ދައުލަތަށް ލިބޭ ފައިސާ ވަގަށް ކާ ބަޔަކު މަގާމުތަކުގައި އެބަތިބި: ޣަފޫރު
8 އޮކްޓޯބަރު 2025 | ބުދަ 14:42ވައްކަމާއި ކޮަރަޕްޝަނުގައި އިސް މަގާމުތަކުގައި ތިބި މީހުންނާއި ކުންފުނިތަކުގެ ވެރިން ހިމެނޭ
މަޖިލީހުގެ ހަނިމާދޫ ދާއިރާގެ މެމްބަރު އަބްދުލް ޢަފޫރު މޫސާ
ދައުލަތަށް ލިބޭ ފައިސާގެ 40 އިންސައްތަ ކޮރަޕްޝަނާއި ވައްކަމުގެ ތެރެއިން ގެއްލޭއިރު އެ ވަގަށް ކާ ބަޔަކު ދައުލަތުގެ މަގާމުތަކުގައި އެބަތިބި ކަމަށް ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ވިދާޅުވެއްޖެއެވެ.
އޮޑިޓް ގާނޫނަށް އިސްލާހު ގެނައުމުގެ ބިލުގެ ބަހުސްގައި ވާހަކަ ދައްކަވަމުން ޣަފޫރު ވިދާޅުވީ ގައުމުގައި ހިނގާ ވައްކަމާއި ކޮރަޕްޝަން ހުއްޓުވުމަށް ވެރިންގެ ކިބައިގައި އެ ހިތްވަރު ހުންނަންޖެހޭ ކަމަށެވެ. ނަމަވެސް އެ ނުފެންނަ ކަމަށާއި، މި ޤައުމުގައި ވައްކަމާއި ކޮރަޕްޝަން ހިންގަން އެއްވެސް މީހަކު ބިރެއް، ލަދެއް ނެތް ކަމަށެވެ. އަދި ގިނަ ބަޔަކު މި ކަމުގައި ބައިވެރިވެ މި ޢަމަލުތައް ޤައުމުގައި ހިންގަމުން ދާއިރު، އެ ކުރެވެނީ ގޯސްކަމެއް ކަން އިހުސާސްވެސް ނުކުރެވޭ ކަމަށެވެ.
ޣަފޫރު ވިދާޅުވީ ދައުލަތުގެ ފައިސާއާއި މުދާ ރައްކާތެރިކޮށް ބެލެޖެއްޓުމަކީ އެއިރެއްގައި އޮންނަ ސަރުކާރަކަށް ލާޒިމް ކަމެއް ކަމަށެވެ. އަދި ކޮރަޕްޝަން ގިނަވަނީ ގައުމުގެ ތެރެއިން ވެސް ބަޔަކު އެކަމަށް ތަރުހީބުދޭތީ ކަމަށާއި، އެއީ މިއަދުގެ ހަގީގަތް ކަމަށް ޣަފޫރު ވިދާޅުވިއެވެ.
