ހުއްދަނޫން ގޮތުގައި މީހަކު ހިފެހެއްޓި މައްސަލައެއްގައި ބަންގްލަދޭޝް މީހަކު ހައްޔަރުކޮށްފައިވާއިރު، ބަނގުރާ ގެންގުޅުމާއި، ބޭނުންކުރުމުގެ މައްސަލައެއްގައި ވެސް ބަންގްލަދޭޝް މީހަކު ހައްޔަރުކޮށް ބަންދުގެ މުއްދަތު ޖަހައިފިއެވެ.

ހުއްދަނޫން ގޮތުގައި މީހަކު ހިފެހެއްޓި މައްސަލާގެ ތުހުމަތުގައި ހައްޔަރު ކޮށްފައިވަނީ ބަންގްލަދޭޝްއަށް އުފަން، 28 އަހަރުގެ އެމްޑީ.އަލާއުއްދީން ހިރިޑޯއި އެވެ. ބަނގުރާ ގެންގުޅުމާއި، ބޭނުންކުރުމުގެ ތުހުމަތުގައި ހައްޔަރުކޮށްފައިވަނީ ބަންގްލަދޭޝްއަށް އުފަން 35 އަހަރުގެ ސުލްތާންއެވެ.

މިދިޔަ ހޮނިހިރު ދުވަހު ކްރިމިނަލް ކޯޓުން އެމްޑީ.އަލާއުއްދީން ހިރިޑޯއި ބަންދަށް 15 ދުވަސް ޖަހާފައިވާއިރު، ކޯޓު އަމުރުގައި ބުނެފައިވަނީ އޭނާގެ މައްޗަށް ތުހުމަތުކުރެވޭ ކުށް އޭނާ ކުރިކަމަށް ތުހުމަތުކުރެވޭ ކޮންމެވެސް މިންވަރެއްގެ ހެކި ގަރީނާ ހުށަހަޅާފައިވާ ކަމަށެވެ.

އިތުރުބަޔާނުގެ ގޮތުގައި ބުނެފައިވަނީ އޭނާގެ ފަރާތުން ތުހުމަތަށް އިންކާރު ކޮށްފައިވާ ކަމަށެވެ. ނަމަވެސް މިމައްސަލައަކީ އަނިޔާވެރިކަން ހިމެނޭ ކުށަކަށްވުމުގެ އިތުރުން މިއީ ގިނަ ބަޔަކުވެގެން ހިންގާފައިވާ އަމަލެއް ކަމަށް ލިޔުންތަކުގައި ފާހަގަކޮށްފައިވާ ކަމަށެވެ.

މީގެ އިތުރުން ހޮނިހިރު ދުވަހު ސުލްތާންގެ ބަންދަށް 15 ދުވަސް ޖަހާފައިވާއިރު، ކޯޓު އަމުރުގައި ބުނެފައިވަނީ އޭނާގެ މައްޗަށް ތުހުމަތުކުރެވޭ ކުށް އޭނާ ކުރިކަމަށް ތުހުމަތުކުރެވޭ ކޮންމެވެސް މިންވަރެއް ހެކި ގަރީނާ ހުށަހަޅާފައިވާ ކަމަށެވެ.

މިފަހަކަށް އައިސް ބިދޭސީން ކުށްތަކަށް އަރައިގަންނަ މައްސަލަތައް ރާއްޖޭގައި ދަނީ އިތުރުވަމުންނެވެ. މާރާމާރީ ހިންގުމާއި، މަސްތުވާތަކެތީގެ ވިޔަފާރި ކުރުމާއި، މީހުންނަށް އިންޒާރު ދިނުމާއި، ބްލެކްމެއިލް ކުރުން އަދި ފޭރުންފަދަ މައްސަލަތަކުގައި ބިދޭސީން ހައްޔަރުކޮށް ޑީޕޯޓު ކޮށްލާފައިވެއެވެ.