ސިންގަޕޫރުގެ މަޖިލިހަށް ދޮގު ހެދިކަން ސާބިތުވެ މެމްބަރަކު ބޮޑު އަދަދަކުން ޖުރިމަނާ ކޮށްފި

ސިންގަޕޫރުގެ ކޯޓަކުން ހޯމަ ދުވަހު އިދިކޮޅު ޕާޓީގެ ލީޑަރު ޕްރިތަމް ސިންގް މަޖިލިހަށް ދޮގު ހެދުމުގެ ކުށް ކުރިކަން ސާބިތުވާ ކަމަށް ނިންމައި، ބޮޑު ޖޫރިމަނާއެއް ކޮށްފިއެވެ.

ވޯކަރސް ޕާޓީގެ ލީޑަރު ސިންގް އަށް 7،000 ސިންގަޕޫރު ޑޮލަރު (5،231 އެމެރިކާ ޑޮލަރު) ގެ ދެ ޖޫރިމަނާ އެއް ކޯޓުން ކަނޑައެޅިއެވެ.

ސިންގަޕޫރުގެ ޤާނޫނު އަސާސީގައި ބަޔާންކޮށްފައިވާ ގޮތުން، މެމްބަރެއްގެ މައްޗަށް ކުށް ސާބިތުވެ 10،000 ސިންގަޕޫރު ޑޮލަރަށްވުރެ ބޮޑު އަދަދެއްގެ ޖުރިމަނާ އެއް އަތުވެއްޖެ ނަމަ އެ މެންބަރެއްގެ ގޮނޑި ގެއްލި، ފަސް އަހަރު ދުވަހުގެ މުއްދަތަކަށް ސަރުކާރުގެ މަޤާމެއް އަދާ ނުކުރެވޭނެއެވެ. ސިންގް ގެ މައްޗަށް އައި ހުކުމަކީ މިއަށް ވުރެ ކުޑަ ޖުރިމަނާ އެއް ކަމަށް ވުމާއެކު އޭނާގެ ގޮނޑިއެއް ނުގެއްލޭނެއެވެ. އަދި އިންތިޚާބެއްގައި ވާދަ ކުރުމަކަށް ވެސް ހުރަހެއް ނޭޅޭނެއެވެ.

އުމުރުން 48 އަހަރުގެ ސިންގް ވިދާޅުވީ މި ޙުކުމަކީ އޭނާ ހިތްހަމަ ޖެހޭ ޙުކުމެއް ނޫން ކަމަށާއި މި ނިންމުން އިސްތިއުނާފު ކުރައްވާނެ ކަމަށެވެ.

މި ޙުކުމުގެ ސަބަބުން މިއަހަރުގެ ނޮވެންބަރު މަހުގެ ނިޔަލަށް ބޭއްވުމަށް ހަމަޖެހިފައިވާ އާންމު އިންތިޚާބަށް ތައްޔާރުވަމުންދާ ވޯކަރސް ޕާޓީގެ އިމޭޖަށް އަސަރުކޮށްފާނެ ކަމަށް ރިޕޯޓުތައް ބުނެއެވެ. 2020 ވަނަ އަހަރުގެ އެންމެ ފަހުގެ އިންތިޚާބުގައި ވެރިކަން ކުރާ ޕީޕަލްސް އެކްޝަން ޕާޓީއާ ދެކޮޅަށް ކުރިއެރުންތަކެއް ހޯދައި، ޕާލިމަންޓުގައި އެ ޕާޓީގެ ގޮނޑީގެ އަދަދު 6 އިން 10 އަށް ވަނީ އިތުރުވެފައެވެ.

އޭގެ ފަހުން ވޯކަރސް ޕާޓީއަށް ވަނީ ދެ މެންބަރަކު އިސްތިއުފާ ދިނުމުގެ ސަބަބުން ލޮޅުންތަކެއް ކުރިމަތިވެފައެވެ. އެއް މެންބަރަކު އިސްތިއުފާ ދެއްވީ މަޖިލިހަށް ދޮގު ބަޔާނެއް ދެއްވިކަން ހާމަ ވުމުންނެވެ. އަނެއް މެންބަރު އިސްތިއުފާ ދެއްވީ ކައިވެނިން ބޭރުން ގުޅުމެއް ބޭއްވިކަން ފަޅާ އެރުމުގެ ސަބަބުންނެވެ.

ސިންގްގެ މައްޗަށް ސާބިތުވީ 2021 ވަނަ އަހަރު ޕާލިމަންޓުގެ ކޮމިޓީ އަކަށް އޭނާގެ ޕާޓީގެ މެންބަރެއް ކަމުގައިވާ ރައީސާ ޚާން މަޖިލިހަށް ދޮގު ހެދި މައްސަލަ އާ ގުޅޭގޮތުން ހިންގި ތަހުގީގުގައި ސިންގް ދޮގު ހެކިބަސް ދިނުމުގެ ތުހުމަތެވެ.

ސިންގް ވިދާޅުވެފައިވަނީ ޕާލިމަންޓަށް ދޮގު ހެދިކަން އެއްބަސްވުމަށް ޚާން އަށް އޭނާ ބާރުއަޅުއްވާފައިވާ ކަމަށެވެ.

ނަމަވެސް ފަނޑިޔާރު ލޫކް ޓޭން ހޯމަ ދުވަހު ހުކުމް ކުރައްވަމުން ވިދާޅުވީ އެހެން ނޫންކަން ސާބިތުކޮށްދޭ ފުރިހަމަ ހެކިތަކާއި ހެކިންގެ ބަޔާންތައް ހުރި ކަމަށެވެ.

ބަޖެޓު ތަޤުރީރު ދެއްވުމަށް ތައްޔާރުވަމުންދާ ބޮޑުވަޒީރު ލޯރެންސް ވޯންގްގެ ޕީޕަލްސް އެކްޝަން ޕާޓީން ކުރިއަށް އޮތް އިންތިޚާބުގައި ގިނަ ގޮނޑިތައް ކަށަވަރުކޮށް، އިންތިޚާބު ކާމިޔާބު ކުރާނެކަން ވަރަށް ގިނަ ފަރާތްތަކުން ޔަގީން ކުރެއެވެ.

1965 ވަނަ އަހަރު މިނިވަންކަން ލިބުނީއްސުރެ ބޭއްވުނު ހުރިހާ އިންތިޚާބެއްގައި ވެސް އެ ޕާޓީން ވަނީ މިގޮތަށް ކާމިޔާބު ހޯދާފައެވެ. ނަމަވެސް 2020 ވަނަ އަހަރު، އިންތިޚާބުގައި އެ ޕާޓީ އަށް މިހާތަނަށް ލިބުނު އެންމެ ދަށް ނަތީޖާ ތަކުގެ ތެރެއިން އެއް ނަތީޖާ އާ ކުރިމަތި ލުމަށްފަހު، މި އިންތިޚާބުގައި އެ ޕާޓީއަށް ލިބޭ ވޯޓުގެ އިންސައްތަ އަށް ގިނަ ފަރާތްތަކުން ސަމާލުކަން ދޭނެ ކަމަށް ވަނީ ބެލިފައެވެ.

އިދިކޮޅު ޕާޓީގެ ލީޑަރު ސިންގް ވިދާޅުވީ މިއަދުގެ ޙުކުމުގެ ސަބަބުން އިންތިޚާބަށް ތައްޔާރުވުމުގައި އެ ޕާޓީގެ ހިތްވަރަށް އެއްވެސް އަސަރެއް ނުކުރާނެ ކަމަށެވެ.