ތިމާ ބޭނުންވާ ކަންކުރުމުގައި ތިމާއަކަށް ނެތް އެއްވެސް މިންގަނޑެއް. ޖެހުނު ދިމާލަކުން އެކަން ކޮށްލަންވީ. ކޮށްލާފައި ދެން އެހެން މީހަކު ކަމެއް ކުރީމާ އެ ވާހަކަ މި ދެކެވެނީ. އެހެނެއްވެގެން ނުވާނެ. ހަރާމާއި ހަލާލާ ވަކިވެ، ހެޔޮހާލުގައި ތިބެ އަޅުގަނޑުމެން ދުނިޔޭގައި އުޅެން ޖެހޭނީ. އެނޫން ގޮތަކަށް ދާނަަމަ، ކަންކަން ދާނީ ގޯހުން ނުބައަށް. މި ސަރަހައްދުގައި މި ޤައުމަކީ ވައްކަމާއި ކޮރަޕްޝަން ހަމަ ބޮޑު ޤައުމެއްގެ ގޮތުގައި ފާހަގަ ކުރެވެމުން މިދަނީ. މި ކޮރަޕްޝަންތައް ހުއްޓުވެންޖެހޭ. މިކަން ކުރުމުގެ ގާބިލުކަން އެންމެންގެ ވެސް ހުންނަންޖެހޭ، ސަރުކާރުގައި ވެސް ހުންނަންޖެހޭ، ދައުލަތުގެ މުއައްސަސާތަކުގައި ވެސް ހުންނަންޖެހޭ އަދި ރައްޔިތުން އެ ވިސްނުން ހުންނަންޖެހޭ.ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ
ޣަފޫރު ވިދާޅުވީ ކޮރަޕްޝަނާއި ވައްކަން ހުއްޓުވުމަކީ ހަމައެކަނި ސަރުކާރަކުން ކުރެވޭނެ ކަމެއް ނޫން ކަމަށާއި، މަގާމުތަކު ގައި ތިބޭ މީހުން އެކަން ކުރާނަމަ، އެކަން ބަލަން ތިބޭ މީހުން ވެސް ތިބެނީ އެކަން ކުރަން ކަމަށެވެ. އެހެންކަމުން އެކަމެއް ނުހުއްޓުވޭނެ ކަމަށާއި، ރައްޔިތުން ވެސް ކޮރަޕްޝަނަށް ނޫނެކޭ ބުނަންޖެހޭ ކަމަށެވެ.
ޣަފޫރު ވިދާޅުވީ ދައުލަތަށް ލިބޭ ފައިސާގެ 40 އިންސައްތަ ދަނީ ކޮރަޕްޝަނާއި ވައްކަމުގެ ތެރެއިން ގެއްލިގެން ކަމަށެވެ. އަދި އެ ވަގަށް ކާ ބަޔަކު މި ގައުމުގައި އެބައުޅޭ ކަމަށާއި، އެމީހުން ތިބީ މަގާމުތަކުގައި ކަމަށް ޣަފޫރު ވިދާޅުވިއެވެ.
މި ކަންކަން ހުއްޓުވެނެ އެބަޖެހޭ. ހަމަ ކަނޑައެޅިގެން ކެނޑިނޭޅި ވައްކަން. 25 ރުފިޔާއަށް ލިބޭ އެތި 300 ރުފިޔާއަށް ގަންނަ ގައުމެއް. މިކަން އިނގޭ އެންމެންނަށް ވެސް. ފިހާރައިގައި ހުންނަ މުދާ އެހެން މީހަކު ލައްވާ ހަތަރު ސަތޭކަ ރުފިޔާއަށް ތިންސަތޭކަ ރުފިޔާ އަށް ދޭ އެތި އެއްހާސް ރުފިޔާއަށް ގަނެގެން ކުންފުނިތަކަށް ވިއްކާކަން ވެސް އެންމެންނަށް އެނގޭ. ދެން މި ކޮރަޕްޝަން ނޫން ކޯއްޗަކަށްތޯ މިވާނީ. އެކަމަކު އެ ވެސް ހަމަ ކާން ހެޔޮވަރު. އަނގައެއް ވަލެއް ނުވަންޏާ މި މީހުން މި ތިބީ އެއްޗެހި ކާގޮތަށް އިނގޭތޯ.ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ
ޣަފޫރު ވިދާޅުވީ ކޮރަޕްޝަން ވާނީ ކޮރަޕްޝަނަށް ކަމަށާއި، ވަކި މީހަކު ކުރީމަ އެ ރީތިވާނެ އުސޫލެއް ދުނިޔެއަކު އަދި ހޯދިފައި ނެތް ކަމަށެވެ. އަދި ގާނޫނު ހެދިދާނެ ކަމަށާއި، ހުރިހާ އެއްޗެއް ލިޔެފައި މަޖިލީހުން ވެސް ފާސް ކުރެވިދާނެ ކަމަށާއި، ނަމަވެސް އާހިރުގައި ނިމޭއިރު އެއިން ލިބޭ އެއްވެސްކަމެއް ނެތް ކަމަށް ޣަފޫރު ވިދާޅުވިއެވެ.
