އެމެރިކާގެ ރައީސް ޑޮނަލްޑް ޓްރަމްޕް، ނިއުޔޯކް ސިޓީގެ އިންތިޚާބީ މޭޔަރު ޒޮހްރާން މަމްދާނީއާ ވައިޓް ހައުސްގައި ބައްދަލު ކުރައްވައިފި އެވެ.

މި ބައްދަލުވުމަކީ އަހަރުގެ އެންމެ ބޮޑު ސިޔާސީ ކުރިމަތިލުން ކަމަށް ވާނެ ކަމަށް ކުރިން ސިފަކުރެވިފައި އޮތް ނަމަވެސް، އެއާ ޚިލާފަށް ބައްދަލުވުން ވެގެން ދިޔައީ އެއްބޭފުޅަކު އަނެއް ބޭފުޅަކަށް ތަޢުރީފު ކުރެއްވި ބައްދަލުވުމަކަށެވެ.

ޑިމޮކްރެޓިކް ސޯޝަލިސްޓެއްގެ ގޮތުގައި އަމިއްލަ އަށް ސިފަކުރައްވާ އިންތިޚާބީ މޭޔަރު، އޭނާގެ އިންތިޚާބީ ކާމިޔާބީގެ ތަޤުރީރު ގައި ޓްރަމްޕަކީ "އަނިޔާވެރި ވެރިއެއް" ގެ ގޮތުގައި ސިފަކުރެއްވިއެވެ.

އަދި ހުކުރު ދުވަހުގެ ބައްދަލުވުމުގެ ކުރިން، ރައީސްގެ ތަރުޖަމާނު ވަނީ މަމްދާނީގެ ޒިޔާރަތަކީ "ކޮމިއުނިސްޓެއް ވައިޓް ހައުސް އަށް އައުން" ކަމަށް ވިދާޅުވެފައެވެ.

ނަމަވެސް، އޯވަލް އޮފީހުގައި އެކުގައި ތިއްބަވައިގެން، ދެ ބޭފުޅުން ވެސް ވާހަކަފުޅު ދެއްކެވީ ވަރަށް އެކުވެރި ރާގެއްގައެވެ.

ތަކުރާރުކޮށް، ދެ ބޭފުޅުން ވެސް ވަނީ ނިއުޔޯކް ސިޓީއަށް ދިމާވެފައިވާ ދިރިއުޅުމުގެ ޚަރަދު ބޮޑުވުމުގެ މައްސަލަ ޙައްލުކުރުމުގައި ދެ ފަރާތުގެ ޝައުޤުވެރިކަން ހުރިކަން ފާހަގަ ކުރައްވާފަ އެވެ. ދެ ބޭފުޅުން ގިނަ ފަހަރަށް ހިނިތުންވަމުން ގެންދެވި އިރު، މަމްދާނީ ޓްރަމްޕް އާ ދެކޮޅަށް ދެއްކެވި ސިޔާސީ ވާހަކަތަކާ ބެހޭ ގޮތުން ނޫސްވެރިން ސުވާލު ކުރުމުން ވެސް ޓްރަމްޕް ހުންނެވީ އެކަމާ ހިތްޕުޅުހަމަޖެހިވަޑައިގެންފައިވާ ކަން ފާހަގަ ކުރެވުނެވެ.

ޖެނުއަރީ މަހުގެ 1 ވަނަ ދުވަހު މަމްދާނީ މަޤާމާ ޙަވާލުވެވަޑައިގަތުމަށްފަހު ދެބޭފުޅުންގެ މި ދެއްކެވި ސުލްހަވެރިކަން ދެމި އޮންނާނެތޯ ނުވަތަ ނޫންތޯ އެނގޭނީ އޭރުން ކަމަށް މި ބައްދަލުވުން ކަވަރު ކުރި ނޫސްވެރިން ބުނެފައި ވެއެވެ.

އެކަމަށް އިޝާރާތް ކުރައްވާ ޓްރަމްޕް ވިދާޅުވީ، އެހިސާބަށް ދާންދެން އޭނާ ހުންނަވާނީ މަމްދާނީ އަށް ހިތްވަރު ދެއްވުމުގައި ކަމަށެވެ.

ނޫސްވެރިންނާ ވާހަކަ ދައްކަވަން ފެއްޓެވި ހިސާބުން ފެށިގެން ދެ ބޭފުޅުންގެ ދެމެދުގައި އޮތް ގާތްކަން ވަރަށް ރަނގަޅަށް ފެނިގެން ދިޔައެވެ.

ދެ ބޭފުޅުން ވަކިން ބޭއްވި ބައްދަލުވުމަކަށް ފަހު މީޑިއާ އާ ކުރިމަތިލެއްވި އިރު، ރައީސް އިންނެވީ އާދައިގެ މަތިން ރަސްމީ މޭޒު ކޮޅުގެ ކައިރީގައެވެ. އަރިހުގައި، މަމްދާނީ ހުންނެވީ ޓްރަމްޕްގެ ކަނާތްފަރާތުގައެވެ.

