އެސެޓް ރިކަވަރީ ގާނޫނުގެ ދަށުން އެންމެ ފުރަތަމަ ދައުލަތަށް ނަގަންވާނީ މާލޭގެ އިރުމައްޗާއި، ހުޅަނގުގައި ހުރި ތަންތަން: ރައީސް އިބޫ

ބޮޑެތި ކޮރަޕްޝަންތަކާއި ވައްކަންތަކުގެ ފައިސާ ހޯދުމަށް ފާސްކުރާ އެސެޓް ރިކަވަރީ ގާނޫނުގެ ދަށުން އެންމެ ފުރަތަމަ ދައުލަތަށް ނަގަންވާނީ މާލޭގެ އިރުމައްޗާއި، ހުޅަނގުގައި ހުރި ތަންތަން ކަމަށް ކުރީގެ ރައީސް އިބްރާހިމް މުހައްމަދު ސާލިހު ވިދާޅުވެއްޖެ އެވެ.

ބުރާސްފަތި ދުވަހު ފަށާއިރު ޕްރޮގްރާމްގައި ވާހަކަފުޅު ދައްކަވަމުން ރައީސް އިބޫ ވިދާޅުވީ މިހާރު ވެސް ކޮރަޕްޝަންގެ މައްސަލަތައް ބަލައި ތަހުގީގު ކުރިއަށް ގެންދެވޭނެ ކަމަށެވެ. އަދި ވިދާޅުވީ ބޮޑެތި ކޮރަޕްޝަންތަކާއި ވައްކަންތަކުގެ ފައިސާ ހޯދުމަށް އެސެޓް ރިކަވަރީ ގާނޫނެއް ތައާރަފުކުރުމަކީ މުހިންމު ކަމެއް ކަމަށާއި، އެއީ ކުރަން ވަރަށް ރަނގަޅު ކަމެއް ކަމަށެވެ.

މިގާނޫނުން އެންމެނަށް ހަމަހަމަވާންޖެހޭކަން ފާހަގަކުރައްވައި ރައީސް އިބޫ ވިދާޅުވީ އެންމެ ފުރަތަމަ ދައުލަތަށް ނަގަންވާނީ މާލޭގެ އިރުމައްޗާއި، ހުޅަނގުގައި ހުރި ތަންތަން ކަމަށެވެ. ދައުލަތުގެ ފައިސާ ބޭނުން ކޮށްގެން ހަދާފައިވާ ތަންތަން އެބަހުރި ކަމަށާއި، އެތަންތަން ދައުލަތަށް ނެގޭނެ ކަމަށް އެމަނިކުފާނު ވިދާޅުވިއެވެ.

މީގެ އިތުރުން ރައީސް އިބޫ ވިދާޅުވީ، އެމަނިކުފާނުގެ އަތުން ދައުލަތަށް ނެގޭނެ އެއްވެސް އެއްޗެއް ނޯންނާނެ ކަމަށާއި، އެއްވެސް ފައިސާއެއްގައި ޖެހިފައި ނޯންނާނެ ކަމަށެވެ. އަދި އެމަނިކުފާނުގެ ވެރިކަމުގައި ނައިބު ރައީސް ހިމެނޭ ގޮތަށް ވަޒީރުންނާއެކު މާލީ ބަޔާންތައް ބަރާބާރަށް އަހަރުން އަހަރަށް ހާމަ ކުރެއްވި ކަމަށް ރައީސް އިބޫ ވިދާޅުވިއެވެ.

މިހާރު ވެސް ކުރެވޭނެ އެނގޭތޯ. ދެން ވަރަށް ރަނގަޅު ކަމެއް އެނގޭތޯ. ވަރަށް ސާފުކޮށް އެބަހުއްޓެއްނުންތޯ ފެންނަން ފުރަތަމަ ދާންވީ ތަންތަން. މާލޭގެ އިރުމައްޗަށް ބެލިއަސް މާލޭގެ ހުޅަނގަށް ބެލިއަސް އެހުރީ. ހަމަ ދާންވީ އެނގޭތޯ. ފައްޓަންވީ އެހިސާބުން. އޭރަށް ހަމަ ނަގަމުން ނަގަމުން ދެވިދާނެ އެނގޭތޯ އެގާނޫނު ހަދައިގެން. އެހެންވީމަ ވަރަށް ރަނގަޅު ކަމެއް. އެކަމަކު ކުރައްވަންވާނީ މިދަންވާހެން. ހަމަހަމަކޮށް. ވަކި މީހެއް ބާކީ ނުކޮށް، އިންސާފުވެރިކަމާއެކު ނަގަމުން ގެންދަންވީ ހަމައެނގޭތޯ. ސަރުކާރު ފައިސާ ބޭނުންކޮށްގެން މިދަންނަވާހެން ހަދާފައި ހުރި ތަންތަން ނެނގޭނެ ތަންތަން އެބަހުރި. އެހެންވީމަ އެކަން ކުރައްވާފިއްޔާ ވަރަށް ރަނގަޅު.

ކުރީގެ ރައީސް އިބްރާހިމް މުހައްމަދު ސާލިހު

އެސެޓް ރިކަވަރީ ގާނޫނުގެ ދަށުން އެންމެ ފުރަތަމަ ދައުލަތަށް ނަގަންވާނީ މާލޭގެ އިރުމައްޗާއި، ހުޅަނގުގައި ހުރި ތަންތަން ކަމަށް ރައީސް އިބޫ ވިދާޅުވިއިރު، އިރުމަތީފަޅީގައި 25 ބުރިއަށް ކުރީގެ ރައީސް އަބްދުﷲ ޔާމީން ވަނީ އަމިއްލަ ގެކޮޅު ހ.ދޫވެހި އިމާރާތް ކޮށްފައެވެ. އަދި ހުޅަނގުކޮޅުގައި ރައީސް މުއިއްޒުގެ ގެކޮޅު މ.ދިމްޔާތު 15 ބުރިއަށް ނަގާފައެވެ.

މި ދެގެކޮޅާ ގުޅިގެން ވެސް ވަރަށް ގިނަ ކޮރަޕްޝަންގެ ތުހުމަތުތައް އަމާޒުވެފައިވެއެވެ.