ޖެމެއިކާގެ ބޮޑުވަޒީރު އެންޑްރޫ ހޮލްނެސް، 53، ހޯމަ ދުވަހުގެ އިންތިޚާބު އޭނާގެ ލޭބަރ ޕާޓީ ކާމިޔާބު ކުރުމާއެކު، ތިންވަނަ ދައުރެއް ކާމިޔާބު ކުރައްވައިފިއެވެ.

ކެރިބިއަން ގައި އޮންނަ ޖެމެއިކާގެ އިލެކްޝަން ކޮމިޝަނުން ބުނިގޮތުގައި، ވަގުތީ ނަތީޖާތަކަށް ބަލާއިރު، ލޭބަރ ޕާޓީން 34 ގޮނޑި ކާމިޔާބުކޮށް، އިދިކޮޅު ޕީޕަލްސް ނެޝަނަލް ޕާޓީ (ޕީއެންޕީ) އިން 29 ގޮނޑި ހޯދާފައިވެއެވެ.

ޕީއެންޕީގެ ކެންޑިޑޭޓް މާރކް ގޯލްޑިންގ ވަނީ ބަލިވިކަން ގަބޫލުކޮށްފައެވެ.

ހޮލްނެސް ކެމްޕޭން ކުރެއްވީ އާމްދަނީން ނަގާ ޓެކްސް 25 އިންސައްތައިން 15 އިންސައްތަ އަށް ދަށްކުރުމަށެވެ. އަނެއް ކޮޅުން އިދިކޮޅު ގޯލްޑިންގ ބުނެފައި ވަނީ އާމްދަނީން ޓެކްސް ނެގޭ މިންވަރު އިތުރު ކުރާނެ ކަމަށެވެ.

ރަސްމީ ތަފާސް ހިސާބުތަކުން ދައްކާގޮތުން 2025 ގެ ފުރަތަމަ ކުއާޓަރގައި މީހުން މެރުމުގެ މައްސަލަތައް 25 އަހަރުގެ ތެރޭގައި އެންމެ ދަށް އަދަދަކަށް ވެއްޓިފައި ވުމާއެކު، ގައުމުގައި މާރާމާރީގެ މައްސަލަތައް މަދުކުރުމަށް ސަރުކާރުން ކުރި މަސައްކަތައް ގިނަ ވޯޓަރުން ހޮލްނެސް އަށް ކްރެޑިޓް ދީފައިވެއެވެ.

ކުށްކުރުން މަދުކުރުމަށް ބައެއް ސަރަހައްދުތަކުގައި ކުއްލި ނުރައްކަލުގެ ހާލަތު އިއުލާން ކުރުން ފަދަ ފިޔަވަޅު އެޅުމުގެ ސަބަބުން ފާޑުކިޔުންތައް އައި ނަމަވެސް، ރައްކާތެރިކަމުގެ އިހުސާސް އިތުރުވުމުން ހޮލްނެސްއަށް އިތުރު ދައުރެއް ހޯދުމަށް މަގުފަހިވިކަން ފާހަގަ ކުރެވެއެވެ.

ނަމަވެސް އިންތިޚާބުގެ ކެމްޕޭނުގައި މައިގަނޑު މައުޟޫއު އަކަށް އޮތީ އިގްތިސާދު ރަނގަޅު ކުރުމެވެ. ލޭބަރ ޕާޓީން ވަޒީފާ ނެތް މީހުންގެ ނިސްބަތް 3.3 އިންސައްތައިގައި ހިފެހެއްޓުން އެއީ އެ ޕާޓީގެ ކާމިޔާބީތަކުގެ ތެރެއިން ކަމެއްގެ ގޮތުގައި ފާހަގަ ކޮށްފައިވެއެވެ.

މައި އިދިކޮޅު ޕާޓީ ޕީއެންޕީން ސަރުކާރަށް ތުހުމަތުކުރީ ފައިސާ އިސްރާފުކުރާ ކަމަށެވެ.

އަދި ހޮލްނެސްގެ އާމްދަނީ އާއި މުދަލުގެ ބަޔާނާ މެދު ސުވާލު އުފައްދާފައިވާ ރިޕޯޓަކަށް ހަވާލާދީ، އޭނާގެ ތެދުވެރިކަމާ މެދު އިދިކޮޅުން ސުވާލު އުފައްދާފައިވެއެވެ.

އެއްވެސް ކަމެއް ގޯސްކޮށް ކޮށްފައި ނުވާނެ ކަމަށް ބުނަމުން، އަދި ސަރުކާރުގެ ރެކޯޑް ރަނގަޅު ވުމުން އިދިކޮޅަށް ފާޑުކިޔޭނެ މާގިނަ ކަމެއް ނެތުމުން، ޕީއެންޕީން އެ ރިޕޯޓް ބޭނުން ކުރަނީ "ސަމާލުކަން އެހެން ދިމާލަކަށް ބަދަލު ކުރުމަށް" ކަމަށް ހޮލްނެސް ވިދާޅުވެފައިވެއެވެ.

ވޯޓުލުމުގެ ނިސްބަތް 39.5 އިންސައްތައިގައި ދަށްކޮށް ހުރި ނަމަވެސް، އޯގަނައިޒޭޝަން އޮފް އެމެރިކަން ސްޓޭޓްސް (އޯއޭއެސް) އިން ފޮނުވި އޮބްޒާވަރުންގެ މިޝަނުން ޖެމެއިކާގައި ވޯޓު ލީ މީހުން ޒިންމާދާރުކަމާއި ފަޚުރުވެރިކަމާއެކު، ހަމަނުޖެހުމެއް ނެތި ގަވައިދާ އެއް ގޮތައް ކަންކަން ކުރިއަށް ގެންދިޔަ ކަމަަށް ބުނެ ތައުރީފު ކޮށްފައި ވެއެވެ.