ނިއު ޔޯކުގެ މޭޔަރު އެޑަމްސް، އިންތިޚާބުގައި ވާދަ ނުކުރަން ނިންމައިފި

އެމެރިކާގެ ނިއު ޔޯކުގެ މޭޔަރު ކަމުގައި ހުންނެވި އެރިކް އެޑަމްސް، އިންތިޚާބުގައި ވާދަ ނުކުރައްވަން ނިންމަވައިފި އެވެ.

އާދީއްތަ ދުވަހު އެޑަމްސް ވަނީ، އިންތިޚާބުގައި ވާދަ ނުކުރަން ނިންމާފައިވާކަން އިއުލާާން ކޮށްފަ އެވެ. އެއާއެކު، ނިއު ޔޯކުގެ މޭޔަރު ކަމަށް ދެން ވާދަ ކުރައްވާނީ ޒޯރަން މަމްދާނީ އާއި، ނިއު ޔޯކުގެ ކުރީގެ ގަވަރުނަރު އެންޑްރޫ ކުއޯމޯ އެވެ.

ނިއު ޔޯކުގެ މޭޔަރު ހޮވުމަށް ބާއްވާ އިންތިޚާބު އޮންނާނީ މިއަހަރުގެ ނޮވެމްބަރު މަހުގެ ހަތަރު ވަނަ ދުވަހު އެވެ. އެ އިންތިޚާބުގެ ކުރިން ނަގަމުން އަންނަ ރައްޔިތުންގެ ޚިޔާލު ހޯދުމުގެ ސާވޭ ތަކުން ދައްކާ ގޮތުގައި، އިންތިޚާބުގައި މިނިވަން ކެންޑިޑޭޓުންގެ ގޮތުގައި ވާދަ ކުރައްވާ ކުއޯމޯ އާއި މަމްދާނީ އަށް ވުރެ، މޭޔަރު އެޑަމްސް އުޅުއްވަނީ ބޮޑުތަނުން ފަހަތުގަ އެވެ.

ހަމަ އެހެންމެ، ނިއު ޔޯކުގެ މޭޔަރު އިންތިޚާބުގައި މިހާތަނަށް އެންމެ ގިނަ ބައެއްގެ ސަމާލުކަމާއި، ކުރިއެރުން ހޯދާފައި ވަނީ މަމްދާނީ އެވެ. ގިނަ ބަޔަކު މަމްދާނީ އަށް ތާއީދު ކުރަމުން އަންނައިރު، ޑިމޮކްރަޓިކް ޕާޓީ އަށް ނިސްބަތްވާ އެޑަމްސް އަށް ކެމްޕެއިންގައި ގިނަ ގޮންޖެހުން ތަކެއް ވަނީ ދިމާވެފަ އެވެ. މީޑިއާ ތަކުގައި ބުނެފައި ވަނީ، ކެމްޕެއިން އަށް ބޭނުންވާ ފައިސާ ހޯދުމުގައި ވެސް އެޑަމްސް އަށް ދަތިތަކާ ކުރިމަތިވެފައިވާ ކަމަށެވެ.

މޭޔަރު އެޑަމްސް އޭނާގެ ރަސްމީ އެކްސް އެކައުންޓުގައި ކޮށްފައިވާ ޕޯސްޓެއްގައި ވިދާޅުވެފައި ވަނީ، އޭނާ ހާސިލު ކޮށްފައިވާ ގިނަ ކާމިޔާބީ ތަކެއް ހުރި ނަމަވެސް، އަލުން އިންތިޚާބު ވުމަށް ކުރަމުން އައި ކެމްޕެއިން ކުރިއަށް ގެންދެވެން ނެތް ކަމަށެވެ.

އިންތިޚާބުގައި ވާދަ ނުކުރަން އެޑަމްސް ނިންމާފައިވާއިރު، އޭނާ ވިދާޅުވީ އޭނާގެ މޭޔަރު ކަމުގެ ދައުރު ހަމަވަންދެން މަގާމުގައި ދެމި ހުންނާނެ ކަމަށެވެ. އެޑަމްސްގެ ދައުރު ހަމަވާނީ 2026 ވަނަ އަހަރުގެ ޖަނަވަރީ މަހުގެ އެއް ވަނަ ދުވަހު އެވެ. މީގެ އިތުރުން އޭނާ ވިދާޅުވީ، ނިއު ޔޯކް ސިޓީ އަށްޓަކައި މަސައްކަތް ކުރުން ކުރިއަށް ގެންދާނެ ކަމަށެވެ.

އިތުރަށް އެޑަމްސް ވިދާޅުވެފައި ވަނީ، ރައްޔިތުންނަށް ބޭނުންވާ ބޮޑެތި ބަދަލުތައް ގެނައުމަކީ ކޮންމެހެން ވެސް ބޭނުންތެރި ކަމެއް ކަމަށެވެ. އެހެން ނަމަވެސް، އެތައް ޖީލަކަށް ދެމިގެން ދިޔަހެން، އެތައް ޤުރުބާނީއަކާ އެކު ބިނާ ކުރި ނިޒާމު ނައްތާލުމަކީ ޙައްލު ކަމަށް ބުނާ މީހުންނާ މެދު ސަމާލުވުމަށް އޭނާ ވިދާޅުވި އެވެ. އަދި އެއީ ބަދަލެއް ނޫން ކަމަށާއި، އެއީ ހަމަ ނުޖެހުން ކަމަށް ވެސް އެޑަމްސް ވަނީ ވިދާޅުވެފަ އެވެ.