ޕެރިހުގެ ކޮތަރުގެ ޑޮކްޓަރުގެ ވާހަކަ

ފަރަންސޭސި ވިލާތުގެ ވެރިރަށް ޕެރިހުގައި ކޮތަރަކީ އާންމު ކޮށް ވަރަށް ގިނައިން ފެންނަ ދޫންޏެކެވެ. އެއީ ޕެރިހުގެ މުހިންމު އެއް ބަޔޭ ވެސް ބުނެވިދާނެ އެވެ. މި ކޮތަރުތައް ޕެރިހުގެ އެކި ކަންކޮޅުތަކުން ފެނެ އެވެ. ޚާއްސަކޮށް ބޮޑެތި ޕާކުތަކާއި މައިދާންތަކުންނާއި، މަޝްހޫރު ބިނާތަކުގެ ސަރަހައްދުތަކުން މީހުންނާ ވަރަށް ގާތުން އެތައް ކޮތަރެއް ފެނެ އެވެ. އެގޮތުން ކެތެޑްރަލް، ލޫވްރް މިއުޒިއަމް، އައިފިލް ޓަވަރު، ލަގްޒަމްބާގް ގާޑަންސް، ޕްލޭސް ޑެ ލާ ކޮންކޯޑް ފަދަ މައިދާން ތައް ކައިރީގައި އަބަދުވެސް ކޮތަރުތައް ހަރަކާތްތެރިވެ އުޅެ އެވެ.

ޕެރިހަށް ޒިޔާރަތްކުރާ މީހުންނާއި، އެ ޝަހަރު ގައި ދިރިއުޅޭ ބައެއް މީހުން، ކޮތަރުތަކަށް ކާނާ ދިނުމަކީ ވަރަށް އާންމު ކަމެކެވެ. ނަތީޖާއެއްގެ ގޮތުން، އެ ކޮތަރުތައް މީހުންނާ ވަރަށް ބޮޑަށް ގުޅެ އެވެ.

ކޮތަރުތަކުގެ ޞިއްޙަތަށް އަބަދުވެސް ސަމާލުކަން ދީ، އެއްވެސް ބަދަލެއް ފާހަގަވެއްޖެ ނަމަ އަވަހަށް ފިޔަވަޅު އެޅުމަކީ އެތަކެތި ދިރިހުރުމަށްޓަކައި ވަރަށް މުހިންމު ކަމެކެވެ. ދައްކަން މިއުޅެނީ ކޮތަރުތަކަށް އެހީތެރިވެދޭ ޕެރިހުގެ ރައްޔިތެއްގެ ވާހަކަ އެވެ.

އޭނާގެ މަސައްކަތަކީ ސިއްހީ މައްސަލަތައް ދިމާވެފައިވާ ކޮތަރުތަކަށް އެހީވުމެވެ. ފައި ހަލާކުވެ، އިނގިލިތައް ބުރިވެފައިވާ ކޮތަރު ތަކުގެ ހާލަތު ރަނގަޅު ކުރަން އޭނާ އެތައް މަސައްކަތެއް ކުރެއެވެ.

ކޮތަރުތަކަށް ސިއްހީ ގޮތުން ގެއްލުން ވަނީ އެތަކެތީގެ ހަށިގަނޑު ގައި ހުންނަ ކުނި ނުވަތަ ބަލިތަކެއް ގެ ސަބަބުން ކަމަށް ގިނަބަޔަކު ދެކޭއިރު، ސައިންސްވެރިން ބުނާ ގޮތުގައި މި މައްސަލަ ދިމާވަނީ ކޮތަރުގެ ފައިގަޔާއި ގުނަވަންތަކުގައި، އިންސާނުންގެ އިސްތަށި ފަދަ ތަކެތި ތާށިވެ، ލޭ ހިނގުން ހުއްޓިގެންނެވެ. "ސްޓްރިންގް ފުޓް" ގެ ނަމުން މަޝްހޫރު މި ހާލަތުގެ ސަބަބުން ކޮތަރުގެ އިނގިލިތައް ނުވަތަ ފައިގެ ބޮޑުބައި ގެއްލިދާނެ އެވެ.

ކޮންމެ ދުވަހަކު ވެސް، ޕެރިސް އަށް ނިސްބަތްވާ ކެތަރީން ހަރވޭސް، ޕެރިހުގެ މެދުތެރޭ ގައި ހުންނަ ޕޮމްޕިޑޫ ސެންޓަރ ކައިރީގައިވާ ހުސްބިމަކަށް ގޮސް، ބަލިވެފައިވާ ކޮތަރުތަކަށް އެހީތެރިވެ އެވެ. އޭނާ އެތަކެއްޗަށް ކާން ދީގެން ގާތް ކުރުމަށް ފަހު، ތޫނު އެއްޗެއް ބޭނުން ކޮށްގެން ފައިގައި ތާށިވެފައިވާ ތަކެތި ސަމާލުކަމާއެކު ނައްޓަ އެވެ.

ހަރވޭސް ބުނި ގޮތުގައި، އޭނާ ބޭނުން ވަނީ އެ ސަރަހައްދު ގައި ފަޔަށް ގެއްލުންވެ ބަލިވެފައިވާ ގިނަ ކޮތަރުތައް ރަނގަޅުކޮށް އުޅެވޭނެ ގޮތް ހެދުމަށެވެ.

"މިކަމުން އަހަރެންނަށް އަސަރުކުރާ އިރު، ދުނިޔެ ބަދަލުކުރުމުގެ ބާރެއް އަހަރެންނަކަށް ނުލިބޭނެ. އެހެންކަމުން އަހަރެންނަށް ކުރެވޭ ކަމެއް ކުރާނަން އަދި އެހީތެރިވެވޭނެ ހިނދެއްގައި އެހީތެރިވާނަން."

ބައެއް މީހުން ކޮތަރުތައް ޝަހަރުގެ ރީތިކަމާއި ފުރިހަމަ ކަމުގެ ބަޔެއްގެ ގޮތުގައި ދެކެ އެވެ. އަދި ޝަހަރުގެ މަޝްހޫރު މަންޒަރުތައް ފުރިހަމަކޮށްދޭ އެއްޗެއްގެ ގޮތުގައި ވެސް ދެކެ އެވެ. އެކަމަކު އެކަމާ ޚިޔާލު ތަފާތު މީހުން ވެސް އުޅެއެވެ. އެ ފަދަ މީހުން ސިފަ ކުރާ ގޮތުގައި ކޮތަރަކީ "އުދުހޭ މީދާ" އެވެ. އެއީ އެތަކެތީގެ ސަބަބުން އިމާރާތްތަކަށް ގެއްލުންވުމާއި، ޚާއްސަކޮށް އެތަކެތީގެ ކުނި، ސިއްހީ ގޮތުން ބައެއް މައްސަލަތައް ކުރިމަތިވުމުގެ ފުރުސަތު އޮންނާތީ އެވެ.