ޖަވާބުދާރީ ނުވެވޭ އެއްވެސް ކަމެއް ކޮށްފައި ނޯންނާނެ، ރައްޔިތުންގެ ލޯ ލާރިއެއްގައި ވެސް ނުޖެހެން: ރައީސް ޞާލިޙު
އެމަނިކުފާނަށް ޖަވާބުދާރީ ނުވެެވޭ ވަރުގެ އެއްވެސް ކަމެއް ވެރިކަމުގެ ފަސް އަހަރުގެ ތެރޭގައި ކޮށްފައި ނުވާނެ
ފަށާއިރު ޕްރޮގްރާމްގައި ކުރީގެ ރައީސް އިބްރާހީމް މުޙައްމަދު ޞާލިޙް
ރައްޔިތުންގެ ލޯ ލާރިއެއްގައި ވެސް ޖެހިވަޑައިގެންފައި ނުވާނެ ކަމަށާއި، ޖަވާބު ދާރީ ނުވެވޭ އެއްވެސް ކަމެއް ކޮށްފައި ނުވާނެ ކަމަށް ކުރީގެ ރައީސް އިބްރާހީމް މުޙައްމަދު ޞާލިޙު ވިދާޅުވެއްޖެ އެވެ.
ރައީސް ޞާލިޙު މިހެން ވިދާޅުވީ، ބުރާސްފަތި ދުވަހު ރާއްޖެ ޓީވީގެ ފަށާއިރު ޕްރޮގްރާމްގައި ބައިވެރިވެ ވަޑައިގެން ވާހަކަ ދައްކަވަމުންނެވެ. އެގޮތުން ދާދި ފަހުން އޮޑިޓަރ ޖެނަރަލްގެ އޮފީހުން ނެރެފައިވާ، ފެނަކަ ކޯޕަރޭޝަންގެ އޮޑިޓް ރިޕޯޓާ ގުޅިގެން ރައީސް ޞާލިޙު ވަނީ ވާހަކަ ދައްކަވައިފަ އެވެ.
އެގޮތުން ރައީސް ޞާލިޙު ވިދާޅުވެފައި ވަނީ، އެމަނިކުފާނަށް ޖަވާބުދާރީ ނުވެެވޭ ވަރުގެ އެއްވެސް ކަމެއް ވެރިކަމުގެ ފަސް އަހަރުގެ ތެރޭގައި ކޮށްފައި ނުވާނެ ކަމަށެވެ. ވެރިކަމުގެ ތެރޭގައި ކުރައްވާފައިވާ ކޮންމެ ކަމަކާއި، އަޅުއްވާފައިވާ ކޮންމެ ފިޔަވަޅަކާ މެދު ވެސް، ކޮންމެ ތަނެއްގައި ވެސް އެމަނިކުފާނަށް ޖަވާބުދާރީ ވެވޭނެ ކަމަށް ރައީސް ޞާލިޙު ވިދާޅުވި އެވެ.
މީގެ އިތުރުން ދައުލަތުގެ ފައިސާ، ނުވަތަ ރައްޔިތުންގެ ފައިސާގެ ތެރެއިން ލޯ ލާރިއެއްގައި ވެސް ޖެހިވަޑައިގެންފައި ނުވާނެ ކަމަށް ރައީސް ޞާލިޙު ވަނީ ވިދާޅުވެފަ އެވެ. އެކަން ފާހަގަ ކުރައްވައި ރައީސް ޞާލިޙު ވިދާޅުވީ ވެރިކަމުގައި ހުންނެވިއިރު ވެސް، އަދި އޭގެ ކުރިން ވެސް އެފަދަ ކަމެއް ކުރައްވާފައި ނުވާނެ ކަމަށެވެ.
ހަމަ އެހެންމެ ފެނަކަ ކޯޕަރޭޝަންގެ އޮޑިޓް ރިޕޯޓަށް އިޝާރާތް ކުރައްވައި ރައީސް ޞާލިޙު ވިދާޅުވީ، ފެނަަކައިގެ ތެރެއިން އެމަނިކުފާނަށް އެއްވެސް ފައިދާއެއް، ނުވަތަ ފައިސާއެއް ލިބިވަޑައިގެންފައި ނުވާނެ ކަމަށެވެ. އެކަން ފާހަަގަ ކުރައްވައި ރައީސް ޞާލިޙު ވިދާޅުވީ، ފެނަކައާ ގުޅިގެން ނެރެފައިވާ އޮޑިޓް ރިޕޯޓުގައި ސިޔާސީ ކުލަ ޖެހިފައިވާ ކަމަށާއި، އެކަމުގެ އެއް ސަބަބަކީ ދަންވަރު ގަޑިއެއްގައި އެ ރިޕޯޓު ނެެރެފައިވުން ކަމަށެވެ.
