މީހަކު ރަހީނުކޮށްގެން ހައްޔަރުކުރި 2 މީހުންގެ ބަންދަށް 15 ދުވަސް
ގަވާއިދާ ހިލާފަށް ރާއްޖޭގައި ދިރިއުޅޭ ބަންގްލަދޭޝްގެ ދެ މީހުން އެހެން ބަންގްލަދޭޝް މީހަކު ހިފަހައްޓައި އަނިޔާކޮށް ފައިސާ އަތުލި
މީހަކު ރަހީނުކޮށް އަނިޔާކުރިމުގެ ތުހުމަތުގައި ހައްޔަރު ކޮށްފައިވާ 2 މީހުން
މީހަކު ރަހީނުކޮށް އަނިޔާކުރިކަމުގެ ތުހުމަތުގައި ހައްޔަރުކުރެވުނު ބަންގްލަދޭޝްގެ ދެ ރައްޔިތެއްގެ ބަންދު މުއްދަތު 15 ދުވަހަށް ކްރިމިނަލް ކޯޓުން އިތުރުކޮށްފިއެވެ.
ފުލުހުން މައުލޫމާތު ދީފަވާގޮތުގައި މި ހާދިސާ ހިނގާފައިވަނީ އޮގަސްޓް 14 ވަނަ ދުވަހުގެ ރޭ 2:20 އެހާކަންހާއިރުއެވެ. މި މައްސަލައިގައި ހައްޔަރުކުރެވުނު ދެ މީހުންނަކީވެސް 37 އަހަރުގެ ބަންގްލަދޭޝް ރައްޔިތުންނެވެ. މި ދެމީހުންނަކީވެސް ގަވާއިދާ ހިލާފަށް ރާއްޖޭގައި ދިރިއުޅޭ ބިދޭސީންނެވެ.
ފުލުހުން ކޯޓުގައި ބުނެފައިވާގޮތުން، މި ދެމީހުން ވަނީ އެހެން ބަންގްލަދޭޝް ރައްޔިތެއް ހުއްދަނޫން ގޮތުގައި ހިފަހައްޓައި، އޭނާއަށް އަނިޔާކޮށް، ގިނަ އަދަދެއްގެ ފައިސާ އަތުލާފައެވެ. އަދި މި ދެމީހުން ހައްޔަރު ކުރެވިފައިވަނީ ހާދިސާ ހިނގި ތަނުންނެވެ.
ފުލުހުން ކޯޓަށް ހުށަހެޅި ހެކިތަކުގެ ތެރޭގައި ހާދިސާ ހިނގި ސަރަހައްދުގެ ފޮޓޯތަކާއި، އަނިޔާ ލިބުނު ފަރާތުގެ ފޮޓޯތައް ހިމެނެއެވެ. ރަހީނުކުރި ފަރާތަށް އެކި ވަރުގެ އަނިޔާތައް ލިބިފައިވާކަން ފުލުހުން ވަނީ ފާހަގަކޮށްފައެވެ.
ކްރިމިނަލް ކޯޓުން މި ދެމީހުންގެ ބަންދު މުއްދަތު އިތުރުކޮށްފައިވަނީ، ތުހުމަތުކުރެވޭ މިންވަރަށް ހެކި ހުރިކަމަށް ފާހަގަކުރެވޭތީއެވެ. އަދި މި މައްސަލައިގެ ތަހުގީގު ފުލުހުން ދަނީ ކުރިއަށް ގެންދަމުންނެވެ.
ފަހަކަސް އައިސް ބިދޭސީންގެ މެދުގައި ބޮޑެތި ކުށްކުރުން ރާއްޖޭގައި ވަނީ ވަރަށް ބޮޑަށް އިތުރުވެފައެވެ. ވަކިން ޚާއްސަކޮށް މަސތުވާތަކެތީގެ މައްސަލާތާކާއި މާރާމާރީގެ މައްސަލަތައް ފާހަގަ ކުރެވެއެވެ. ގިނަފަހަރު މިކަހަލަ ކުށްތަކަށް އަރައިގަންނަ ބިދޭސީންނަކީ ގަވާއިދާ ހިލާފަށް ރާއްޖޭގައި ދިރިއުޅޭ މީހުންނެވެ. ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމުގައި މި ސަރުކާރު ފެއިލް ވެފައިވާ ކަމަށް އިދިކޮޅު ފަރާތްތަކުން ފާހަގަކުރެއެވެ.
