މަސްތުވާތަކެތި ޓްރެފިކް ކުރުމުގެ މައްސަލައެއްގައި ހިމެނޭ ބައެއްގެ މައްޗަށް ފުރަތަމަ ފަހަރަށް މަނީ ލޯންޑަރިންގ ގެ ދައުވާ އުފުލި މައްސަލައިގައި ހިމެނޭ ފަހު މީހާގެ މައްޗަށް ހުކުމް އިއްވައިފިއެވެ.

މިއީ 12 ޖަނަވަރީ 2021 ވަނަ ދުވަހު ދިވެހިރާއްޖެއަށް މަސްތުވާތަކެތި އެތެރެކޮށް އެތަކެތި ބޭނުންކޮށް، ގެންގުޅެ އަދި އެތަކެތި ޓްރެފިކް ކުރާކަމަށް ތުހުމަތުކުރެވުނު މައްސަލައެއް ކަމަށެވެ. މި މައްސަލައާ ގުޅިގެން މޯލްޑިވްސް ޕޮލިސް ސަރވިސްއިން މާލޭގެ 04 ގެއެއް ބަލައިފާސްކޮށް ހިނގި އޮޕަރޭޝަންގައި ގިނަ ޢަދަދެއްގެ މަސްތުވާތަކެތި ފެނިފައިވާއިރު، މި މައްސަލައިގައި ހިމެނޭ މީހުންގެ މައްޗަށް ދައުވާ އުފުލާފައިވަނީ 2021 ވަނަ އަހަރުގެ މާރޗު މަހުގެ 18 ވަނަ ދުވަހުއެވެ.

މި މައްސަލައިގައި ހިމެނޭ އަފްލާޙް ފިޔަވައި އެންމެންގެ މައްޗަށް އުުފުލާފައިވާ ދައުވާތަކުގެ ތެރޭގައި މަނީ ލޯންޑަރިންގ ގެ ކުށުގެ ދައުވާ ހިމެނޭއިރު، މި މައްސަލައަކީ މަސްތުވާތަކެތި ޓްރެފިކް ކުރުމުގެ މައްސަލައެއްގައި މަނީ ލޯންޑަރިންގެ ކުށުގެ ދަޢުވާކުރުމަށް ހުށަހެޅި ފުރަތަމަ މައްސަލަ އެވެ.

މި މައްސަލައިގައި ހިމެނޭ ތ. ތިމަރަފުށި، ވައިޓްރޯސް، އިސްމާއިލް ޝަރީފްއާއި، ކ. މާލެ، މއ. ހަސްލަތު، ޝާނިޔާ އިބްރާހީމް، ހުޅުމާލެ. ފްލެޓް ނަންބަރު 01-ޖީ-45 ހުޅުމާލެ، ހަސަން ރަޝީދު އަދި ގދ. ތިނަދޫ، ރަންގަލް، ހަސަން ލޫތު އުމުރަށް ޖަލަށް ލުމަށް ހުކުމް ކުރީ 17 އޮކްޓޯބަރު 2024 ގައެވެ.

މި މައްސަލައިގައި ހިމެނޭ ޅ. ހިންނަވަރު، ސުވާސާގެ، މުޙަންމަދު އަފްލާޙް ޢަބްދުﷲ މައްޗަށް މި މަހުގެ 7 ވަނަ ދުވަހު ވަނީ ހުކުމް އިއްވާފައެވެ. އަފްލާހުގެ މައްޗަށް 18 އަހަރުގެ ޖަލު ހުކުމަކާއެކު، 200،000 ރުފިޔާގެ ޖޫރިމަނާއެއް ކުރިއެވެ. ޖޫރިމަނާ އެއް އަހަރު ތެރޭގައި ދައްކަންވަނީ އަމުރުކޮށްފައެވެ.

މި މައްސަލާގައި ފުލުހުން ބަލައިފާސްކުރި ތަންތަނުން ޖުމްލަ 1،542،675ރ (އެއްމިލިއަން ފަސްލައްކަ ސާޅީސް ދެހާސް ހަސަތޭކަ ހަތްދިހަ ފަހެއް) ރުފިޔާ ފެނިފައިވާކަމަށް ޕީޖީ އޮފީހުން މައުލޫމާތު ދެއެވެ. އެގޮތުން މި މައްސަލައިގެ ތަޙުޤީޤުގައި ކުށްކޮށްގެން ހޯދާފައިވާކަމަށް ބެލެވޭ ގިނަޢަދަދެއްގެ ފައިސާ، މި މައްސަލާގައި ދަޢުވާލިބޭ މީހުންގެ އެކައުންޓްތަކާއި، އެމީހުންނާ ގުޅުންހުރި އެކައުންޓްތަކުގައި ދަޢުރު ކޮށްފައިވާކަން ހޯދިފައިވެއެވެ.