ސަރުކާރު ހުއްޓުމުގެ ޒިންމާ ނަގަން ޖެހޭނީ ޑިމޮކްރަޓުން: ވޭންސް

އެމެރިކާގެ ސަރުކާރު ހުއްޓުމަކަށް އަތުވެދާނެ ކަމުގެ ނުރައްކާ ކުރިމަތިވެފައިވާ ދަނޑިވަޅެއްގައި، އެކަމުގެ ޒިންމާ ނަގަން ޖެހޭނީ އިދކޮޅު ޑިމޮކްރަޓިކް ޕާޓީ އިން ކަމަށް، އެމެރިކާގެ ނައިބު ރައީސް ޖޭޑީ ވޭންސް ވިދާޅުވެއްޖެ އެވެ.

ވޭންސް މިހެން ވިދާޅުވެފައި ވަނީ، ހޯމަ ދުވަހު ރިޔާސީ ގަނޑުވަރު ވައިޓް ހައުސްގައި ކުރިއަށް ގެންދިޔަ ކޮންގްރެސްގެ ލީޑަރުންނާ އެކު ބޭއްވުނު މަޝްވަރާ ބައްދަލުވުމަށް ފަހު ވާހަކަ ދައްކަމުންނެވެ. ވޭންސް ވިދާޅުވީ، ޑިމޮކްރަޓުން ރަނގަޅު ގޮތް ޚިޔާރު ނުކުރާތީ ސަރުކާރު ހުއްޓާލަން ޖެހޭ ހިސާބަށް ކަންކަން ގޮސްފައިވާ ކަމަށެވެ.

ފެޑަރަލް ސެޕެންޑިން ބިލާ މެދު އެއްބަސްވުމަކަށް އައުމަށް ޑިމޮކްރަޓުންނާއި، ރިޕަބްލިކަނުންނަށް ވަގުތު ލިބިފައި ވަނީ ބުދަ ދުވަހުގެ ހެނދުނު 4:01 (ޖީއެމްޓީ)އާ ޖަމައަށެވެ. އެ ވަގުތު ހަމަވުމުގެ ކުރިން އެއްބަސްވުމަަކަށް ނާދެވިއްޖެ ނަމަ، ސަރުކާރުގެ ބައެއް އޮފީސްތައް ބަންދު ކުރަން ޖެހޭނެ އެވެ. އަދި ގިނަ އަދަދެއްގެ ސަރުކާރުގެ މުވައްޒަފުން ވަގުތީ ގޮތުން ވަޒީފާ އިން ދުރު ކުރަން ވެސް ޖެހޭނެ އެވެ.

އެމެރިކާގެ ރައީސް ޑޮނަލްޑް ޓްރަމްޕް ނިސްބަތްވެ ވަޑައިގަންނަވާ ރިޕަބްލިކަނުން ބޭނުން ވަނީ މިހާރުގެ ފެޑަރަލް ފަންޑިން ނޮވެމްބަރު މަހުގެ 21 ވަނަ ދުވަހުގެ ނިޔަލަށް އިތުރު ކުރުމަށެވެ. ނަމަވެސް، ޑިމޮކްރަޓުން ވަނީ ޞިއްޙީ ދާއިރާގެ ސަބްސިޑީތައް އިތުރު ކުރުމާއި، މެޑިކެއިޑް ފަދަ ޕްރޮގްރާމް ތަކުން އުނިކޮށްފައިވާ ބައި އަލުން އަނބުރާ ގެނައުމަށެވެ.

ހައުސް މައިނޯރިޓީ ލީޑަރު ހަކީމް ޖެފްރީސް އާއި، ސެނެޓުގެ މައިނޯރިޓީ ލީޑަރު ޗަކް ޝޫމާ ވިދާޅުވެފައި ވަނީ، ޓްރަމްޕްގެ "ބިގް ބިއުޓިފުލް ބިލު" އިން ގެއްލުން ލިބެމުންދާ އެމެރިކާގެ ރައްޔިތުންނަށް އެހީތެރިވުމަށް މަސައްކަތް ކުރަމުން އަންނަ ކަމަށެވެ. ޖެފްރީސް ވިދާޅުވެފައި ވަނީ، ރިޕަބްލިކަނުން ހުށަހަޅާފައިވާ ޞިއްހީ ދާއިރާގެ އަސާސީ ޚިދުމަތްތައް ހަނި ކުރުމުގެ ޕްލޭން ޤަބޫލު ކުރުމަކީ އެމީހުންަށް ކުރެވޭނެ ކަމެއް ނޫން ކަމަށެވެ.

މީގެ އިތުރުން ޝޫމާ ވިދާޅުވީ، ޓްރަމްޕް އާއި ރިޕަބްލިކަން އިން ދެ ޕާޓީގެ ޚިޔާލު ޤަބޫލު ކުރާ ނަަމަ، ސަރުކާރު ހުއްޓުމުގެ ޙާލަތުން ސަލާމަތް ވާނެ ކަމަށެވެ. އެގޮތުން ޞިއްޙީ ދާއިރާ އާއި، ބައެއް އެހެން ކަންކަމުގައި ޑިމޮކްރަޓޫން އެދޭ ބައެއް ކަންކަން، ޚާއްސަކޮށް އެމެރިކާގެ ރައްޔިތުން ބޭނުންވާ ކަންކަން ޤަބޫލު ކުރައްވާ ނަމަ، ސަރުކާރު ހުއްޓާލުމުގެ ޙާލަތުން ސަލާމަތް ވެވޭނެ ކަަމަށް ވެސް އޭނާ ވިދާޅުވެފައިވެ އެވެ. އެހެން ނަމަވެސް، އަދި ވެސް ގިނަ ޚިޔާލު ތަފާތުވުންތައް އޮތް ކަމަށް އޭނާ ފާހަގަ ކުރެއްވި އެވެ.

އެމެރިކާގެ ސަރުކާރުގެ ހިންގުން ހުއްޓުމަކަށް އައިސްފި ނަމަ، މިވަގުތު މުވައްޒަފުންނަށް މުސާރަ ނުދެވޭނެ އެވެ. އެހެން ނަމަވެސް، އެކަން ހައްލުވުމާ އެކު ފަހުން އެ މުސާރަ ލިބޭނެ އެވެ. އަދި ކޮންމެެހެން މުހިންމު މުވައްޒަފުން ނޫން އެހެން މުވައްޒަފުން، ވަގުތީ ގޮތުން ވަޒީފާ އިން ދުރު ކުރެވޭނެ އެވެ.

ބައިޕާޓިސަން ޕޮލިސީ ސެންޓަރުގެ މައުލޫމާތު ތަކަށް ބަލާއިރު، 1980 ވަނަ އަހަރުން ފެށިގެން 14 ފަހަރެއްގެ މަތިން ސަރުކާރުގެ ހިންގުން ހުއްޓިފައިވެ އެވެ. އޭގެ ތެރެއިން ގިނަ ފަހަރު ސަރުކާރު ހުއްޓުމަކަށް އައިސްފައި ވަނީ ވަރަށް މަދު ދުވަސް ކޮޅަކަށެވެ.

އެމެރިކާގެ ތާރީޚުގައި އެންމެ ދިގު މުއްދަތަކަށް ސަރުކާރު ހުއްޓުމަކަަށް އައިސްފައި ވަނީ، 2018 ވަނަ އަހަރުގެ ފަހު ކޮޅާއި، 2019 ވަނަ އަހަރުގެ ކުރީ ކޮޅު އެވެ. އެއީ ގާތް ގަނޑަކަށް 34 ދުވަހުގެ މުއްދަތަކަށެވެ.