ފެނަކައިގެ ކުރީގެ އެމްޑީ ސައީދު 4 އަހަރަށް ޖަލަށް ލާން ހުކުމް ކޮށްފި
ފެނަކައިގެ ކުރީގެ އެމްޑީ އަހުމަދު ސައީދުގެ މައްޗަށް ރަސްމީ ހައިސިއްޔަތު ނަހަމަ ގޮތުގައި ބޭނުންކުރި ކުށް ސާބިތުވާ ކަމަށް ކޯޓުން ކަނޑައެޅި
ފެނަކަ ކޯޕަރޭޝަންގެ މެނޭޖިން ޑިރެކްޓަރު ކަމުގައި މީގެ ކުރިން ހުންނެވި ސައީދު
ފެނަކައިގެ ކުރީގެ މެނޭޖިން ޑިރެކްޓަރު އަހުމަދު ސައީދުގެ މައްޗަށް ރަސްމީ ހައިސިއްޔަތު ނަހަމަ ގޮތުގައި ހިފުމުގެ ކުށް ސާބިތުވާ ކަމަށް އާދިއްތަ ދުވަހު މެންދުރު ފަހު ކްރިމިނަލް ކޯޓުން ހުކުމް ކޮށްފި އެވެ.
ކުށް ސާބިތުވުމާ ގުޅިގެން ގާޒީ ވަނީ ސައީދު 4 އަހަރުގެ ޖަލު ހުކުމެއް އިއްވާފައެވެ. އެހެން ނަމަވެސް ދައުލަތުން އެދުނީ 1 އަހަރާ 7 މަހުގެ ހުކުމެއް އިއްވައިދިނުމަށެވެ.
މި ދައުވާ އަކީ ބްލޭޒަން އިންކް ކިޔާ ކުންފުންޏަކުން އެއްވެސް މަސައްކަތެއް ނުކުރަނީސް ސެޓްލްމަންޓް އެއްބަސްވުމެއް ހަދައި ފައިސާ ދޫކުރި ކަމަށް ބުނެ ދައުލަތުން ކޮށްފައިވާ ދައުވާ އެކެވެ.
ސައީދުގެ މައްޗަށް ދައުވާ ކޮށްފައިވަނީ، ގާނޫނު ނަންބަރު 9/2014 (ދިވެހި ރާއްޖޭގެ ގާނޫނުލް އުގޫބާތު) ގެ 513 ވަަނަ މާއްދާގެ (ށ) އާ ހަވާލާދީ އެ މާއްދާގެ (ނ) ގެ ދަށުން ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ކުށުގެ މައްޗަށެވެ.
ސެޓްލްމަންޓް ހެދި އެއްބަސްވުމަކީ ސައީދު މަގާމާ ހަވާލު ވުމުގެ ކުރިން، ޖެނުއަރީ 30، 2018 ގައި ހެދި އެއްބަސްވުމެކެވެ. އެއްބަސްވުމުގެ މަގްސަދެއް ކަމަށް ވަނީ ފެނަކައިގެ އިމޭޖު ރީތިކޮށް، ޕަބްލިކް ރިލޭޝަންސް މަސައްކަތް ކުރުމެވެ.
އެ އެއްބަސްވުމުގެ އަގަކީ 1.3 މިލިއަން ރުފިޔާ އެވެ.
އެންޓި ކޮރަޕްޝަން ކޮމިޝަން (އޭސީސީ) އިން ހިންގި ތަހުގީގެއްގެ މައްޗަށް ކުރި އަށް ގެންދިޔަ މި ޝަރީއަތުގައި، ސައީދު ކުރި ކުށެއް ކަމަށް ފާހަގަ ކޮށްފައިވަނީ، 2019 ވަނަ އަހަރުގެ އޭޕްރީލް 25 ގައި ސެޓްލްމަންޓް އެއްބަސްވުމެއް ހަދައި، ބަދަލުގެ ގޮތުގައި 848،000ރ. އެ ކުންފުންޏަށް ދިނުމެވެ.
ސައީދުގެ އިތުރުން މި މައްސަލައިގައި އެ ކުންފުނީގެ އޭރުގެ ޕްރޮކިއުމަންޓް ހެޑް، މަރިޔަމް ދީނާގެ މައްޗަށް ވެސް ދައުލަތުން ދައުވާ އުފުލާފައިވެއެވެ.
ސައީދުގެ މައްޗަށް ކުރިއަށް ދިޔަ ޝަރީއަތުގައި ދައުލަތުގެ ފަރާތުން ޕްރޮސެކިއުޓަރ ޖެނެރަލް އޮފީހުގެ ވަކީލުން ބުނެފައި ވަނީ، މި އެއްބަސްވުން އެކުލަވާލަން ނިންމީ، އެއްބަސްވުމާ އެއް ގޮތަށް ބްލޭޒަން އިން ކުރި އެއްވެސް މަސައްކަތެއް ފެންނަ ލިޔުމެއް ނޫނީ ބާރުދޭ އެހެން އެއްވެސް ހެއްކެއް ނެތި ކަމަށެވެ.
