މަޖިލިސް އިންތިހާބަށް ހަތަރު ދުވަސް އޮއްވާ ޕީއެންސީ ކެމްޕޭނަށް ފެނަކައިން 12 މިލިއަން ރުފިޔާ ދޫކުރި

2024 ވަނަ އަހަރު ބޭއްވި ރައްޔިތުންގެ މަޖިލީހުގެ އިންތިހާބަށް އެންމެ ހަަތަރު ދުވަހަށް ވެފައި ވަނިކޮށް ޕީއެންސީ ކެމްޕޭނަށް ފެނަކަ ކޯޕަރޭޝަނުން 12 މިލިއަން ރުފިޔާ ދޫކޮށް އެ ފައިސާ އެކި މީހުންގެ އެކައުންޓްތަކަށް ދައުރުކޮށްފައިވާކަން ހާމަވެއްޖެ އެވެ.

އެމްއެމްއޭގެ އެތެރިން ލީކުވެފައިވާ ފައިނޭންޝަލް އިންޓެލިޖެންސް ޔުނިޓް (އެފްއައިޔޫ) ރިޕޯޓުން ފެންނަނީ ޖެނުއަރީ 1، 2023 އިން ފެށިގެން ސެޕްޓެމްބަރު 30، 2024 ގެ ނިޔަލަށް ކޮށްފައިވާ މުއާމަލާތްތަކެވެ. މި ރިޕޯޓު ތައްޔާރު ކޮށްފައިވަނީ ފެނަކަ އާއި ކެންގޯ ޕްރައިވެޓް ލިމިޓެޑް ނަމަކަށް ކިޔާ ކުންފުންޏަކާ ދެމެދު ހިންގި މުއާމަލާތްތަކަށެވެ.

ސޯޝަލް މީޑިއާގެ އެކި ޕްލެޓްފޯމް ތަކުގައި މިހާރު ދައުރުވަމުންދާ މި ރިޕޯޓަކީ ސައްހަ ރިޕޯޓެއްކަން ވަނީ އެނގިފައެވެ.

ކެންގޯ ޕްރައިވެޓް ލިމިޓެޑް އަކީ ކާކުގެ ކުންފުންޏެއް، ކެންގޯގެ އެކައުންޓަށް ފެނަކައިން ޖަމާކުރީ ކިހާވަރެއް؟

ކެންގޯ ޕްރައިވެޓް ލިމިޓެޑަކީ އައިމިނިތު ސަނިއްޔާ ޝަރީފްގެ 50 ޕަސެންޓް ހިއްސާ އާއި ސަލާހު ޝަރީފްގެ 25 ޕަސެންޓު ހިއްސާ އަދި އަހްމަދު ހާޝިމްގެ 25 ޕަސެންޓު ހިއްސާ އޮންނަ ކުންފުންޏެކެވެ. ކެންގޯ ނަމަކަށް ކިޔާ މި ކުންފުންޏަށް 2023 އިިން ފެށިގެން ސެޕްޓެމްބަރު 2024ގެ ނިޔަލަށް ފެނަކައިން 47 ޓްރާންސެކްޝަނެއްގެ ދަށުން ކެންގޯއަށް 37 މިލިއަން ރުފިޔާ ދޫކޮށްފައިވެ އެވެ.

އޭގެ އިތުރުން ކެންގޯއަށް 150،000ރ. ގެ މަގުން ފަސް ޓްރާންސެކްޝަނެއް ހަދައި ޖުމުލަ 750،000 ރުފިޔާ ޑީ އެންޑް ވީ އިންވެސްޓްމަންޓް ނަމަކަށް ކިޔާ ކުންފުންޏަކުން ފޮނުވާފައިވެ އެވެ. އެ ރިޕޯޓުން ހާމަވާގޮތުގައި ކެންގޯ އާއި ޑީ އެންޑް ވީ އިންވެސްޓްމަންޓް އާދެމެދު މި މުއާމަލާތް ހިންގާފައިވަނީ އެޕްރީލް 16 އަދި 17 ވަނަ ދުވަހު އެވެ.

