އެމްޕީއެލް އިން 56 އެމްބިއުލާންސް ގަތުމުގައި ކޮރަޕްޝަންގެ ތުހުމަތު!

ސަރުކާރުން އެމްޕީއެލް އާ ހަވާލުކޮށްގެން ގެންނަން ނިންމާފައިވާ 56 އެމްބިއުލާންސް ގަތުމުގައި ކޮރަޕްޝަނަށް މަގުފަހިވާ ގޮތަށް ކަންތައްތަކެއް ހިނގާކަމަށް ރާއްޖެ އެމްވީ އަށް މައުލޫމާތު ލިބިއްޖެއެވެ. މި މަސައްކަތަކީ ގާތްގަނޑަކަށް 3 މިލިއަން ޑޮލަރުގެ މަޝްރޫއެއް ކަމަށްވާއިރު، މިކަން ކުރިއަށް ގެންދިއުމަށް ރޭވިފައިވާ ގޮތާމެދު މިހާރު ދަނީ ސުވާލު އުފެދެމުންނެވެ.

ލިބިފައިވާ މައުލޫމާތުން އެނގޭ ގޮތުގައި، މި މަސައްކަތް ކުރިއަށް ގެންދިއުމަށް އެމްޕީއެލްގެ ސީއެފްއޯ ނިންމާފައިވަނީ ހަމައެކަނި އެއް ފަރާތެއްގެ ކޯޓޭޝަން ހޯދައިގެންނެވެ. މިގޮތަށް އަމަލު ކުރުމަކީ، މިފަދަ ބޮޑު އަދަދެއްގެ ދައުލަތުގެ ފައިސާ ހިމެނޭ މަަސައްކަތްތަކުގެ އާންމު އުސޫލުތަކާ ޚިލާފު ކަމެއްކަމަށް ފާހަގަކުރެވެއެވެ.

ޚާއްސަކޮށް ފާހަގަކޮށްލަންޖެހޭ ކަމަކީ، އެމްޕީއެލްއަކީ މީގެ ކުރިން އެމްބިއުލާންސް ފަދަ މެޑިކަލް އިކުވިޕްމަންޓް އިމްޕޯޓްކުރުމުގެ ތަޖުރިބާ ލިބިފައިވާ ކުންފުންޏެއް ނޫންކަމެވެ. އެހެންކަމުން، މިފަދަ މަސައްކަތެއް އެމްޕީއެލްއާ ހަވާލުކުރެވިފައިވާ ސަބަބާމެދުވެސް ސުވާލު އުފެދެއެވެ. އާއްމު ގޮތެއްގައި ސަރުކާރުގެ ފަރާތުން ރާއްޖެ އަށް އެމްބިއުލާންސް ގެންނަނީ، ރާއްޖެއަށް އެންމެ ގިނަ ބޭސް، މެޑިކަލް އިކުއިޕްމެންޓްސް އަދި މެޝިނަރީސް ވެސް އެތެރެކުރާ ކުންފުނި، އެސްޓީއޯ މެދުވެރިކޮށެވެ.

ރާއްޖެ އެމްވީ އަށް މައުލޫމަތު ލިބިފައިވާގޮތުން އެމްޕީއެލްއިން އެމްބިއުލާންސްތައް ގަންނަން ނިންމާފައިވަނީ ދުބާއީގެ "އެބްރޮން" ނަމަކަށް ކިޔާ ކުންފުންޏަކުންނެވެ. މި މަޝްރޫޢުގެ ދަށުން "ޓޮޔޯޓާ ލައިޓްއޭސް" ބްރޭންޑްގެ 56 ވޭން، އެމްބިއުލާންސް ތަކަށް ބަދަލުކުރުމަށް ވަނީ ރޭވިފައެވެ.

މާކެޓް ރޭޓަށް ބަލާއިރު، "ޓޮޔޯޓާ ލައިޓްއޭސް" ވޭނެއްގެ އަގު އެވްރެޖްކޮށް ހުރީ، 19000 (ނަވާރަ ހާސް) އެމެރިކާ ޑޮލަރުގައެވެ. ނަމަވެސް އެމްޕީއެލް އިން ބޭނުންވާ ގޮތަށް އެމްބިއުލަންސަކަށް ބަދަލުކުރުމުން 55,000 (ފަންސާސް ފަސް ހާސް) އެމެރިކާ ޑޮލަރު ޚަރަދުވާނެ ކަމަށް ލިބިފައިވާ ލިޔެކިޔުންތަކުން ހާމަވެއެވެ. 56 އެމްބިއުލާންސަށް ޖުމްލަ 3,080,000 (ތިން މިލިއަން އަށްޑިހަ ހާސް) އެމެރިކާ ޑޮލަރު ޚަރަދުވާނެ އެވެ. ދިވެހި ރުފިޔާއިން ބަލާނަމަ މިއީ (1 ޑޮލަރަކީ 15.42 ރުފިޔާކަމަށް ބަލާފަ) 47،493،600 (ސާޅީސް ހަތް މިލިއަން ހަތަރު ލައްކަ ނުވަދިހަ ތިންހާސް ހަ ސަތޭކަ) މިލިއަން ރުފިޔާއެވެ.

