ރާއްޖޭގައި މިހާރު ހުންނެވީ ފައިސާ ހަރަދު ކުރެއްވުމުގައި އެއްވެސް އަހުލާގެއް ނެތް ވެރިއެއް: މޭޔަރު އާޒިމް
މި ސަރުކާރުން ދުވާލަކު ގާތްގަނޑަކަށް 15 މިލިއަން ރުފިޔާ ބޭކާރު ގޮތުގައި ހުސްކުރޭ
ރައީސުލްޖުމްހޫރިއްޔާ ޑރ. މުހައްމަދު މުއިއްޒު
ދިވެހިރާއްޖޭގައި މިހާރު ހުންނެވީ ފައިސާ ހަރަދު ކުރެއްވުމުގައި އެއްވެސް އަހުލާގެއް ނެތް ވެރިއެއް ކަމަށް މާލެސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.
އާދިއްތަ ދުވަހުގެ ކުރިއަށް ގެންދިޔަ ރާއްޖެޓީވީގެ ފަލަސުރުހީ ޕްރޮގްރާމްގައި އާޒިމް ވިދާޅުވީ ރައީސް ޑރ.މުހައްމަދު މުއިއްޒުގެ ސަރުކާރުގައި ރައްޔިތުންނަށް ދެރަ ނިކަމެތިގޮތްތައް ވަމުންދާ ކަމަށާއި، މިސަރުކާރުން ދުވާލަކު ގާތްގަނޑަކަށް 15 މިލިއަން ރުފިޔާ ބޭކާރު ގޮތުގައި ހުސްކުރަމުންދާ ކަމަށެވެ.
އަމިއްލަ ކުންފުނިތަކަށް ސަރުކާރުން ދޭންޖެހޭ ފައިސާއަށް އިޝާރާތް ކުރައްވައި، އާޒިމް ވިދާޅުވީ 10 ބިލިއަން ރުފިޔާ ނުދީ ހިފަހައްޓާފައިވާ ކަމަށް މައުލޫމާތު ލިބޭ ކަމަށެވެ. އެހެންކަމުން އެކުންފުނިތައް އިދަޖެހިފައިވާ ކަމަށާއި، މަސައްކަތް ކުރާ މުވައްޒަފުންނަށް މުސާރަ ދިނުމަށް ދަތިވެފައިވާ ކަމަށް އޭނާ ވިދާޅުވިއެވެ. އަދި ވިދާޅުވީ މިހާރު ބައެއް ކުންފުނިތައް ބަންދުކޮށްފައިވާ ކަމަށެވެ.
އާޒިމް ވިދާޅުވީ މިސަރުކާރާއެކު ގައުމުގެ ދަރަނި މެނޭޖް ނުކުރެވި، ވަރަށް ބޮޑަށް ދަރަނިވެރިވަމުންދާ ކަމަށާއި، ފިހާރަތަކާއި، އާއްމު ރައްޔިތުން ދަރަނިވެރިވަމުންދާ ކަމަށެވެ. އަދި ވިދާޅުވީ ރައީސް މުއިއްޒަކީ ފައިސާ ހަރަދުކުރެއްވުމުގައި އެއްވެސް އަހުލާގެއް ނެތް ވެރިއެއް ކަމަށެވެ.
