވެސް ކުރަން ޖެހޭ ކަމެއް ކަމަށެވެ. ވޭންސް މިހެން ވިދާޅުވެފައިވާއިރު، ހަމާސް އިން ވަނީ އެ ޖަމާއަތުގެ ބެލުމުގެ ދަށުގައި ތިބި ރަހީނުންގެ ތެރެއިން ހަތް މީހަކު މިނިވަން ކޮށްފަ އެވެ.

މެދު އިރުމަތީގެ ސަރަހައްދުގެ ހަމަޖެހުމަށް އެމެރިކާ އިން ފިޔަވަޅު އެޅުމުގައި ދެމި ތިބުމާ ގުޅޭ ގޮތުން ވާހަކަ ދައްކަވަމުން ވޭންސް ވިދާޅުވެފައި ވަނީ، އެމެރިކާގެ ރައީސް ޓްރަމްޕްއާ ހަމައިން ފެށިގެން ތިރިއަށް، އެކަމުގައި ދެމެހެއްޓެނިވި ނުފޫޒާއި ފިޔަވަޅުތައް އަޅަން ބޭނުންވާ ކަމަށެވެ.

މީގެ އިތުރުން ވޭންސް ވިދާޅުވެފައި ވަނީ އިސްރާއީލްް އަށް ފޮނުވާ 200 ސިފައިންގެ މަސްއޫލިއްޔަތަކީ ހަމައެކަނި ޣައްޒާ ހަނގުރާމަ ހުއްޓުން ވިލަރެސް ކުރުން ކަމަށާއި، އެއްވެސް ޙާލަތެއްގައި ހަނގުރާމައިގައި ބައިވެރިވުމެއް އެމީހުންނަށް ނޯންނާނެ ކަމަށެވެ.

ހަމަ އެހެންމެ، އެ އިންޓަވިޔުގައި ވޭންސް ވިދާޅުވެފައި ވަނީ، އެމެރިކާގެ ސިފައިން ފަލަސްޠީނުގެ އެއްވެސް ސަރަހައްދެއްގައި ނުތިބޭނެ ކަމަށެވެ. އޭނާ ވިދާޅުވީ އެއްބަސްވެފައިވާ ސަރަހައްދުގައި ސިފައިން ތިބޭތޯ ބެލުމާއި، ހަމާސް އިން އިސްރާއީލް އަށް ހަމަލާ ނުދޭތޯ ބެލުމާއި، އެމެރިކާ އިން ކަނޑައަޅާފައިވާ ކަންކަން ރަނގަޅަށް ކުރިއަށް ގެންދޭތޯ ބަލަމުންް ގެންދާނެ ކަމަށެވެ.

އިސްރާއީލް އަށް ސިފައިން ފޮނުވަނީ ހަމައެކަނި ވިލަރެސް ކުރަންކަން ފާހަގަކޮށް ވޭންސް ވިދާޅުވެފައި ވަނީ، ޣައްޒާ ނުވަތަ އިސްރާއީލްފައި އެމެރިކާގެ ސިފައިން ބޭތިއްބުމަކީ އެއްވެސް އިރެއްގައި އެ ޤައުމުން ބޭނުންވާ ކަމެއް ނޫން ކަމަށެވެ. އަދި އެއީ އެ ޤައުމުގެ ޕްލޭނެއް ނޫން ކަމަށް ވެސް ވޭންސް ވިދާޅުވެފައިވެ އެވެ.

އިސްރާއީލް އާއި ހަމާސް އިން ހަނގުރާމަ ހުއްޓާލުމަށް އެއްބަސްވެފައިވާއިރު، އެކަމުގައި އެމެރިކާ އިން ވަނީ އިސް ދައުރެއް އަދާ ކޮށްފަ އެވެ. ހަނގުރާމަ ހުއްޓާލުމަށް ދެބައި މީހުން ވެސް އެއްބަސްވެފައި ވަނީ އެމެރިކާގެ ރައީސް ޓްރަމްޕް ހުށަހެޅި ޕްލޭން އަށް މަޝްވަރާ ކުރުމަށް ފަހު އެވެ.