އިޓަލީގެ މަޝްހޫރު ފެޝަން ޑިޒައިނަރު ޖިއޯޖިއޯ އަރްމާނީ މަރުވެއްޖެ

އިޓަލީގެ ފެޝަން ޑިޒައިނަރު އަދި ބިލިއަނަރު ޖޯޖިއޯ އަރްމާނީ މަރުވެއްޖެއެވެ.

އެނާ މަރުވި އިރު އުމުރަކީ 91 އަހަރެވެ.

އޭނާ އަކީ އިޓަލީގައި އުފެދުނު ސްޓައިލް އަދި އެލެގެންސްގެ ނަމޫނާއެކެވެ. އަދި ފިރިހެނުންނާއި އަންހެނުންގެ ހެދުން ޒަމާނީ ޒަމާނީ ކޮށް މުޅިން އައު ގޮތަކަށް ފަރުމާކުރި ފަރާތެކެވެ.

ފެޝަން ކުންފުންޏެއްގެ ގޮތުގައި ފެށުނު އަރްމާނީ، މިއުޒިކާއި، ކުޅިވަރު އަދި ލަގްޒަރީ ހޮޓާ ވިޔަފާރީ އަށް ފުޅާވެގެން ދިޔައެވެ. އޭނާ އަކީ ފެޝަން އާއި ވިޔަފާރީގެ ދާއިރާ ގައި އިޙްތިރާމް ލިބިފައިވާ މަހުޖަނެކެވެ.

އޭނާގެ ކުންފުންޏަށް އަހަރަކު 2 ބިލިއަން ޕައުންޑަށްވުރެ ގިނަ އާމްދަނީ ލިބެއެވެ.

ބްރޭންޑްގެ އިންސްޓަގްރާމް ޕޭޖްގައި ނެރުނު ބަޔާނެއްގައި ބުނެފައިވަނީ އަރްމާނީ "އެންމެ ފަހު ދުވަސްތަކާ ހަމައަށް ވެސް ގެންދިޔައީ ހުއްޓުމެއް ނެތި މަސައްކަތް ކުރަމުންނެވެ. އަދި ކުންފުންޏަށާއި، ކަލެކްޝަންތަކަށް އަދި ކުރިއަށް ހުރި ގިނަ މަޝްރޫޢުތަކަށް އަމިއްލަ ނަފްސު އިންވެސްޓް ކުރިއެވެ." އަދި އިތުރަށް ބުނެފައިވަނީ އޭނާއަކީ "އެންމެ ފަހު ވަގުތާ ހަމައަށްވެސް ވަރުބަލިކަމެއް ނެތް" މީހެއް ކަމަށެވެ.

ފެޝަން ޑިޒައިންގެ ދާއިރާގެ ފުންނާބު އުސް ފަރާތްތަކުގެ އިތުރުން އިޓަލީގެ ބޮޑުވަޒީރު ޖޯޖިއާ މެލޯނީ ވެސް އޭނާ މަރުވި ޚަބަރާ އެކު ހިތާމަ ފާޅުކުރެއްވި އެވެ.

މިއަހަރުގެ ޖޫން މަހު މިލާން ފެޝަން ވީކުގައި އަރްމާނީ ނުފެނުމާ ގުޅިގެން އޭނާގެ ސިއްޙަތާމެދު ކަންބޮޑުވުން އުފެދުނެވެ.

މެޑިސިންގެ ދާއިރާ އިން ކެރިއަރ ފަށައި، 1960 ގެ އަހަރުތަކުގައި ފެޝަންގެ ދާއިރާ އަށް ބަދަލުވެ، 1975 ގައި މަރުވި އަރްމާނީގެ ވިޔަފާރި ޕާޓްނަރު ސަރޖިއޯ ގަލެއޮޓީ އާއެކު އަމިއްލަ ލަގްޒަރީ ލޭބަލް އުފެއްދިއެވެ.

އޭނާ އަކީ ފެޝަނުން ބޭރުގައި، ކުޅިވަރަށް ލޯބިކުރާ މީހެކެވެ. އަދި ސެރީ-އާ ފުޓްބޯޅަ ޓީމް އިންޓަރ މިލާނަށް ތާއީދުކުރުމުގެ އިތުރުން އޮލިމްޕިއާ މިލާނޯ ބާސްކެޓްބޯޅަ ޓީމްގެ ވެރިފަރާތެވެ.

ފެޝަން ބްރޭންޑް ސްކުޑެރިއާ ފެރާރީ އެފް1 ޓީމާއެކުވެސް ޕާޓްނަރޝިޕެއް އޮތެވެ. އެޓީމުގެ ޑްރައިވަރެއްކަމަށްވާ ޗާލްސް ލެކްލާކް އިންސްޓަގްރާމްގައި ލިޔެފައިވަނީ "މިފަދަ އަޖައިބެއް ފަދަ މީހަކާ ބައްދަލުވެ މަސައްކަތްކުރުމުގެ ފުރުޞަތު ލިބުމަކީ ވަރަށް ބޮޑު ޝަރަފެކެވެ."

އަރްމާނީ އަށް ފެޝަންގެ ދާއިރާއިން ކޮށްފައިވާ މަސައްކަތްތަކަށްޓަކައި ފްރެންޗް ލީޖަން އޮފް އޮނަރ އަދި އިޓާލިއަން އޯޑަރ އޮފް މެރިޓް ފޯ ލޭބަރ ލިބިފައިވެއެވެ.