ރާއްޖެ އެމްވީ އިން ބެލި ބެލުމުން އިކޮނޮމިކް މިނިސްޓްރީގެ ބިޒްނަސް ޕޯޓަލްގައި އެއްވެސް ވިޔަފާރީގެ މަސައްކަތެއް ހިންގާ ކަމަށް ކެންގޯއިން ރެޖިސްޓްރީ ކޮށްފައި ނުވެ އެވެ. މާނަ އަކީ އެއްވެސް ފައިސާއެއް ލިބޭނެ ވިޔަފާރިއެއް އެ ކުންފުނިން ރަޖިސްޓްރީ ކޮށްފައެއް ނުވެ އެވެ.

އެފައިޔޫ ރިޕޯޓު ބުނާގޮތުން ކެންގޯއަށް ދޫކުރި އެއްވެސް ފައިސާއަކުން އިގުތިސޯދީ ހަރަކާތެއް ހިންގާފައެއް ނުވެ އެވެ. އަދި ފައިސާ ލިބުނު މީހުންގެ ތެރޭގައި ސަރުކާރާ ގާތް ގުޅުން އޮތް މީހުން ހިމެނޭ ކަމަށް އެފްއައިޔޫގެ ރިޕޯޓުން އެނގެ އެވެ.

ޑީ އެންޑް ވީ އިންވެސްޓްމަންޓް ޕްރައިވެޓް ލިމިޓެޑް އަށް ފެނަކައިން ފައިސާ ފޮނުވި

ޑީ އެންޑް ވީ އިންވެސްޓްމަންޓް އަކީ މަޖިލީހުގެ ކޮލަމާފުށި ދާއިރާގެ މެންބަރު އިބްރާހީމް ދީދީ އާއި އޭނާގެ އަނބިކަނބަލުން އިހުސާނާ ޝަރީފުގެ ހިއްސާ އޮންނަ ކުންފުންޏެކެވެ.

ޑީ އެންޑް ވީ އިންވެސްޓްމެންޓް ޕްރައިވެޓް ލިމިޓެޑަށް އެޕްރީލް 16، 2024 ގައި ދެ ޓްރާންސެކްޝަނެއް މެދުވެރިކޮށް 9،804،240ރ. ފޮނުވައި، އެ ފައިސާގެ ތެރެއިން ބައެއް ކެންގޯއަށް ފޮނުވާފައިވާކަން އެ ރިޕޯޓުން ހާމަވެ އެވެ. އަދި ކުރިން ފާހަގަ ކުރިގޮތައް ޑީ އެންޑް ވީ އިންވެސްޓްމަންޓް އިން ކެންގޯއަށް 150،000ރ. ގެ މަގުން ފަސް ޓްރާންސެކްޝަނެއް ހަދައި ޖުމުލަ 750،000ރ. ފޮނުވާފައިވެ އެވެ.

ފެނަކައިން ޑީ އެންޑް ވީ އިންވެސްޓްމަންޓް ޕްރައިވެޓް ލިމިޓެޑް އަށް 16 އޭޕްރީލް 2024 ގައި ދެ މުއާމަލާތަކުން ފޮނުވި ފައިސާ ވެސް ކެންގޯ ކުންފުންޏަށް އެއްކޮށް ބަދަލުކޮށްފައިވާކަން ވެސް ވަނީ އެނގިފަ އެވެ. އަދި އެ ފައިސާ އަނެއްކާ ކެންގޯއިން އެކިއެކި ފަރުދުންނަށް ވަނީ ފޮނުވާފަ އެވެ.