ސެޓްލްމަންޓް އެއްބަސްވުމަކާއި ރިޓެއިނާ އެއްބަސްވުމަކަށް ދާން ޖެހުނު ސަބަބު ސާފުކޮށްދެމުން ކޯޓުގައި ސައީދު ބުނެފައި ވަނީ، އެއްބަސްވުންތަކުގައި ސޮއިކޮށްފައި ވާނީ ގާނޫނީ ލަފާގެ މަތިން ކަމަށާއި، ބްލޭޒަން އަށް އެއްބަސްވުމާ އެއްގޮތަށް އަމަލު ނުކުރެވުނީ ފެނަކަ އިން ދޭން ޖެހޭ އެއްބާރުލުން ނުދީގެން ކަމަށް ގަބޫލުކުރެވޭތީ ކަމަށެވެ. އަދި އެއްބަސްވުން އުވާލައިގެން ބްލޭޒަން އިން ކޯޓަށް ގޮސްފި ހާލަތެއްގައި އެ ކުންފުންޏަށް ބޮޑު ބަދަލެއް ދޭން ޖެހިދާނެތީ، ފެނަކަ އަށް ލިބިދާނެ ބޮޑު ގެއްލުމަކުން ސަލާމަތް ކުރުމަށް ކަމަށެވެ.
މި މައްސަލައިގައި ސައީދު ވަނީ ދިފާއި ހެކިންގެ ގޮތުގައި އޭނާ އަށް ގާނޫނީ ލަފާ ދިން ފެނަކައިގެ އޭރުގެ ލީގަލް ހެޑު އަހުމަދު އާރިފާއި އެ ޑިޕާޓުމަންޓުގައި މަސައްކަތް ކުރި އަމްޖަދު އަހުމަދު ހުށަހަޅާފަ އެވެ. މި ދެ މީހުން ވެސް ވަނީ އެ ގޮތަށް ލަފާ ދިން ކަމަށް ކޯޓުގައި ބުނެފަ އެވެ.
އެހެން ނަމަވެސް ގާޒީ ވަނީ މި މީހުންގެ ހެކިބަހާއި ތަހުގީގު ބަޔާންތަކާއި ކޯޓުގައި ދެއްކި ވާހަކަތަކުގައި ފުށުއެރުންތަކެއް ހުރި ކަމަށާއި ބްލޭޒަންއިން މަސައްކަތް ކުރިކަން ކަށަވަރު ކުރުމަކީ ސައީދުގެ ޒިންމާ އެއް ކަމަށް ގާޒީ ވިދާޅުވި އެވެ.
ވަރަށް ހަލުއި ސްޕީޑުގައި މި މައްސަލައިގެ ޝަރީއަތް ކުރިމިނަލް ކޯޓުގައި ކުރި އަށް ގެންދަމުން ދަނިކޮށް މިދިޔަ ހުކުރު ދުވަހު ފެނަކައިގެ ޚާއްސަ އޮޑިޓެއް ހަދައި ރިޕޯޓެއް ވަނީ އޮޑިޓަރ ޖެނެރަލްގެ އޮފީހުން ނެރެފައެވެ. އެ ރިޕޯޓުގައި ވެސް އެ ކުންފުނީގެ ފައިސާ އާއި ޚިދުމަތް ހޯދުމާ ގުޅޭ ގިނަ މައްސަލަ ތަކެއް ވަނީ ފާހަގަ ކޮށްފައެވެ.
އޮޑިޓް ރިޕޯޓާ ގުޅިގެން އާދިއްތަ ވިލޭރޭ ސައީދު ސޯޝަލް މީޑިއާ މެދުވެރިކޮށް އާންމު ކުރި ބަޔާނެއްގައި ބުނެފައިވަނީ، ފެނަކައިގެ މެނޭޖިންގ ޑިރެކްޓަރުގެ މަޤާމާއި އޭނާ ހަވާލުވި ދުވަހުން ފެށިގެން 17 ނޮވެމްބަރ 2023 ގެ ނިޔަލަށް، ފެނަކަ ކޯޕަރޭޝަން ލިމިޓެޑުގެ ބޭނުމަށް ކުރެވިފައިވާ އެންމެހައި ޕްރޮކިއުމަންޓް މުޢާމަލާތްތައް ކުރިއަށް ގެންގޮސްފައި ވާނީ، ކުންފުނީގެ އެތެރޭގައި ހެދިފައިވާ އެންމެހައި އުސޫލުތަކާއި ޤަވާއިދުތަކުގެ ތެރެއިން، ކުންފުނީގެ ބޯޑުން އެކަށައަޅުއްވާފައިވާ އިދާރީ އޮނިގަނޑުގެ ތެރެއިން ކަމަށެވެ. އަދި އެ ގޮތާއި ޚިލާފަށް އެއްވެސް ބަޔަކަށް މުދަލެއް، ޚިދުމަތެއް، ކޮންޓްރެކްޓެއް އަދި ޕްރޮޖެކްޓެއްވިޔަސް ދީފައި ނުވާނެ ކަމުގެ ފުރިހަމަ ޔަޤީންކަން ދޭ ކަމަށެވެ.
