ހަތް އަހަރުގެ ދިގު މުއްދަތަކަށްފަހު ދިވެހި ޕްރިމިއާ ލީގުން ޖާގަލިބުނު ނިއު ރޭޑިއަންޓުން، އެ ޓީމުގެ ފުރަތަމަ މެޗުގައި ހުކުރު ދުވަހު ހަވީރު ޓީސީ އާ ދެކޮޅަށް 6-0 ގެ ތަފާތު ބޮޑު ނަތީޖާއެއް ހޯދައިފިއެވެ. މި މޮޅުވުމާއެކު ނިއު ރޭޑިއަންޓުން ވަނީ މި ސީޒަންގައި އެ ޓީމުގެ ވަރުގަދަކަން ދައްކާލާފައެވެ.

ގަލޮޅު ދަނޑުގައި ކުޅުނު މި މެޗުގައި ނިއު ރޭޑިއަންޓުގެ ސަޕޯޓަރުން ވަނީ މެޗު ފެށުނީއްސުރެ ނިމެންދެން ހިތްވަރުދީ، ބެރު ދުންމާރީގެ އަޑުން މުޅިދަނޑު ގުގުމާލާފައެވެ. މި ހިތްވަރާއެކު ނިއު ރޭޑިއަންޓުގެ ކުޅުންތެރިން ވަނީ ފުރިހަމަ ޕަފޯމަންސްއެއް ދައްކާލާފައެވެ.

މެޗުގެ ފުރަތަމަ ލަނޑު ނިއު ރޭޑިއަންޓަށް ކާމިޔާބުކޮށްދިނީ މުޙައްމަދު އިރުފާނެވެ. ރިހާމް އަބްދުލް ޣަނީ (ބޮބީ) ގެ ފުރިހަމަ ޕާހަކުން ލިބުނު ބޯޅަ އިރުފާނު ވަނީ އެއް ފަހަރުން ޖަހައި ގޯލުގެ މަތީ ކަނަށް ބޯޅަ ވައްދާލާފައެވެ. އޭގެ ފަހުން 39 ވަނަ މިނިޓްގައި ސެންޓޭ ވަނީ އޭރިއާ ބޭރުން ލިބުނު ހިލޭ ޖެހުމަކުން ދެވަނަ ލަނޑު ޖަހާފައެވެ.

މެޗުގެ ތިންވަނަ ލަނޑު ނިއުއިން ޖެހީ ލިބުނު ޕެނަލްޓީއަކުންނެވެ. ސެންޓޭއަށް އޭރިއާ ތެރެއިން ކުރި ފައުލަކާ ގުޅިގެން ލިބުނު މި ޕެނަލްޓީ ނިއު ރޭޑިއަންޓަށް ކާމިޔާބުކޮށްދިނީ ބްރެޒިލް މިޑްފީލްޑަރު ގޯމޭސް ޑަ ސިލްވާއެވެ.

ދެވަނަ ހާފުގައިވެސް ނިއު ރޭޑިއަންޓުގެ ހަމަލާތައް ހުއްޓުމެއް ނެތި ކުރިއަށް ދިޔައެވެ. ހާފު ފެށިގެން ތިންވަނަ މިނެޓްގައި ސެންޓޭ ވަނީ އޭނާގެ ދެވަނަ ލަނޑު ޖަހާފައެވެ. 74 ވަނަ މިނެޓްގައި ހަސަން އަޒޫމް އަލީ އަދި 86 ވަނަ މިނެޓްގައި ހަސަން ރާއިފް އަޙްމަދު (ހަންނަ) ވަނީ އިތުރު ދެ ލަނޑު ޖަހާފައެވެ.

ނިއު ރޭޑިއަންޓުގެ މި ވަރުގަދަ ފެށުމަކީ، މިފަހަރުގެ ލީގު ވާދަވެރި ވެގެންދާނެ ކަމުގެ ނިޝާނެއް ކަމުގައި ފުޓުބޯޅައަށް ލޯބިކުރާ މީހުން ދެކެއެވެ. ހަތް އަހަރަށްފަހު ޕްރިމިއާ ލީގަށް އެނބުރި އައުމަށްފަހު މިފަދަ ނަތީޖާއެއް ހޯދުމަކީ އެ ޓީމުގެ ކުޅުންތެރިންނާއި ކޯޗިންގ ސްޓާފުގެ މަސައްކަތުގެ ނަތީޖާ ކަމުގައި ފާހަގަކުރެވެއެވެ.