ފެނަކައިގެ އެމްޑީ ކަމުގައި މުއާޒް ހުންނެވި އިރު ތުހުމަތު ކުރެވުނު ބައެއް ކަންކަން

ފެނަކަ ކޯޕަރޭޝަނަށް ގެއްލުންވާ ގޮތަށް ޔުނައިޓެޑް އަރަބް އެމިރެޓްސް (ޔޫއޭއީ) ގެ އަލްފާ އެނާޖީ ސޮލިއުޝަންސް އެފްޒެޑް-އެލްއެލްސީއާ ގުޅިގެން 66 މިލިއަން ރުފިޔާއަށް ކޭބަލްތަކެއް ގަތްކަމުގެ ތުހުމަތުތަކެއް ފެނަކައަށް ވަނީ އަމާޒު ވެފައެވެ.  ކޭބަލްތަކެއް ގަތުމަށް އަލްފާއަށް ޖުމްލަ 18 ޕާޗޭސް އޯޑަރު ހެދި އެވެ. އެ ޕާޗޭސް އޯޑަރުތަކުން އެނގޭ ގޮތުގައި ކޭބަލްތައް ގަތީ އެކި ރަށްރަށަށް ބޭނުންވާ ކަމަށް ބުނެ އެވެ. ނަމަވެސް ކޭބަލްތައް ގަތީ މާކެޓު ރޭޓަށްވުރެ މާ ބޮޑު އަގެއްގަ އެވެ. 

ފެނަކައިގެ އޭރުގެ އެމްޑީ މުއާޒް މުހައްމަދު ރަޝީދު އާއި އެ ކުންފުނީގެ ޑެޕިއުޓީ ޑިރެކްޓަރު އައިޝަތު އައިމަން އަދި ޑިރެކްޓާ އަބްދުލް ވާހިދު މުހައްމަދު އެޕްރޫވް ކޮށްފައިވާ ޕާޗޭސް އޯޑަރުތަކުގެ ޖުމްލަ އަގު ހިސާބު ކޮށްލުމުން 65.7 މިލިއަން ރުފިޔާއަށް އަރާފައިވާކަން ވަނީ ހާމަވެފަ އެވެ.

އޭގެ އިތުރުން މުއާޒް އަށް ކުރާ ކޮރަޕްޝަންގެ ތުހުމަތުތަކުގެ ތެރޭގައި، ގާނޫނާ ޚިލާފު ޕްރޮކިއުމަންޓް އެކުލަވައިލުމާއި، މާލީ ކަންކަން އޮޅުވައިލުމާއި ގާތް މީހުން ވަޒީފާއަށް ނެގުން ފަދަ ކަންކަން ހިމެނެ އެވެ.

އޭރު އެމްޑީ ކަމުގެ މަގާމުގައި ހުންނެވި މުއާޒް އަށް ކޮރަޕްޝާނުގެ ތުހުމަތުތަކެއް އަމާޒުވެފައި ވަނިކޮށް އޭނާ ވަނީ އިސްތިއުފާ ދީފަ އެވެ. އޭނާ އިސްތިއުފާ ދިނީ ފެނަކަ ކޯޕަރޭޝަނަށް ދިމާވެފައިވާ މާލީ ގޮންޖެހުންތަކުން އަރައިގަތުމަށް ކުންފުނިން ތައްޔާރު ކޮށްފައިވާ ޕްލޭން ކަމާ ގުޅުންހުރި އިދާރާތަކާ ހިއްސާ ކުރި ނަމަވެސް، އެ ކަމަށް އެއްވެސް އަލި މަގެއް ނުލިބޭ ކަމަށް ބުނެ އެވެ.

ލީކުވެފައިވާ އެފްއައިޔޫގެ މި ރިޕޯޓުން އިންތިޚާބުތަކާ ދިމާކޮށް ދައުލަތުގެ ކުންފުނިތަކުގެ ނާޖާއިޒު ފައިދާ ނެގުމާއި، އެކި ސަރުކާރުތަކުން ރައްޔިތުންގެ ފައިސާ ނަހަމަ ގޮތުގައި ބޭނުންކުރާ ކަމަށް އޮންނަ ތުހުމަތުތަކަށް ބާރު ލިބެ އެވެ.