ސައުދީ އިން ގޮވާލީ ހުރިހާ ޤައުމަކުން ވެސް ފަލަސްޠީނުގެ މިނިވަން ދައުލަތް ޤަބޫލު ކުރުމަށް
23 ސެޕްޓެމްބަރު 2025 | އަންގާރަ 08:18އެ ބައްދަލުވުމުގެ ނަތީޖާތައް ތަންފީޒު ކުރެވޭކަން ކަށަވަރު ކުރުމަށް ސައުދީ އަރަބިއްޔާ އިން މަސައްކަތް ކުރާނެ ކަމަށާއި، އޭގެ ތެރޭގައި ޣައްޒާ ހަނގުރާމަ ނިންމުމަށް ކުރެވޭ މަސައްކަތްތައް ވެސް ހިމެނޭ ކަމަށް އޭނާ ވިދާޅުވި އެވެ.
ފަލަސްޠީން ދައުލަތް ޤަބޫލުކުރުމަށް ސަޢޫދީ ޚާރިޖީ ވަޒީރު އެންމެހާ ޤައުމުތަކަށް ގޮވާލައްވައިފި
ދެ ދައުލަތުގެ ޙައްލު ހޯދުމަށް ބޭއްވި ސަމިޓުގައި ސައުދީގެ ޚާރިޖީ ވަޒީރު ވާހަކަ ދައްކަވަނީ
ހުރިހާ ޤައުމަކުން ވެސް ފަލަސްޠީނުގެ މިނިވަން ދައުލަތް ޤަބޫލު ކުރުމަށް، ސައުދީ އަރަބިއްޔާގެ ޚާރިޖީ ވަޒީރު ޕްރިންސް ފައިސަލް ބިން ފަރުޙާން ގޮވާލައްވައިފި އެވެ.
އެމެރިކާގެ ނިއު ޔޯކުގައި ކުރިއަށް ދިޔަ ދެ ދައުލަތުގެ ޙައްލު ތަންފީޒު ކުރުމާ ގުޅޭ މަތީ ފެންވަރުގެ ބައިނަލްއަޤުވާމީ ބައްދަލުވުމުގައި ވާހަކަ ދައްކަވަމުން ސައުދީގެ ޚާރިޖީ ވަޒީރު ވިދާޅުވީ، އެ ފިޔަވަޅު ތަކަކީ ދެ ދައުލަތުގެ ހައްލު ތަންފީޒު ކުރުމުގެ މަސައްކަތަށް ވަރަށް ބޮޑު އެހީތެރިކަމެއް ލިބިގެންދާނެ ކަމެއް ކަމަށެވެ.
ފަލަސްޠީނުގެ މިނިވަން ދައުލަތް ޤަބޫލު ކުރުމަށް ފްރާންސް އިން ނިންމާފައިވާ ތާރީޚީ ނިންމުމާއި، އެހެން ގިނަ ޤައުމު ތަކުން ވެސް އެކަމުގައި ނިންމާފައިވާ ނިންމުން ތަކަކީ ފަލަސްޠީނު ރައްޔިތުންނަށް އިންސާފު ހޯދައި ދިނުމަށް ބައިނަލްއަޤުވާމީ މުޖުތަމައުގެ ބޭނުންތެރިންކަން ދައްކުވައިދޭ ކަމެއް ކަމަށް ވެސް ސައުދީގެ ޚާރިޖީ ވަޒީރު ވަނީ ފާހަގަ ކުރައްވައިފަ އެވެ.
ހަމަ އެހެންމެ އެ ބައްދަލުވުމުގެ ނަތީޖާތައް ތަންފީޒު ކުރެވޭކަން ކަށަވަރު ކުރުމަށް ސައުދީ އަރަބިއްޔާ އިން މަސައްކަތް ކުރާނެ ކަމަށާއި، އޭގެ ތެރޭގައި ޣައްޒާ ހަނގުރާމަ ނިންމުމަށް ކުރެވޭ މަސައްކަތްތައް ވެސް ހިމެނޭ ކަމަށް އޭނާ ވިދާޅުވި އެވެ.
ސައުދީގެ ޚާރިޖީ ވަޒީރު އިތުރަށް ފާހަގަ ކުރެއްވި ގޮތުގައި، 1967 ވަނަ އަހަރުގެ ބޯޑަރު ތަކުގެ މައްޗަށް ބިނާކޮށް، އިރުމަތީ ޖެރޫސަލަމް އަކީ ފަލަސްޠީނުގެ ވެރިކަން ކުރާ ސިޓީގެ ގޮތުގައި ހަމަޖައްސައިގެން ދެ ދައުލަތުގެ ޙައްލެއް ގެނައުމަށް ސައުދީ އަރަބިއްޔާ އިން ގޮވާލާ ކަމަށެވެ.
އދ ގެ އެ ބައްދަލުވުން ޗެއާ ކޮށްފައި ވަނީ ފްރާންސް އާއި ސައުދީ އަރަބިއްޔާ އިންނެވެ. އެ ބައްދަލުވުމުގައި ފްރާންސްގެ ރައީސް އިމަނުއެލް މެކްރޮން ވަނީ، ފަލަސްޠީނުގެ މިނިވަން ދައުލަތް ރަސްމީކޮށް ބަަލއިގަނެ، އެކަން އިއުލާން ކުރައްވައިފަ އެވެ.
މަސްދަރު: އަލް އަރަބިއްޔާ
