ކްރިސްޓިއާނޯ ރޮނާލްޑޯ އާއި ޖޯޖީނާ ރޮޑްރިގޭޒް އެންގޭޖްމަންޓް އިއުލާން ކޮށްފި އެވެ.

ދުނިޔޭގެ އެންމެ މަޝްހޫރު ފުޓްބޯޅަ ކުޅުންތެރިންގެ ތެރޭގައި ހިމެނޭ ކްރިސްޓިއާނޯ ރޮނާލްޑޯ އޭނާގެ ގިނަ ދުވަސްވީ ޕާޓްނަރ ޖޯޖީނާ ރޮޑްރިގޭޒް އަށް ކައިވެނި ހުށަހެޅި ވާހަކަ ހާމަވެގެން ދިޔައީ ރޮޑްރިގެޒް އިންސްޓަގްރާމް ގައި ބޮޑު އޯވަލް-ކަޓް ޑައިމަންޑް އަނގޮޓިއެއްގެ ފޮޓޯ ޝެއަރ ކުރުމާއި އެކުގައެވެ.

2016 ވަނަ އަހަރު މެޑްރިޑްގެ ގުޗީ ފިހާރައަކުން ދިމާވި މި ދެމީހުން މިހާރު ވަނީ ތިން ކުދިން ހޯދާފައެވެ. އަދި ރޮނާލްޑޯގެ އެންމެ ބޮޑު ދަރިފުޅު ކްރިސްޓިއާނޯ ޖޫނިއަރ ވެސް ބަލަހައްޓަމުން ގެންދަނީ ދެމީހުން ވެގެންނެވެ.

ރޮޑްރިގޭޒް އޭނާގެ ޕޯސްޓްގައި ސްޕެނިޝް ބަހުން ލިޔެފައިވަނީ، "އައި ޑޫ. މި ދިރިއުޅުމުގައި އަދި އަހަރެންގެ ހުރިހާ ދިރިއުޅުމެއްގައި ވެސް" މިފަދައިންނެވެ.

ޖުވެލަރީ މާހިރުންގެ ލަފާ ކުރާ ގޮތުގައި، މި އަނގޮޓީގެ ބަރުދަނުގައި 25 އާއި 30 ކެރެޓް އާ ދެމެދުގައި ހުންނާނެ އެވެ. އަދި މީގެ އަގު 2 މިލިއަން އާއި 5 މިލިއަން ޑޮލަރާ ދެމެދުގައި ހުންނާނެ ކަމަށް ގިނަ ނޫސްތަކުން ރިޕޯޓް ކޮށްފައިވެއެވެ.

މިހާރު ސައުދީ އަރަބިއްޔާ ގެ އަލް ނަސްރުގައި ކުޅެމުންދާ ރޮނާލްޑޯ ކުރިން ދީފައިވާ އިންޓަވިއުތަކުގައި ރޮޑްރިގޭޒް އާ ކައިވެނި ކުރާނީ "ރަނގަޅު ވަގުތު" އައުމުން ކަމަށް ބުނެފައިވެއެވެ.

މި ޖޯޑު ވަނީ 2022 ގައި އެމީހުންގެ ނިއުބޯން ޓްވިންސްގެ ތެރެއިން އެއް ކުއްޖަކު ގެއްލުމުގެ ހިތާމަވެރި ހާދިސާއާ ވެސް ކުރިމަތިލާން ޖެހިފައެވެ.

މި އެންގޭޖްމަންޓް އިއުލާން ކުރެވުނީ ރޮނާލްޑޯ ސައުދީ ޕްރޯ ލީގްގައި ކުޅެމުންދާ ސީޒަންގައެވެ. އޭނާ އަކީ މިހާރު ދުނިޔޭގެ އެންމެ މުސާރަ ބޮޑު ކުޅުންތެރިންގެ ތެރެއިން އެކަކެވެ.