ޕީއެންސީ މެންބަރު އިމްރާން ކޮމިޓީ ރޫމުގެ މައިކު އިންތަނުން އުފުރާލައި ގެއްލުންދީފި
އިމްރާން މައިކަށް ގެއްލުން ދިނީ ތޮއްޑޫ ދާއިރާގެ މެންބަރު ސަމީރާއި ކެންދޫ ދާއިރާގެ މެންބަރު މައުރޫފު މައިކުން ވާހަކަ ދައްކަން އުޅުމުން
މެންބަރު އިމްރާން މައިކަށް ގެއްލުން ދެނީ
މިނިވަން މީޑިއާގައި ތަޅުއަޅުވާ ބިލު ދިރާސާކުރި ކޮމިޓީ ރޫމުގައި އިން މައިކަކަށް ޕީއެންސީގެ ހެންވޭރު ދެކުނު ދާއިރާގެ މެންބަރު ހުސައިން އިމްރާން ލަތީފު ގެއްލުން ދީފިއެވެ.
ސަރުކާރުން އަޑީގައި އޮވެގެން އަމިއްލަ މެންބަރެއް ކަމުގައިވާ ތުޅާދޫ ދާއިރާގެ މެންބަރު އަބްދުލް ހަންނާނު އަބޫބަކުރު ހުށަހެޅުއްވި މީޑިއާ ނެތިކޮށްލާ ބިލުގެ މަސައްކަތް ކުރަމުންދިޔަ މިނިވަން މުއައްސަސާތަކުގެ ކޮމިޓީއަށް ވަދެ މެންބަރު އިމްރާނު ވަނީ މައިކު އިންތަނުން ލުއްސާލާ ވާގަނޑު ދަމައިގަނެ އެއްލާލާފައެވެ. އިމްރާން މައިކަށް ގެއްލުން ދިނީ އެވަގުތު ކޮމިޓީ ހޯލުގައި އިންނެވި ކެންދޫ ދާއިރާގެ މެންބަރު މައުރޫފް ޒާކިރުއާއި ތޮއްޑޫ ދާއިރާގެ މެންބަރު ސަމީރު މައިކުން ވާހަކަ ދައްކަވަން އުޅުމުންނެވެ.
އެއިރު ބިލާ ދެކޮޅަށް އެމްޑީޕީގެ މެންބަރުންނާއި ކޮމިޓީގައި ތިބި ނޫސްވެރިން ދިޔައީ އިހުތިޖާޖުކޮށް އަޑު އުފުލަމުންނެވެ. ވީޑިއޯއިން ފެންނަ ގޮތުގައި މައިކު ދެފަރަތާކަށް ދަމަމުން ގޮސް މެންބަރު އިމްރާން ވަނީ މައިކް ވާގަނޑު އިންތަނުން ލުއްސާލާ މޭޒު ދަށަށް މައިކް އެއްލާލާފައެވެ.
މަޖިލީހުގެ މުދަލަށް ގެއްލުން ދިނުމަކީ ކުށެކެވެ. އަދި މިއީ ސުލޫކީ މައްސަލައެއް ގޮތުގައި ބެލޭނެ މައްސަލައެކެވެ.
