ސަރުކާރު ބަދަލުވި ގޮތަށް ދިގުރަށުގައި ތަރައްގީކުރަން ފެށި މިސްކިތުގެ މަސައްކަތް ހުއްޓިފައި
އދ. ދިގުރަށުގައި ބިނާކުރަން ފަށާފައިވާ މިސްކިތުގެ މަސައްކަތް ސަރުކާރު ބަދަލުވުމާއެކު ހުރީ ހުއްޓިފަ
އދ ދިގުރަށު ކައުންސިލް ރައީސް އިބުރާހީމް އުސްމާން: ވިދާޅުވީ ސަރުކާރު ބަދަލުވި ފަހުން މިސްކިތުގެ މަސައްކަތް އެއްކޮށް ހުއްޓިފައިވާ ކަމަށް
ރައީސް އިބުރާހީމް މުހައްމަދު ޞާލިހުގެ ސަރުކާރު ބަދަލުވިފަހުން އދ. ދިގުރަށުގައި ބިނާކުރަން ފަށާފައިވާ މިސްކިތުގެ މަސައްކަތް ހުއްޓުނު ގޮތަށް އެތަނުގެ މަސައްކަތް ނުފަށާ ކަމަށް އެރަށު ކައުންސިލްގެ ރައީސް އިބުރާހީމް އުސްމާން ވިދާޅުވެއްޖެ އެވެ.
ރާއްޖެޓީވީގެ 'ހާލު ކިހިނެއް' ޕްރޮގްރާމުގައި ވާހަކަ ދައްކަވަމުން އުސްމާން ވިދާޅުވީ އެ މިސްކިތަކީ ރައީސް ޞާލިހުގެ ސަރުކާރުން 2022 ވަނަ އަހަރަު ތަރައްގީކުރަން ފެށި މިސްކިތެއް ކަމަށާއި ސަރުކާރު ބަދަލުވި ފަހުން އެ މިސްކިތުގެ މަސައްކަތް ވަނީ ހުއްޓިފައި ކަމަށެވެ.
އުސްމާން ވިދާޅުވީ ސަރުކާރު ބަދަލުވި ފަހުން މިހާތަނަށް އަހަރެއް ވެގެން ދިޔައިރުގައި ވެސް މިސްކިތުގެ އެއްވެސް މަސައްކަތެއް ކުރަމުން ނުދާކަމަށެވެ. މިސްކިތުގެ ބޮޑުބައެއް މިދިޔަ ސަރުކާރުން ނިންމާފައިވާ ކަން ފާހަގަކޮށް އޭނާ ވިދާޅުވީ މިހާރު ވަރަށް ކުދިކުދި މަސައްކަތް ކޮންމެވެސް ވަރަކަށް ކުރަމުން އަންނަ ކަމަށެވެ.
އުސްމާނު ވިދާޅުވީ މި ސަރުކާރު އައިސް މިސްކިތުގެ ނުނިމި ހުރި މަސައްކަތް ކުރުމަށް ބަޔަކާއި ހަވާލުކޮށްފައިވާ ކަމަށާއި ނަމަވެސް މިސްކިތުގެ މުންނާނު ބިނާކުރަން ހަވާލުކޮށްފައި ނުވާކަމަށެވެ. އެހެން ނަމަވެސް މިހާރު އަލުން އެ މިސްކިތުގެ މުންނާރު ބިނާކުރަން ބަޔަކާއި ވަކިން ހަވާލުކުރަން އުޅޭ ކަމަށް މައުލޫމާތު ލިބިފައިވާ ކަމަށް އޭނާ ވިދާޅުވި އެވެ.
އުސްމާން ވިދާޅުވީ މިސްކިތު މުންނާރުގެ ކަންކަން މިހާރު އޮތީ ފިނޭންސް މިނިސްޓްރީގައި ކަމަށް ބުނާ ކަމަށާއި މުންނާރު އޮތީ މިސްކިތާއި ވަކިވެފައި ކަމަށެވެ.
އަޅުގަނޑުމެން އެންމެން ވެސް ބޭނުމީ ވީހާ ވެސް އަވަހަށް މިސްކިތް ހުޅުވަން. އެހެން ނަމަވެސް އަދި މިސްކިތް ނިންމުމަސް ކުރަން ޖެހޭ ބައެއް މަސައްކަތް އެބަހުރ. މިދިޔަ ސަރުކާރުން ބިނާކުރަން ފެށި މިސްކިތެއް މިއީ. މަސައްކަތުގެ ބޮޑުބައެއް ހުރީ ނިންމާފަ. އެހެން ނަމަވެސް ވެރިކަން ބަދަލުވި ފަހުން މަސައްކަތް ހުރީ ހުއްޓިފަ. މިސްކިތުގެ މުންނާރެއް ނެތް. މި ސަރުކާރު އައިސް މަސައްކަތް ހަވާލުކުރި އިރު، މުންނާރުގެ މަސައްކަތް ހާވު ނުކުރޭ. ނަމަވެސް މިހާރު މުންނާރުގެ މަސައްކަތް ވަކިން ހަވާލުކޮށްފައި ވާކަމަށް މައުލޫމާތު ލިބެނީ. މިސްކިތަށް ކިޔާނެ ކަމަށް "މަސްޖިދުލް ޞާލިހު" ކައުންސިލުން ފާސްކޮށްފައި އޮތީ. އެހެން ނަމަވެސް މިނިސްޓްރީލް އަދި އެ ނަން ފައިނަލް ނުކުރޭ.އދ. ދިގުރަށުގެ ކައުންސިލް ރައީސް އިބިރާހީމް އުސްމާން
ރައީސް ޑރ މުހައްމަދު މުއިއްޒު އދ ދިގުރަށަށް ވަރަށް އަވަހަށް ވަޑައިގަތުމަށް ހަމަޖެހިފައިވާ ކަން ފާހަގަކުރައްވައި އުސްމާން ވިދާޅުވީ މިސްކިތުގެ މުންނާރު ނެތުމުން ރިނބަން ކަނޑާލެވޭވަރު ވެދާނޭ ކަމަށް ގަބޫލު ނުކުރައްވާ ކަމަށެވެ.
އެހެން ނަމަވެސް އުންމީދަކީ ރައީސް ވަޑައިގެން މިސްކިތަށް ޚާއްސަ ސަމާލުކަމެއް ދެވައި އެ މިސްކިތުގެ މަސައްކަތް އަވަހަށް ނިންމަވާލައްވައި އެތަނުގައި ރަށުގެ ރައްޔިތުންނަށް ނަމާދުކޮށްލެވޭ ވަރު ވުން ކަމުގައި އުސްމާން ވިދާޅުވި އެވެ.
