ސާޖިދާގެ ކުންފުނިން މަހަކު 2.4 މިލިއަން ރުފިޔާއަށް ކުލަބުތައް ސްޕޮންސާކުރާ ގޮތެއް ކިޔާދޭންޖެހޭ: އަމީރު
ކޮންމެ ކުލަބަކަށް މަހަކު 6 ލައްކަ ރުފިޔާގެ ރޭޓުން ސްޕޮންސާޝިޕް ދޭ ކަމަށް އަމީރު ވަނީ ވިދާޅުވެފަ
ރައީސް މުއިއްޒު އަދި އަނބiކަނބަލުން ސާޖިދާ
ރައީސް މުޙައްމަދު މުއިއްޒުގެ އާއިލީ ކުންފުނި ދިމްޔާތު ޕްރައިވެޓް ލިމިޓެޑުން ފުރަތަމަ ޑިވިޝަންގެ ހަތަރު ކުލަބަކަށް މަހަކު 2.4 މިލިއަން ރުފިޔާގެ ސްޕޮންސާޝިޕް ދޭ ގޮތާމެދު ކުރީގެ ފިނޭންސް މިނިސްޓަރު އިބްރާހިމް އަމީރު ވަނީ ސުވާލު އުފައްދަވައިފި އެވެ.
އެކްސް (ކުރީގެ ޓްވިޓަރ) ގައި ކުރެއްވި ޕޯސްޓެއްގައި އަމީރު ވިދާޅުވެފައިވަނީ، ދިމްޔާތު ތިރީގައި ހިންގާ ކެފޭ އަދި ދިމްޔާތު ގެސްޓްހައުސްގެ އާމްދަނީން މިފަދަ ބޮޑު އަދަދެއްގެ ސްޕޮންސާޝިޕް ދެވޭނެ ގޮތެއް ރައީސް މުއިއްޒު ރައްޔިތުންނަށް ކިޔައިދޭންޖެހޭ ކަމަށެވެ. ކޮންމެ ކުލަބަކަށް މަހަކު 6 ލައްކަ ރުފިޔާގެ ރޭޓުން ސްޕޮންސާޝިޕް ދޭ ކަމަށް އަމީރު ވަނީ ވިދާޅުވެފައެވެ. އަދި މިއީ ރާއްޖޭގެ އެންމެ ބޮޑެތި ވިޔަފާރިތަކަށްވެސް ކުޅަދާނަވާނެ ކަމެއް ނޫންކަމަށް އަމީރު ވަނީ ފާހަގަކުރައްވާފައެވެ.
ރައީސް މުއިއްޒުގެ އަނބިކަނބަލުން ސާޖިދާ މުޙައްމަދު އަދި އެމަނިކުފާނުގެ ތިން ދަރިންގެ ހިއްސާ އެކުލެވޭ ދިމްޔާތު ޕްރައިވެޓް ލިމިޓެޑުގެ ދަށުން ހިންގާ "ޑެމިއެޓާ" ކެފޭއިން ވަނީ ނިއުރޭޑިއަންޓް ސްޕޯޓްސް ކްލަބް، ކްލަބް އީގަލްސް އަދި ވިކްޓްރީ ސްޕޯޓްސް ކްލަބް ސްޕޮންސާކޮށްފައެވެ.
މިއީ ދިވެހި ފުޓުބޯޅައިގެ ތާރީޚުގައި އެއް ކުންފުންޏަކުން ފުރަތަމަ ޑިވިޝަންގެ މިހާ ގިނަ ކުލަބެއްގެ މެއިން ސްޕޮންސާކަން އެއްފަހަރާ ނެގި ފުރަތަމަ ފަހަރެވެ. މި ސްޕޮންސާރޝިޕްތަކާ ގުޅިގެން އާންމު ރައްޔިތުންގެ މެދުގައިވެސް ވަނީ ސުވާލުތަކެއް އުފެދިފައެވެ. ޚާއްޞަކޮށް މި ފައިސާއަކީ ހަމައެކަނި ކުޑަ ކެފޭއެއް ހިންގައިގެން ލިބޭ ފައިދާއިން ދެވޭ އެއްޗެއްތޯ ނުވަތަ ދައުލަތުގެ މާލިއްޔަތުން ކުރެވޭ ހޭދައެއްތޯ ގިނަ ބަޔަކު ދަނީ ސުވާލު އުފައްދަމުންނެވެ.
މި މައްސަލައާ ގުޅޭގޮތުން ސާޖިދާ މުޙައްމަދުގެ ބަހެއް ހޯދުމަށް ކުރެވުނު މަސައްކަތް ކާމިޔާބުވެފައި ނުވާތީ، މި ސްޕޮންސާޝިޕްތަކާ ގުޅިގެން އުފެދިފައިވާ ސުވާލުތަކަށް މިހާތަނަށް ރަސްމީ އެއްވެސް ޖަވާބެއް ލިބިފައެއް ނުވެއެވެ.