ފުރަތަމަ ކަމަކަށް އަޅުގަނޑު ދަންނަވާނީ، އަޅުގަނޑަށް ޖަވާބުދާރީ ނުވެވޭވަރުގެ ކަމެއް އަޅުގަނޑު ކޮށްފައި ނޯންނާނެ ވެރިކަމުގައި ހުރިއިރު. ކޮށްފައި އޮތް ކޮންމެ ކަމެއް، އަޅާފައި އޮތް ކޮންމެ ފިޔަވަޅަކަށް އަޅުގަނޑަށް ޖަވާބުދާރީ ކޮންމެ ތަނެއްގައި އިރާދަކުރެއްވިއްޔާ ވެވޭނެ. އޭގެ އިތުރުން ދައުލަތުގެ އަދި، ރައްޔިތުންގެ ފައިސާގެ ތެރެއިން ލޯ ލާރިއެއްގައި ވެސް އަޅުގަނޑު ޖެހިފައި ނޯންނާނެ. ވެރިކަމުގައި ހުރިއިރު ވެސް، އަދި އޭގެ ކުރީގައި ވެސް. އެހެންވީމާ ފެނަކައިގެ ތި ވިދާޅުވާ ކަންތައްތަކުގެ ތެރެއިން އެއްވެސް ކަހަލަ، އެއްވެސް ކަހަލަ ބެނެފިޓެއް، ފައިދާއެއް، ފައިސާއެއް އަޅުގަނޑާ ހިސާބަށް އައިސްފައި ނޯންނާނެ. ދެން ފެނަކައާ ބެހޭ ގޮތުން އަޅުގަނޑު ކުރިން ވެސް ދެންނެވި ފަދައިން އޮޑިޓް ރިޕޯޓެއް މިއޮތީ ނެރެފައި. އޭގައި ސިޔާސީ ކުލަ ޖެހިފައި އޮތްކަން އަޅުގަނޑު މި ދެންނެވިހެން ފާހަގަވާ އެއް ސަބަބަކީ، އެ ދެންވަރު ދަޅާގައި އޮޑިޓް އޮފީހުން އެ ރިޕޯޓު ނެރުން އެއް ސަބަބަކީ.ކުރީގެ ރައީސް އިބްރާހީމް މުޙައްމަދު ޞާލިޙު
މީގެ އިތުރުން ރައީސް ޞާލިޙު ވިދާޅުވެފައި ވަނީ، މާކުރިން ފެށިގެން ސަރުކާރު ނުވަތަ ދައުލަތުގައި ކޮރަޕްޝަން މޫލާފައި އޮތް ކަމަށެވެ. އަދި ވަރަށް ގިނަ އަދި ވަރަށް ބައިވަރު މަސައްކަތް ކޮށްގެން ނޫނީ އެކަމުން އަރައި ނުގަނެވޭނެ ކަމަށް ރައީސް ޞާލިޙު ވިދާޅުވި އެވެ. އަދި އެމަނިކުފާނުގެ ވެރިކަމުގައި އެ މަސައްކަތް ފަށާފައި އޮންނާނެ ކަމަށް ރައީސް ޞާލިޙު ވިދާޅުވި އެވެ.
ކޮރަޕްޝަން ނައްތާލުމަށްޓަކައި މިނިވަން ޖުޑިޝަރީއެއް ބޭނުންވާކަން ފާހަގަ ކުރައްވައި ރައީސް ޞާލިޙު ވިދާޅުވީ، އެމަނިކުފާނުގެ ވެރިކަމުގައި ސުޕްރީމް ކޯޓާއި، ޖުޑިޝަރީ އަށް އިތުބާރު ހޯދިފައި އޮތް ކަމަށެވެ. އެހެން ނަމަވެސް، މިއަދު އަނެއްކާ ެވސް ދެންވަރު ދަޅައިގައި ކުރަމުން އަންނަ ކަންތައްތަކުގެ ސަބަބުން ޖުޑިޝަރީ އަށް އޮތް އިތުބާރު ގެއްލެމުން އަންނަ ކަަމަށް ރައީސް ޞާލިޙު ވިދާޅުވި އެވެ.
އެގޮތުން ކުއްލި ގޮތަކަށް ސުޕްރީމް ކޯޓުގެ ފަނޑިޔާރުން ތަކެއް ސަސްޕެންޑު ކުރި މައްސަލަ އަށް ރައީސް ޞާލިޙު ވަނީ އަލިއަޅުއްވާލައްވައިފަ އެވެ. އެގޮތުން ރައްޔިތުންގެ މަޖިލީހުގެ މެމްބަރުންނާ ގުޅޭ މައްސަލަ އެއް ބަލަމުން ދަނިކޮށް، ކުއްލި ގޮތަކަށް ފަނޑިޔާރުން ސަސްޕެންޑު ކުރި ކަމަށް ރައީސް ޞާލިޙު ފާހަގަ ކުރައްވާފައިވެ އެވެ.
މީގެ އިތުރުން ރައީސް ޞާލިޙު ވިދާޅުވީ މިއަދު ފެންނަނީ އޮޑިޓަރ ޖެނަރަލްގެ އޮފީސް ކޮމްޕޮރަމައިޒް ވެފައިވާ މަންޒަރު ކަމަށެވެ. އަދި އޭސީސީ އަށް މިނިވަން ކަމާ އެކު ތަހުގީގު ކުރުމަށް އޭރު ބާރުވެރިކަން ދީފައި ވާނެ ކަަމަށާއި، އެހެން ނަމަވެސް، މިއަދު ފެންނަނީ މިނިވަން މުއައްސަސާތައް ކޮމްޕޮރަމައިޒް ވެފައިވާ މަންޒަރު ކަަމަށް އެމަނިކުފާނު ވިދާޅުވި އެވެ.
