ރަނިންމޭޓަކަށް ވޯލްޒް އަކީ ކަމަލާގެ ފުރަތަމަ ޗޮއިސްއެއް ނޫން!

މިދިޔަ އަހަރު އޮތް އެމެރިކާގެ ރިޔާސީ އިންތިޚާބުގައި ޑިމޮކްރަޓްސް ޕާޓީ އިން ވާދަ ކުރެއްވި އޭރުގެ ނައިބު ރައީސް ކަމަަލާ ހެރިސްގެ، ރަނިންމޭޓަށް ހަމަޖެއްސި ޓިމް ވޯލްޒް އަކީ ފުރަތަމަ ޗޮއިސް ނޫން ކަމަށް ވިދާޅުވެއްޖެ އެވެ.

އިންތިޚާބުގެ ކެމްޕެއިންގެ ތަޖުރިބާތައް ހިއްސާ ކުރައްވައި ކަމަލާ ލިޔުއްވާފައިވާ "107 ދުވަސް" ފޮތުގައި ބުނެފައި ވަނީ، ރަނިންމޭޓަށް ހަމަޖެއްސި ވޯލްޒް އަކީ އޭނާގެ ފުރަތަމަ ޗޮއިސް ނޫން ކަމަށެވެ.

އެގޮތުން ކަމަލާ ވިދާޅުވެފައި ވަނީ، އޭނާގެ ފުރަތަމަ ޗޮއިސް އަކީ ޕީޓް ބުޓިޖިޖަކީ ކަމަށެވެ. ބުޓިޖިޖަކީ އަކީ އެމެރިކާގެ ރައީސް ކަމުގައި ޖޯ ބައިޑެން ހުންނެވިއިރު، އެ ދައުރުގެ ޓްރާންސްޕޯޓޭޝަން ސެކްރެޓަރީގެ މަގާމުގައި ހުންނެވި ފަރާތެވެ.

ރިޔާސީ ރޭހުން ވަކިވެ ވަޑައިގަންނަވަން ބައިޑެން ނިންމެވުމުން، އިންތިޚާބުގައި ވާދަކުރެއްވުމުގެ ފުރުސަތު ލިބުނީ ކަމަލާ އަށެވެ. އެއާއެކު، ކަމަލާ އޭނާގެ ރަނިންމޭޓަށް ހަމަޖައްސަން ފުރަތަމަ ބޭނުންފުޅުވީ ބުޓިޖިޖަކީ އެވެ. އޭނާ އަށް ނިސްބަތް ކުރައްވާ ކަމަލާ ވިދާޅުވީ އެއީ "ވަރަށް އައިޑިއަލް" ރަނިންމޭޓެއް ކަމަށެވެ. އެހެން ނަމަވެސް، އޭނާ އަކީ ދޮން ނަސްލުގެ މީހެއް ކަމަށް ކަމަލާ ވިދާޅުވި އެވެ.

ކަމަލާ ވިދާޅުވެފައި ވަނީ، އެމެރިކާގެ ރައްޔިތުންގެ ކިބައިން ވަރަށް ގިނަ ކަންތައްތަކަށް އެދެމުން ދިޔަ ކަމަށެވެ. އެގޮތުން ޔަހޫދީ ނަސްލަށް ނިސްބަތްވާ ދޮން ނަސްލުގެ ފިރިހެނަކާ ކައިވެނި ކޮށްގެން އުޅޭ، ކަޅު ނަސްލުގެ އަންހެނެއް ޤަބޫލު ކުރަން އެދެމުން ދިޔަ ކަމުގައި ފާހަގަ ކުރެއްވި އެވެ. އެހެން ނަމަވެސް، ރަނިންމޭޓަކަށް ބުޓިޖިޖަކީ ހަމަޖައްސަން އޭނާގެ ހިތް ބޭނުންވީ، އެކަމާ ނުވިސްނައި ކުރިއަށް ދާން ކަމަށް ކަމަލާ ވިދާޅުވި އެވެ.

އެކަމަކު އެ ވިސްނުން ދޫކޮށްލެއްވީ އެކަމުގެ ރިސްކު އެނގިވަޑައިގަންނަވާތީކަން ފާހަގަ ކުރައްވައި ކަމަލާ ވިދާޅުވީ، އެއީ ވަރަށް ބޮޑު ރިސްކެއް ކަމަށެވެ. ބުޓިޖިޖަކީ އަކީ އެކުގައި މަސައްކަތް ކުރަން ވަރަށް ފަސޭހަ، މަސައްކަތްތެރި އަދި އެހާމެ ރަނގަޅު މީހެއް ކަމަށް ކަމަލާ ފާހަގަ ކުރެއްވި އެވެ. ނަމަވެސް، އޭނާ އަކީ އެއް ޖިންސުން ގުޅުން ހިންގުމަށް ތާއީދު ކުރާ މީހަކަަށް ވާތީ، އެވަރުގެ ބޮޑު ރިސްކެއް ނަގަން ބޭނުންފުޅު ނުވީ ކަމުގައި ކަމަލާ ވިދާޅުވެފައިވެ އެވެ.

އެހެންކަމުން ރަނިންމޭޓަކަށް ބުޓިޖިޖަކީ ހަމަޖެއްސުމުގެ ވިސްނުން ކަމަލާ ދޫކޮށްލެއްވީ އެވެ. އެއަށް ފަހު އޭނާ ވަނީ ރަނިންމޭޓަކަށް ވޯލްޒް ހަމަޖައްސައިފަ އެވެ. ވޯލްޒް އަކީ މިނެސޯޓާގެ ގަވަރުނަރުގެ މަގާމު ވެސް ފުރުއްވަމުން ގެންދިޔަ ފަރާތެކެވެ.

މިދިޔަ އަހަރު އޮތް އިންތިޚާބުގައި ކަމަލާ އަދި ވޯލްޒް ވާދަކުރެއްވި ނަމަވެސް، ރިޕަބްލިކަން ޕާޓީގެ ޑޮނަލްޑް ޓްރަމްޕް އަދި އޭނާގެ ރަނިންމޭޓް ޖޭޑީ ވޭންސްއާ ވާދަ ކުރައްވައި ވަނީ ނާކާމިޔާބުވެފަ އެވެ.