ޣައްޒާ ހަނގުރާމަ ހުއްޓާލުމަށް ހުށަހެޅި ޤަރާރު އެމެރިކާ އިން ވީޓޯ ކޮށްފި

އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ހުއްޓާލުމަށާއި، އެ ސަރަހައްދަށް އިންސާނީ އެހީ ފޯރުކޮށްދިނުމަށް ގޮވާލައި އދ ގެ ސާލަމަތީ މަޖިލީހަށް ހުށަހެޅި ޤަރާރު އެމެރިކާ އިން ވީޓޯ ކޮށްފި އެވެ.

މިއީ ޣައްޒާ ހަނގުރާމައާ ގުޅިގެން އެމެރިކާ އިން ވީޓޯ ކުރި ހަ ވަނަ ޤަރާރެވެ.

ޖުމުލަ 15 މެމްބަރުންގެ މައްޗަށް އެކުލެވިގެންވާ ސަލާމަތީ މަޖިލީހުގެ 14 މެމްބަރުން ވަނީ އެ ޤަރާރަށް ތާއީދު ކޮށްފަ އެވެ. އެހެން ނަމަވެސް، އެމެރިކާ އިން އެ ޤަރާރު ވީޓޯ ކުރުމާ ގުޅިގެން، އެ ޤަރާރު ފާސް ކުރެވޭ ގޮތެއް ނުވި އެވެ.

އެ ޤަރާރުގައި ގޮވާލާފައި ވަނީ އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ވަގުތުން ހުއްޓާލުމާ އެކު، ހަމާސް ޖަމާއަތުގެ ބެލުމުގެ ދަށުގައި ތިބި އިސްރާއީލްގެ ހުރިހާ ރަހީނުން މިނިވަން ކުރުމަށެވެ.

ޑެންމާކް އިން އދ އަށް ކަނޑައަޅާފައިވާ ސަފީރު ކްރިސްޓީނާ މާކަސް ލާސެން ވިދާޅުވެފައި ވަނީ، ޣައްޒާގައި މިހާރު އޮތީ ބަނޑުހައު ހޫނު ކަމުގެ ނުރައްކާތެރި ޙާލަތެއް ކުރިމަތިވެފައި ކަމަށެވެ. ހަމަ އެހެންމެ، އިސްރާއީލް އިން ޣައްޒާ ސިޓީގައި ކުރަމުން ގެންދާ ހަނގުރާމައުގެ އަމަލުތައް އިތުރު ކުރުމާ ގުޅިގެން، އާންމު ރައްޔިތުންގެ ޙާލަތު ވަނީ އިތުރަށް ގޯސްވެފައި ކަމަށް އޭނާ ފާހަގަ ކުރެއްވި އެވެ.

އެމެރިކާ އިން މެދުއިރުމައްޗަށް ކަނޑައަޅާފައި ހުންނަ ސަފީރުގެ ނައިބު މޯގަން އޯޓަގަސް ވިދާޅުވީ މި ޤަރާރުގައި ހަމާސް އެކަށީގެންވާ މިންވަރަށް ކުށްވެރި ކޮށްފައި ނުވާ ކަމަށާއި އިސްރާއީލުގެ އަމިއްލަ ދިފާއުގައި ހަރަކާތްތެރި ވުމުގެ ހައްގު އެކަށީގެންވާ ގޮތެއްގައި ބަޔާން ކޮށްފައި ނުވާ ކަމުގައެވެ.

އދ. ގެ އިންސާނީ އެހީގެ އޮފީހުން އިންޒާރު ދެމުންދަނީ އިސްރާއީލުގެ ހަނގުރާމަ ފުޅާވަމުންދާއިރު ޣައްޒާ ސިޓީގެ މަދަނީ ރައްޔިތުންގެ އެންމެ ފަހު އުންމީދުތައްވެސް ނެތިގެންދާ ކަމަށެވެ.

ޣައްޒާ އާ މެދު ކަން ކުރަމުންދާ އަނިޔާވެރިކަމާ ހެދި ދުނިޔޭގެ މަސްރަހުގައި އިސްރާއީލް އާއި އެ ގައުމުގެ އެންމެ ގާތް އެކުވެރިޔާ އެމެރިކާ އެކަހެރިވެ ބާކީވަމުންދާ ކަން ފާހަގަ ކުރެވެއެވެ.

ވޯޓުލުމުގެ ކުރިން އޯޓަގަސް ވިދާޅުވީ ވޮޝިންގްޓަނުން މި ގާރާރާ އިދިކޮޅުވުން "ހައިރާންވާންޖެހޭ ކަމަކަށް ވެގެން ނުވާނެ" ކަމަށެވެ.

"މި ޤަރާރުގައި ހަމާސް ކުށްވެރިކޮށްފައި ނުވުމާއި އިސްރާއީލްގެ ދިފާއީ ހައްގު ފާހަގަކޮށްފައި ނުވުމާއެކު، މި ކައުންސިލްގައި ހަމާސްއަށް ފަހިވާ ގޮތައް ދޮގު ވާހަކަތަކަށް ބާރުދީފައިވާކަން ހިތާމައާއެކު ފާހަގަކުރަން" އޭނާ ވިދާޅުވިއެވެ.

