އެމެރިކާގެ ރިޔާސީ އިންތިޚާބުގައި 2028 ވަަނަ އަހަރު ވާދަ ކުރެއްވުމަކީ، މިވަގުތު އޭނާގެ އަމާޒެއް ނޫން ކަމަށް، އެމެރިކާގެ ކުރީގެ ނައިބު ރައީސް ކަމަލާ ހެރިސް ވިދާޅުވެއްޖެ އެވެ.

ކަމަލާ މިހެން ވިދާޅުވެފައި ވަނީ އެމްއެސްއެންބީސީގެ ރޭޗަލް މެޑޯއާ އެކު ކުރިއަށް ގެންދިޔަ އިންޓަވިޔުގަ އެވެ. އެ އިންޓަވިޔުގައި ކަމަލާއާ ސުވާލު ކޮށްފައި ވަނީ، އަނެއްކާ އަލުން 2028 ގެ ރިޔާސީ އިންތިޚާބުގައި ވާދަ ކުރައްވަންތޯ އެވެ. އެ ސުވާލަށް ޖަވާބު ދެއްވަމުން ކަމަލާ ވިދާޅުވެފައި ވަނީ، އެއީ މިވަގުތު އެއްވެސް ގޮތަކަށް އޭނާގެ އަމާޒެއް ނޫން ކަމަށެވެ.

މިއަހަރުގެ ޖުލައި މަހު ކަމަލާ ވަނީ ކެލިފޯނިއާގެ ގަވަރުނަރު ކަމަށް އޭނާ ކުރިމަތި ނުލައްވާނެ ކަމަށް އިއުލާން ކޮށްފަ އެވެ. ކަމަލާ އެކަން އިއުލާން ކުރެއްވުމުގެ ކުރިން، ބައެއް މީޑިއާ ތަކުގައި ވަނީ ކެލިފޯނިއާގެ ގަވަރުނަރު ކަމަށް ކަމަލާ ވާދަ ކުރައްވަން ޝައުޤުވެރިކަން ގެންގުޅުއްވާ ކަމަށް ބުނެފަ އެވެ.

ކަމަލާ ވިދާޅުވީ މިވަގުތު އޭނާގެ ލީޑާޝިޕް އަދި ޚިދުމަތް ކުރުން އިންތިޚާބީ މަގާމަކުން ނުފެންނާނެ ކަމަށެވެ. އެހެން ނަމަވެސް، އެމެރިކާގެ އެކި ކަންކޮޅު ތަކުގައި ހިތްވަރާ އެކު މަސައްކަތް ކުރާނެ ޑިމޮކްރަޓިކް ކެންޑިޑޭޓުން އިންތިޚާބު ކުރުމަށް އޭނާ އެހީތެރިވާނެ ކަމަށާއި، އެކަމަށް މަސައްކަތް ވެސް ކުރައްވާނެ ކަމަށް ކަމަލާ ވިދާޅުވި އެވެ.

ކަމަލާ އެހެން ވިދާޅުވުމާ އެކު، އަނެއްކާ ވެސް ވަނީ އޭނާ އަށް އިތުރު ސުވާލެއް އަމާޒު ކުރައްވައިފަ އެވެ. އެގޮތުން އެއީ ކެލިފޯނިއާގެ ގަވަރުނަރު ކަމަށް ކުރިމަތި ނުލައްވަން ވިދާޅުވި ވާހަކައެއްތޯ، ނުވަތަ އެއްވެސް އިންތިޚާބެއްގައި ވާދަ ނުކުރައްވަން ކުރި އިއުލާނެއްތޯ ވަނީ ސުވާލު ކޮށްފަ އެވެ.

އެއާއެކު ކަމަލާ ވިދާޅުވީ އެއީ އޭނާގެ ކުރިމަތީގައި އޮތް ކަމެއް ކަމަށާއި، އޭނާ ނިންމެވީ ކެލިފޯނިއާގެ ގަވަރުނަރު ކަމަށް ކުރިމަތި ނުލައްވަން ކަމަށެވެ. އެ އިންޓަވިޔުގައި ކަމަލާ ވިދާޅުވެފައި ވަނީ، 2028 ވަނަ އަހަރުގެ ރިޔާސީ އިންތިޚާބުގައި ވާދަ ކުރެއްވުމަށް ޑިމޮކްރަޓިކް ޕާޓީގެ ޓިކެޓަށް ވަރަށް ގިނަ ރަނގަޅު ކެންޑިޑޭޓުން ވާދަ ކުރައްވާނެ ކަމަށެވެ.

ކަމަލާ އަކީ އެމެރިކާގެ ތާރީޚުގައި ނައިބު ރައީސްކަން ކުރެއްވި ފުރަތަމަ އަންހެން ބޭފުޅާ އެވެ. ކުރީގެ ރައީސް ޖޯ ބައިޑަންގެ ނައިބު ރައީސް އަކަށް ހުންނަވައި، 2024 ވަނަ އަހަރުގެ ރިޔާސީ އިންތިޚާބުގައި ވެސް ކަމަލާ ވާދަ ކުރެއްވި އެވެ. ނަަމަވެސް އިންތިޚާބުގައި ވަނީ، މިހާރުގެ ރައީސް ޑޮނަލްޑް ޓްރަމްޕްއާ ވާދަ ކުރައްވައި ނާކާމިޔާބުވެ ވަޑައިގެންފަ އެވެ.

އެމެރިކާގެ ސިޔާސީ މަޝްރަހު ދިރާސާ ކުރައްވާ ފަރާތްތަކުން ފާހަގަ ކޮށްފައިވާ ގޮތުގައި، 2028 ވަނަ އަހަރުގެ ރިޔާސީ އިންތިޚާބުގައި ޑިމޮކްރަޓިކް ޕާޓީގެ ފަރާތުން ވާދަކުރެއްވުމުގެ ޝައުޤުވެރިކަން ކަމަލާ ގެންގުޅުއްވަ އެވެ. ނަމަވެސް، މިވަގުތު އެކަމާ ގުޅޭ ގޮތުން ކަމަލާ ވާހަކަ ދައްކަވަން ބޭނުންފުޅު ނުވަނީ ކަމަށް ވެސް ބުނެފައިވެ އެވެ.