މި މައްސަލައިގައި އެންމެ ކަންބޮޑުވާ ކަމަކީ، މިފަދަ ބޮޑު މަޝްރޫޢެއް ވާދަވެރި ބިޑިންގ ޕްރޮސެސްއަކާ ނުލައި، އަދި އެމްޕީއެލްގެ ތަޖުރިބާއެއް ނެތް ދާއިރާއަކުން ކުރިއަށް ގެންދިއުމަށް ނިންމާފައިވުމެވެ. މީގެ އިތުރުން، އެމްބިއުލާންސްތަކުގެ އަގު މާކެޓް ރޭޓަށްވުރެ ބޮޑުތަން މަތިކަމަށްވެސް ބައެއް ފަރާތްތަކުން ފާހަގަ ކުރެއެވެ.

މި މައްސަލައާ ގުޅޭގޮތުން ގިނަ ފަރާތްތަކުން ވަނީ ކަންބޮޑުވުން ފާޅުކޮށް، މިކަން ތަހުގީގުކުރުމަށް ގޮވާލާފައެވެ. އަދި މި މަޝްރޫޢުގައި ވަކި ފަރާތްތަކަކަށް ނާޖާއިޒު މަންފާއެއް ލިބޭގޮތަށް ކަންކަން ރޭވިފައިވާކަމުގެ ތުހުމަތުތައް ވެސް ކުރެވެމުންދެއެވެ. ޕްރޮކިއުމަންޓް އުސޫލުތަކާއި ދައުލަތުގެ މާލިއްޔަތު ގަވާއިދާ އެއްގޮތަށް މިފަދަ ބޮޑެތި މަޝްރޫއުތައް ކުރިއަށް ގެންދިއުމަށް އިދިކޮޅު ފަރާތްތަކުންދަނީ ސަރުކާރަށް ގޮވާލަމުންނެވެ.

މިފަދަ މައްސަލަތަކާ ގުޅޭގޮތުން ކަމާބެހޭ އިދާރާތަކުން އަވަސް ތަހުގީގެއް ހިންގައި، ދައުލަތުގެ ފައިސާއަށް ޚިޔާނާތްތެރިވުމުގެ އެއްވެސް ޢަމަލެއް ހިނގާފައިވޭތޯ ބެލުމަށް ގިނަ ފަރާތްތަކުން ގޮވާލަމުންދެއެވެ. އަދި މިފަދަ މަސައްކަތައް ހުއްޓުވާ، ހާމަކަން ބޮޑު ގޮތެއްގައި އަލުން އިއުލާނުކޮށްގެން ކުރިއަށް ގެންދިއުމަށްވެސް އެފަރާތްތަކުން އެދެމުންދެއެވެ.

ކުރީގެ ރައީސް އިބްރާހިމް މުޙައްމަދު ޞާލިހް ގެ ފަސް އަހަރުތެރޭ ޖުމްލަ 167 އެމްބިއުލާންސް ރާއްޖެ ގެނެސްފައިވާއިރު، އޭގެ ތެރޭގައި އެސްޓީއޯ މެދުވެރިކޮށް ގެނައި އެމްބިއުލާންސްތައް ގިނަކަން ފާހަގަކޮށްލެވެ އެވެ. އެގޮތުން، އެސްޓީއޯއާއެކު ވެފައިވާ އެއްބަސްވުމެއްގެ ދަށުން ރާއްޖޭގެ ހުރިހާ ރަށަކަށް އެމްބިއުލާންސް ފޯރުކޮށްދިނުމަށް 124 އެމްބިއުލާންސް ގެނެސްފައިވެއެވެ.

އޭގެ އިތުރަށް އަވަށްޓެރި ދެ ގައުމެއްގެ އެހީގެ ދަށުންނާއި ހަދިޔާ ކޮށްގެން ރާއްޖެއަށް 32 އެމްބިއުލާންސް ގެނެސްފައިވެ އެވެ. އެއީ ޖަޕާނު ސަރުކާރުން ރާއްޖެއަށް ހަދިޔާކުރި 21 އެމްބިއުލާންސާއި، އިންޑިއާ ސަރުކާރުގެ ހިލޭ އެހީގެ ދަށުން ގެނައި 11 އެމްބިއުލާންސެވެ.

ހަމައެއާއެކު އަލަށް އެމްބިއުލާންސް ނުދެވޭ ރަށްތަކަށް، ސަރުކާރުގެ ބަޖެޓުން ވެސް ހަތަރު އެމްބިއުލާންސެއް ހޯދާފައި ވެއެވެ. އަދި އިމަޖެންސީ މެޑިކަލް ސާވިސަސް (އީއެމްއެސް) ހިދުމަތް ފެށުމަށް ވެސް ހަތް އެމްބިއުލާންސް ރައީސް ޞާލިހުގެ ސަރުކާރުން ގެނެސްފައި ވެއެވެ.