ވަގަށް ނެރުނު ސިނގިރޭޓްތަކަކަށް 20 މިލިއަނަށް ވުރެ ގިނަ ރުފިޔާ ދައްކަން ހުކުމްކޮށްފި

ރާއްޖެއަށް އެތެރެކޮށް، ޑިއުޓީ ނުދައްކައި ކަސްޓަމްސްއަށް ސިއްރުން ސިނގިރޭޓް ބޭރުކޮށްފައިވާ މައްސަލައެއްގައި އޭގެ ޑިއުޓީގެ ގޮތުގައި 20 މިލިއަނަށް ވުރެ ގިނަ ރުފިޔާ ދެއްކުމަށް އަމިއްލަ ކުންފުންޏަކަށް ސިވިލް ކޯޓުން ހުކުމްކޮށްފި އެވެ.

މި މައްސަލައަކީ 2018 ވަނަ އަހަރުގެ އޭޕްރީލް 27 އަދި ޖޫން 4 ގައި ރާއްޖެއަށް އެތެރެކޮށްފައިވާ ސިނގިރޭޓަށް ޑިއުޓީ ނުދައްކައި ބޭރުކުރި މައްސަލައިގައި މޯލްޑިވްސް ކަސްޓަމްސް ސާވިސްއިން ހުށަހަޅާފައިވާ މައްސަލައެކެވެ.

މައްސަލަ ނިމުނުގޮތުގެ ރިޕޯޓުން އެނގޭ ގޮތުގައި 2018 ވަނަ އަހަރުގެ އޭޕްރީލް އަދި ޖޫން މަހު ރާއްޖެ އެތެރެކުރި 430 ކޭސް އެމެރިކަން ލެޖެންޑް ބްރޭންޑުގެ ސިނގިރޭޓާއި 250 ކޭސް އަފްޒަލް މޮލްސެސް ބްރޭންޑުގެ ޕައިޕް ޓޮބޭކޯ ކަސްޓަމްގެ ބޮންޑުން ބޭރު ކުރީ ސިއްރުންނެވެ. އޭގެ ޑިއުޓީއަށް ދައްކަން ޖެހޭ، 20،720،415.54 ރުފިޔާ މިހާތަނަށް ވެސް އޮތީ ނުދައްކައެވެ.

އެ ފައިސާ ނުދައްކައި އޮތުމުން ކަސްޓަމްސްއިން އެ ފައިސާ ހޯދަން ދައުވާކުރީ މި އަހަރުގެ ތެރޭގަ އެވެ. މި ދައުވާގައި ކަސްޓަމްސްއިން އެދިފައިވަނީ އެ ފައިސާ އެކީ އެއް ފަހަރާ އެ ކުންފުނިން ހޯދުމަށެވެ.

މި މައްސަލަ ނިމުނު ގޮތުގެ ރިޕޯޓުގައި ސިވިލް ކޯޓުން ބުނެފައިވަނީ ކޯޓަށް ލިބިފައިވާ އެޑްރެހުން އެ ކުންފުންޏަށް މައްސަލައިގެ ލިޔެކިޔުންތައް ރައްދުކޮށްދެވިފައެި ނުވާކަމަށެވެ. އަދި އެ ކުންފުންޏަށް ލިޔެކިޔުންތައް ރައްދުކުރެވޭ ގޮތް ނުވުމުން އެ ކުންފުނި ހޯދަން ކޯޓުންވަނީ އިއުލާން ވެސް ކޮށްފައެވެ.

އެހެން ނަމަ ވެސް އެ ކުންފުނީގެ ޚަބަރެއް ނުވުމުން މައްސަލަ ކުރިއަށް ގެންގޮސް ނިންމީ ޣައިރު ހާޒިރުގައެވެ.

އެހެންކަމުން ޖޫރިމަނާގެ ފައިސާ 14 ދުވަހުގެ ތެރޭގައި ދެއްކުމަށް އެ ހުކުމްގައި އެ ކުންފުންޏަށް ވަނީ އަންގާފަ އެވެ.