ސުޕްރީމް ކޯޓުން ރައީސުލްޖުމްހޫރިއްޔާ ޑރ.މުހައްމަދު މުއިއްޒު އާއި އެކު ސޯޝަލް މީޑިއާގައި މުޢާމަލާތް ކުރުމަކީ ނޭދެވޭ ކަމެއް ކަމަށާއި މިފަދަ މުޢާމަލާތްތަކަކީ ޝަރުޢީ ދާއިރާގެ މިނިވަންކަމާއި ނަޒާހަތްތެރިކަމަށް އަސަރުކުރާނެ ކަމެއްކަމަށް ކަމަށް ސުޕްރީމް ކޯޓުގެ ކުރީގެ ފަނޑިޔާރު ހުސްނު ސުއޫދު ވިދާޅުވެއްޖެ އެވެ.

ސުއޫދު އެކްސްގައި ކުރެއްވި ޕޯސްޓެއްގައި މިގޮތަށް ވިދާޅުވީ ދައުލަތުގެ އާމްދަނީން ވަކި ޕަސެންޓެއް ޖުޑިޝަރީގެ ދާއިރާ އަށް ކަނޑައަޅުއްވާނެ ކަމަށް ވިދާޅުވެ، ރައީސް މުއިއްޒު، އެކްސްގައި ކުރެއްވި ޕޯސްޓަކަށް ސުޕްރީމް ކޯޓުގެ އެކްސް އެކައުންޓުން އެކަމަށް އިޖާބަ ދެއްވުމުންނެ އެވެ.

ރައީސް މުއިއްޒު އެކްސްގައި ވިދާޅުވީ ދައުލަތުގެ އާމްދަނީން ވަކި ޕަސެންޓެއް ޖުޑިޝަރީގެ ދާއިރާ އަށް ކަނޑައަޅައި، އެ ފައިސާ ވަކި އުސޫލެއްގެ ދަށުން ބޮލޮކް ގްރާންޓުގެ ގޮތުގައި ދޫކޮށް، ޖުޑިޝަރީގެ ފުރިހަމަ މާލީ ބާރު ހިނގާނެ ނިޒާމެއްގެ ތެރެއިން ޚަރަދު ކުރުމުގެ ފުރިހަމަ މިނިވަންކަން ދިނުމަށް ނިންމާފައިވާ ކަމަށެވެ.

އަދި ޖުޑިޝަރީ މިނިވަންކަމާ އެކު ހަރަކާތްތެރިވުމަށް އެންމެ މުހިންމު ކަމަކީ މާލީ މިނިވަންކަން ލިބިގެންދިއުން ކަމަށްވާތީ އެކަމަށް މަގުފަހިކުރުމަށްޓަކާ ކުރެވެމުންދާ ކަންކަމުގެ ތެރެއިން މާލީ ގޮތުންނާއި އިދާރީ ގޮތުން މިހާތަނަށް ނެތް މިނިވަންކަން އަންނަ އަހަރަށް ދައުލަތުން ފާސްކުރާ ބަޖެޓުން ފެށިގެން ޖުޑީޝަރީއަށް ލިބިގެން ދާނެ ކަމަށް ރައީސް ވިދާޅުވި އެވެ.

ރައީސްގެ މިޕޯސްޓަށް އިޖާބަ ދެއްވަމުން ސުޕްރީމް ކޯޓުގެ އެކްސް އެކައުންޓުން ބުނެފައިވަނީ، މި ނިންމެވުން ހިމެނިގެންދާނީ މި ދާއިރާގެ ކުރިއެރުމާއި މުސްތަގިއްލުކަން ދެމެހެއްޓުމަށް ނިންމި ތާރީޚީ މުހިންމު ނިންމުމެއް ކަމަށާއި މި ނިންމުމުގެ ސަބަބުން މާލީ ގޮތުން ޖުޑިޝަރީއަށް ކުރިމަތިވެފައިވާ ގިނަ ގިނަ މައްސަލަތަކަކަށް ޙައްލު ހޯދުމަށް ފަސޭހަވާނެ ކަމަށެވެ.