ޓްރަމްޕް، މަމްދާނީ އަށް ފާޑުވިދާޅުވުމުން ދުރުހެލިވެވަޑައިގަތުމުގެ އިތުރުން، އެތައް ފަހަރަކު އޭނާ އަށް ތަޢުރީފު ވެސް ކުރެއްވިއެވެ.

ޓްރަމްޕް ވިދާޅުވީ މަމްދާނީ އަކީ "ހަމަ އަސްލު ވެސް ވަރަށް މޮޅު މޭޔަރަކަށް" ވެވަޑައިގަންނަވާނެ ކަމުގެ އުންމީދު ކުރައްވާ ކަމަށެވެ.

ރައީސް އިތުރަށް ވިދާޅުވީ "ވަރަށް ރަނގަޅު މަސައްކަތެއް އޭނާ އަށް ކުރެއްވިދާނެ ކަމުގެ ޔަޤީންކަން އެބައޮތް،" ކަމަށެވެ.

މޭޔަރުގެ އިންތިޚާބުގެ ކެމްޕޭން ތެރޭގައި މަމްދާނީ އާއި ޓްރަމްޕް ވަނީ ސިޔާސީ ގޮތުން އެކަކު އަނެކަކަށް ބަހުގެ ހަމަލާތައް ބަދަލުކުރައްވާފަ އެވެ. ހުކުރު ދުވަހު އެ ބައްދަލުވުމުގައި ހުރި ނޫސްވެރިއަކު، ޓްރަމްޕް މަމްދާނީ އަށް "ކޮމިއުނިސްޓެއް" ކަމަށް ވިދާޅުވެފައިވާކަމަށާއި، އަދި މަމްދާނީ ރައީސަށް "އަނިޔާވެރި ވެރިއެއް" ކަމަށް ވިދާޅުވެފައިވާ ކަން ދެ ބޭފުޅުންނަށް ހަނދާން ކޮށްދެއްވި އެވެ.

ދެ ބޭފުޅުން ވެސް ވަނީ އެ ދެބޭފުޅުންގެ ބަހުގެ ހަމަލާތަކާ ގުޅޭގޮތުން ކުރެވުނު މިފަދަ އެތައް ސުވާލަކަށް ޖަވާބު ދިނުމުން އެއްކިބާވެ، އެ ވާހަކަ ދޫކޮށް ތަޢުރީފުކުރުމާ ދިމާލަށް މިސްރާބު ބަދަލުކުރައްވާފައެވެ.

މަމްދާނީ ގެ ސިޔާސަތުތަކަށް ޓްރަމްޕް ފާޑުވިދާޅުވުމުގެ ރޫހެއްގައި ނޫސްވެރިންނާ ވާހަކަ ދައްކަވަމުން ވިދާޅުވިހާ ވެސް އެއްޗަކީ "އޭނާގެ ބައެއް ޚިޔާލުތައް ކުޑަކޮށް ތަފާތު." ކަމުގަ އެވެ.

އެންމެ ބޮޑަށް ފާހަގަ ކޮށްލެވުނީ، ނިއުޔޯކުގައި ހުންނަ ޓްރަމްޕްގެ އެންމެ އިސް އެއް ސިޔާސީ ބައިވެރިޔަކު މަމްދާނީ އާ ދެކޮޅަށް ދެއްކި ވާހަކައަކާ ގުޅުވައިގެން ނޫސްވެރިއަކު ސުވާލެއް ކުރުމުން ޓްރަމްޕް އެއާ ވެސް ދެކޮޅަށް ވާހަކަ ދެއްކެވުމެވެ.

ނިއުޔޯކް ސްޓޭޓްގެ ގަވަރުނަރު ކަމަށް ވާދަ ކުރަމުން އަންނަ ރިޕަބްލިކަން ކޮންގްރެސްވުމަން އެލީސް ސްޓެފެނިކް ގެ ފާޑު ކިޔުމެއް ނަކަލު ކުރަމުން، "ތި ހުންނެވީ އޯވަލް އޮފީހުގައި 'ޖިހާދީއެއް' ގެ ކައިރީގައި ކަމަށް މިވަގުތު ޤަބޫލުކުރައްވަންތޯ؟" ނޫސްވެރިއަކު ސުވާލުކުރުމުން، "ނޫން، އަޅުގަނޑު އެހެން ޤަބޫލެއް ނުކުރަން،" ކަމަށް ވިދާޅުވެ ޓްރަމްޕް އަވަސް އަވަހަށް ޖަވާބު ދެއްވިއެވެ.

"ބައެއް ފަހަރު ކެމްޕޭންތަކުގެ ތެރޭގައި އެކަހަލަ ވާހަކަތައް ދައްކާނެ،" ކަމަށް ވެސް ޓްރަމްޕް އިތުރަށް ވިދާޅުވި އެވެ.