ގާތްގަނޑަކަށް ދުވާލަކަށް ތި ވިދާޅުވަނީ 15 މިލިއަން ރުފިޔާ ތަޅާ ހުސްކުރާ ވާހަކަ. ދުވާލަކު 15 މިލިއަން ރުފިޔާ. 15 މިލިއަން ރުފިޔާއަކީ ގާތްގަނޑަކަށް ބާރަސަތޭކަ އަކަފޫޓު ބިމެއްގައި 10 ބުރީގެ އިމާރާތެއް އެޅޭނެހާ ފައިސާގެ ވާހަކަ މިދައްކަނީ. ދުވާލަކު ތަޅާ ބުރުވަމުން މިދަނީ. އެއްގޮތަކަށް ވެސް ފައިސާ ހަރަދުކުރުމުގައި އެއްވެސް އަހުލާގެއް ނެތް ވެރިއަކު ގައުމަށް ލިބުނީމަ ވާނެ ހުރިހާ ކަމެއް ވަމުން މިދަނީ. ލިބޭ އެއްޗަކަށް ބަލައިގެން ނޫން ހަރަދު ކުރައްވަނީއެއް. ނެތް އެއްޗެހި ވެސް ހަރަދުކުރަނީ. ނެތް އެއްޗެއް ހަރަދު ކުރަންޏާ ގެއަކަށްވެސް ވާނެ ގޮތް ވިސްނާލައްވާ. ގެ ވެސް ދަރަނިވެރިވާނެ ގެއެއްގައި ހަރަދު ކުރައްވަން އޮތީ 100 ރުފިޔާ ކަމަށްވަންޏާ 100 ރުފިޔާ ހަރަދުކޮށް ހުސްކޮށްލާފައި ދެން ލޯނެއް ނަގާފައި 100 ހުސްކޮށްލީމަ 200 ރުފިޔާ އެދިޔައީ. ދެން އިތުރަށް 100 ރުފިޔާ ދޭނެ މީހަކުނުވާނެ. އެހެންވީމަ މިގައުމަށް ޖެހިގެން މިއުޅޭ ހާލަތަކީ މިއީ.މާލެސިޓީގެ މޭޔަރު އާދަމް އާޒިމް
އާޒިމް ވިދާޅުވީ ރައްޔިތުން އުޅޭ ދެރަ ނިކަމެތި ހާލަތު މިސަރުކާރުގެ ބޭފުޅުންނަށް އިހުސާސް ނުކުރެވޭ ކަމަށާއި، އެބޭފުޅުން ދިރިއުޅެމުންދަނީ ވަރަށް ފެންސީކޮށް، އެއްވެސް ކަމަކަށް ދަތިނުވެ ކަމަށެވެ. އެބޭފުޅުން ގައުމުގައި ކުރަން ބޭނުންވާ ހުރިހާ ކަމެއް ބާރު އޮތުމާއެކު ކުރަމުން ގެންދާ ކަމަށް އާޒިމް ވިދާޅުވިއެވެ. އަދި ރައްޔިތުން ދެކެ ލޯބިނުވާ ސަރުކާރެއް އައުމުން ވާނެ ހުރިހާ ކަމެއް ވަމުންދާ ކަމަށް އޭނާ ވިދާޅުވިއެވެ.
އާޒިމް ވިދާޅުވީ ރައްޔިތުންގެ ދިރިއުޅުމަށް ހެޔޮ ބަދަލެއް ނާންނަ ކަމަށާއި، މުސާރަތައް ބޮޑުނުވާ ކަމަށެވެ. އެއްވެސް ދިމާލަކުން ތަރައްގީގެ މަޝްރޫއެއް ނުހިނގާއިރު، މަސައްކަތްތައް ހުއްޓިފައިވާ ކަމަށެވެ. އަދި ވިދާޅުވީ ބަލިވުމުން މީގެ ކުރިން ފަސޭހައިން ލިބެމުންއައި، އެންސްޕާ އާސަންދަ ނުލިބޭ ކަމަށާއި، ޑޮލަރުގެ އަގު އިންތިހާއަށް މަތިވެ، ޚިދުމަތްތަކާއި، ކާބޯތަކެތީގެ އަގު ދުވަހަކު މައްޗަށް ނުދާ މިންވަރަށް މަތިވެފައިވާ ކަަމަށެވެ.
އާޒިމް ވިދާޅުވީ ކެތްތެރިކަމަކީ ކޮޅުންލާ އެއްޗެއް ކަމަށާއި، މިގައުމުގެ ރައްޔިތުންގެ ކެތްތެރިކަން ވެސް ކޮޅުންލައި، ސަރުކާރާ ދެކޮޅަށް ނުކުންނާނެ ދުވަސް އަންނާނެ ކަމަށެވެ. އަދި އެހިސާބަށް ދިއުމުގެ ކުރިން ގައުމުގެ ހާލަތު ރަނގަޅު ކުރުމަށް އާޒިމް ގޮވާލެއްވިއެވެ.