އަދި މި ނިންމެވުމާއެކު އަދުލު އިންސާފު ޤާއިމުކުރުމުގެ މަސައްކަތަށް އިތުރު ހަލުވިކަމެއް އަންނާނެ ކަމަށް އުއްމީދުކުރެވޭ ކަމަށް ސުޕްރީމް ކޯޓުން ބުންޏެވެ.

މިކަމަކަށް އިޝާރާތް ކުރައްވާ ސުއޫދު ވިދާޅުވެފައިވަނީ ޝަރުޢީ ދާއިރާއިން ސަރުކާރުގެ އިސް ފަރާތްތަކާއެކު މުޢާމަލާތް ކުރަންވާނީ ރަސްމީ ޗެނަލްތައް މެދުވެރިކޮށެވެ. ސޯޝަލް މީޑިއާގައި ކުރެވޭ މުޢާމަލާތްތަކަކީ ޝަރުޢީ ދާއިރާގެ މުސްތަޤިއްލުކަމަށް ހުރަސްއެޅޭ ކަމެއްގެ ގޮތުގައި ފާހަގަކުރެވޭ ކަމަށްވެސް ސުއޫދު ވިދާޅުވި އެވެ.

އަދި ޝަރުޢީ ދާއިރާގެ އިސް ފަރާތްތަކުން ސޯޝަލް މީޑިއާގައި ކުރާ މުޢާމަލާތްތަކަކީ ޢާންމު ރައްޔިތުންގެ މެދުގައި ޝަރުޢީ ދާއިރާއަށް އޮންނަ އިތުބާރު ގެއްލިގެންދާނެ ކަމެއް ކަމަށް ކަމަށާއި، އަދި މިފަދަ މުޢާމަލާތްތަކުން ޝަރުޢީ ދާއިރާގެ ޕްރޮފެޝަނަލިޒަމް އަށްވެސް އަސަރުކުރާނެކަމަށް ބެލެވޭ ކަމަށް ސުއޫދު ވިދާޅުވި އެވެ.

ޝަރުޢީ ދާއިރާއިން ސަރުކާރުގެ އެހެން މުއައްސަސާތަކާއެކު މުޢާމަލާތް ކުރަންވާނީ ޤާނޫނީ އޮނިގަނޑުގެ ތެރެއިން، ރަސްމީ ލިޔެކިޔުންތައް މެދުވެރިކޮށް ކަމުގައި ސުއޫދު ވިދާޅުވިއެވެ.

ޝަރުޢީ ދާއިރާގެ މިނިވަންކަން ދެމެހެއްޓުމަށްޓަކައި، ސުޕްރީމް ކޯޓުން ސޯޝަލް މީޑިއާގައި މިގޮތަށް މުޢާމަލާތް ކުރުމުން ގިނަ ބަޔަކު ދަނީ ފާޑު ކިޔަމުންނެ އެވެ. އަދި ޝަރުޢީ ދާއިރާގެ މުއާމަލާތްތައް ކުރިއަށް ގެންދަންވާނީ ޤާނޫނީ އިމުގެ ތެރެއިން ކަމަށް ވެސް ގިނަ ބަޔަކު ފާހަގަކުރެ އެވެ.

ރައީސް މުއިއްޒުގެ މިސަރުކާރުން ސުޕްރީމް ކޯޓުގެ ދެ ފަނޑިޔާރުން ވަކި ކުރި މައްސަލާގައި ސަރުކާރަށް ރައްޔިތުންގެ ފަރާތުން ވަރަށް ގިނަ ފާޑު ކިޔުންތައް އަމާޒުވި އެވެ. އެގޮތުން ސުއޫދުވެސް ވިދާޅުވެފައިވަނީ ގާނޫނޫ އަސާސީއާއި ހިލާފަށް ސުޕްރީމް ކޯޓުގެ ފަނޑިޔާރުން ވަކިކުރެއްވުމަކީ ގައުމުގެ ރައީސަކު ކުރައްވާނެ އެންމެ ބޮޑު ދުސްތޫރީ ކުށް ކަމަށެވެ.