އައްޑޫ ސިޓީއަށް ދިމާވެފައިވާ ކަރަންޓްގެ މައްސަލައަށް ދާއިމީ ހައްލެއް ނުލިބި އަނެއްކާވެސް އައްޑޫގެ އެކި ސަރަހައްދުތަކުން ކަރަންޓު ކަނޑަން ފަށައިފިއެވެ.

އައްޑޫ ސިޓީގެ ކަރަންޓުގެ މައްސަލަ ސަރުކާރަށް ހައްލު ނުވެ ދިގުލައިގެން ގޮސްފައިވާއިރު އެކަމުގެ ހުރިހާ ގެއްލުމެއް ލިބެމުންދަނީ އައްޑޫގެ ރައްޔިތުންނަށެވެ. މައުލޫމާތު ލިބިފައިވާ ގޮތުގައި އިންޖީނުތަކަށް ދިމާވި މައްސަލައާއި ގުޅިގެންނާއި ލޯޑު މަތިވުމުގެ ސަބަބުން އެކި ރައްތަކުން ކަރަންޓު ކެނޑޭނެކަން ވަނީ އަންގާފައެވެ.

އައްޑޫ ސިޓީ ކައުންސިލުން ބުނީ މިހާތަނަށް އައިއިރުވެސް ހައްލެއް ނާންނަ ކަމަށެވެ. އެގޮތުން ކޮންމެވެސް އެއް ހިސާބަކުން އަބަދުވެސް ކަރަންޓް ކަނޑަމުން އަންނަ ކަމަށާއި، ބައެއް ސަރަހައްދުތަކުން ދެތިން ފަހަރަށް ވެސް ކަރަންޓް ކަނޑާފައިވާ ކަމަށެވެ.

ފެނަކަ އައްޑޫ އޮފީހުގެ ވައިބަރ ގުރޫޕުގައި މިދިޔަ ހަފްތާގެ ބުދަ ދުވަހު ބުނެފައިވަނީ ސެންޓްރަލް ޕަވަރ ސްޓޭޝަންގައި ހިންގާފައި ހުރި އިންޖީނުތަކުގެ ތެރެއިން އިންޖީނަކަށް ދިމާވި ޓެކްނިކަލް މައްސަލައަކާއި ގުޅިގެން ލޯޑް މަތިވާ ގަޑިތަކުގައި ލޯޑް މެނޭޖް ކުރުމަށްޓަކައި ކަރަންޓުގެ ޚިދުމަތް މެދުކަނޑާލަންޖެހިދާނެ ވާހަކަ ކަސްޓަމަރުންގެ މަޢުލޫމާތައްޓަކައި ދަންނަވާ ކަމަށެއެވެ. އަދި ހޮނިހިރު ދުވަހު ލިޔެފައިވާ މެސެޖުގައި ބުނެފައިވަނީ ލޯޑް މަތިވުމާއި އިންޖީނަށް ދިމާވި މައްސަލައަކާއި ގުޅިގެން ކަރަންޓު ކެނޑޭނެ ކަމަށެވެ.

އެގޮތުން މިދިޔަ ހަފްތާގެ ބުރާސްފަތި ދުވަހުން ފެށިގެން ކޮންމެ ދުވަހަކުވެސް އެކި ވަގުތުތަކުގައި، އެކި ސަރަހައްދުތަކުން ވަނީ އެއް ގަޑި އިރަށް ކަރަންޓް ކަނޑާފައެވެ.

މިކަމާއި ގުޅިގެން މައުލޫމާތު ހޯދުމަށް ރާއްޖެއެމްވީ އިން ފެނަކަ އައްޑޫ ބްރާންޗްގެ ޑިރެކްޓަރ ނައީމް އަށް ގުޅުމުން ވިދާޅުވެފައިވަނީ މިގޮތަށް ދެން ކަރަންޓްގެ ޙިދުމަތް މެދު ކެނޑިދާނެ ކަމަށާއި އެހެން ދިމާވާ ޓެކްނިކަލް މައްސަލަތައްވެސް ހުންނާނެ ކަމަށެއެވެ. އަދި މިގޮތަށް ކަރަންޓްގެ މައްސަލައަށް ދާއިމީ ހައްލެއް ނުލިބި ގިނަ ދުވަސްވަމުން ދިއުމާއި، ފާއިތުވި ހަފްތާއިން ފެށިގެން ކަރަންޓް ކެނޑެން ދިމާވީ ކީއްވެތޯ ސުވާލުކުރުމުން، އެކަށީގެންވާ ޖަވާބެއް ނުދީ ފޯނު ބޭއްވި އެވެ.

މާލެ ފިޔަވައި ރާއްޖޭގެ އެންމެ އާބާދީ ބޮޑު އައްޑޫގައި ދޭތެރެއިން ކަރަންޓު ކެނޑުމުގެ މައްސަލަ ދިމާވާ އިރު މި މައްސަލަ އަށް ހައްލެއް ވަނީ ހޯދާނުދެވިފައެވެ. މި ސަރުކާރުން މީގެ ކުރިން ބުނީ މި އަހަރު ރޯދަ އަށް އައްޑޫގެ ކަރަންޓުގެ މައްސަލަ ހައްލުވާނެ ކަމަށެވެ. ނަމަވެސް މި އަދާއި ހަމައަށް ވެސް އެކަން ކުރެވިފަ އެއް ނުވެއެވެ.

އައްޑޫ ސިޓީގެ ކަރަންޓުގެ މައްސަލަ ހައްލުކުރުމަށް އެ ސިޓީ އަށް 21 ފެބްރުއަރީ 2025 ގައި ގެންދިޔަ 1.8 މެގަ ވޮޓްގެ ޖަނަރޭޓަރު އިންސްޓޯލް ކޮށްފައިވީ ނަމަވެސް އަދިވެސް މައްސަލައަށް ހައްލެއް ނުލިބެއެވެ.