ވޯޓުލުމަށްފަހު އދ. ގެ މެންބަރުން ވަނީ ގަރާރު ފާސް ނުވުމުން އެކަމާ ހިތާމަ ފާޅުކޮށްފައެވެ.

އދ. އަށް ފަލަސްތީނުގެ ސަފީރު ރިޔާޒް މަންސޫރު ވިދާޅުވީ އެމެރިކާ ގެ ނިންމުމަކީ "ވަރަށް ހިތާމަވެރި އަދި ވޭންދެނިވި" ނިންމުމެއް ކަމަށާއި، މި އަނިޔާވެރިކަމާ ދެކޮޅަށް ސެކިއުރިޓީ ކައުންސިލަށް، އެ ކައުންސިލުގެ ދައުރު އަދާކުރުން ހުއްޓިފައިވާ ކަމަށެވެ.

ޕާކިސްތާނުގެ ސަފީރު އާސިމް އަހްމަދު މި ވީޓޯ އަކީ "މި މަޖިލީހުގެ އަނދިރި ވަގުތެއް" ކަމަށް ވިދާޅުވިއެވެ.

"ދުނިޔެ ބަލަމުން މިދަނީ. ކުޑަކުދިންގެ ރުއިމުގެ އަޑު އަޅުގަނޑުމެންގެ ހިތްތަކަށް ވަންނަންވާނެ" އޭނާ ވިދާޅުވިއެވެ.

އަލްޖީރިއާގެ ސަފީރު އަމާރު ބެންޖަމާ ފަލަސްތީނު ރައްޔިތުންގެ ކިބައިން މަޢާފަށް އެދިވަޑައިގަތެވެ.

"ފަލަސްތީނު އަޚުންނާއި އުޚްތުންނޭ، އަޅުގަނޑުމެންނަށް މަޢާފުކުރައްވާ" އޭނާ ވިދާޅުވިއެވެ.

"ދުނިޔެ ހައްގުތަކުގެ ވާހަކަ ދައްކާއިރު، ފަލަސްތީނު މީހުންނަށް އެ ހައްގުތައް ދޭން އިންކާރުކުރާތީ މަޢާފުކުރައްވާ. އަޅުގަނޑުމެންގެ މަސައްކަތްތައް، އިޚްލާސްތެރި މަސައްކަތްތައް........ މަޢާފުކުރައްވާ."

އެންމެ ފަހުން އދ. ގެ ސެކިއުރިޓީ ކައުންސިލުގެ ވޯޓު މި ނެގުނީ ދުނިޔޭގެ ލީޑަރުން އދ. ގެ ޖެނެރަލް އެސެމްބްލީއަށް ޖަމާވުމަށް ކުޑަ ދުވަސްކޮޅަކަށް ވެފައި ވަނިކޮށްނެވެ. އެ އެސެމްބްލީގައި ޣައްޒާ އަކީ މައިގަނޑު މައުޟޫއަކަށް ވާނެ ކަމަށް ވަނީ ބެލެވިފައެވެ. މި ބައްދަލުވުމުގެ ތެރޭގައި އިނގިރޭސިވިލާތް ފަދަ އެމެރިކާގެ މުހިންމު އެކުވެރިން މިނިވަން ފަލަސްތީނު ދައުލަތެއް ބަލައިގަންނާނެ ކަމަށް ބެލެވެއެވެ.

ޣައްޒާގައި، އިސްރާއީލްގެ ޓޭންކުތަކާއި ހަތިޔާރު އެޅި ސިފައިން ހަރަކާތްތެރިވަމުންދާތާ ތިން ދުވަސް ވެފައިވާއިރު، އެތައް ބަޔަކު ދަނީ އިސްރާއީލުގެ އަނިޔާވެރި ކަމުގައި ޝަހީދުވަމުންނެވެ. އަދި މި އަނިޔާވެރިކަމުން ސަލާމަތްވުމަށް އެތައް ހާސް މީހުން ގެންދަނީ އެމީހުންގެ ގެދޮރު ދޫކޮށް ޣައްޒާ އިން ނުކުންނަމުންނެވެ.

ޣައްޒާގެ ސިއްހަތާ ބެހޭ މިނިސްޓްރީގެ މަޢުލޫމާތުން، މިހާތަނަށް އިސްރާއީލްގެ ހަމަލާތަކުގައި މަދުވެގެން 65,141 މީހުން ޝަހީދުވެފައިވެއެވެ.

މިނިސްޓްރީން ބުނާގޮތުގައި ހަނގުރާމައިގެ ތެރޭގައި ކާބޯތަކެތި ނުލިބި ހައިހޫނު ކަމުގެ ސަބަބުން އިތުރު 435 މީހުން މަރުވެފައިވެއެވެ. މީގެ ތެރޭގައި ވޭތުވެދިޔަ 24 ގަޑިއިރުގެ ތެރޭގައި މަރުވި 4 މީހުން ހިމެނެއެވެ.