އެމްޔޫ މަނިކަކީ އިޖްތިމާއީ ދާއިރާއިން ގިނަ ހިދުމަތްތަކެއް ކޮށްދެއްވި ބޭފުޅެއް: ރައީސް ޞާލިހް
އެމްޔޫ މަނިކަކީ ފަތުރުވެރިކަމުގެ އިތުރުން ތަޢުލީމީ އަދި ސިއްޙީ ދާއިރާއަށް ގިނަ ޚިދުމަތްތަކެއް ކޮށްދެއްވި ބޭފުޅެއް
3 އޮކްޓޯބަރު 2022 ގައި ބޭއްވުނު ޓޫރިޒަމް ގޯލްޑެން އިޔަރ ގަލާ އިވްނިންގ ގައި، ރައީސް އިބްރާހިމް މުހައްމަދު ޞާލިހް (ކ) ރައީސުލްޖުމްހޫރިއްޔާގެ ޓޫރިޒަމް ގޯލްޑަން އެވޯޑް މުހައްމަދު އުމަރު މަނިކް (އެމްޔޫ މަނިކް) (ވ) އަށް ދެއްވަނީ
ހޮނިހިރު ދުވަހުގެ ހެނދުނު ސިންގަޕޫރުގައި ފަރުވާ ހޯއްދަވަމުން ދަނިކޮށް އަވަހާރަވި ރާއްޖޭގެ ޓޫރިޒަމްގެ އެއް ބާނީ އަދި ޔުނިވާސަލް އެންޓަޕްރައިޒަސްގެ ޗެއާމަން މުހައްމަދު އުމަރު މަނިކު (އެމްޔޫ މަނިކު) އަކީ ޓޫރިޒަމްގެ އިތުރުން އިޖްތިމާއީ ދާއިރާއިން ވެސް ދިވެހީންނަށް ގިނަ ގުނަ ހިދުމަތްތަކެއް ކޮށްދެއްވި ބޭފުޅެއްކަމަށް، ކުރީގެ ރައީސް އިބްރާހިމް މުހައްމަދު ޞާލިހް ވިދާޅުވެއްޖެ އެެވެ.
އެމްޔޫ މަނިކު އަވަހާރަވުމާ ގުޅިގެން ފޮނުއްވި ތައުޒިޔާގެ މެސެޖުގައި ރައީސް ޞާލިހް ވިދާޅުވީ، ދިވެހިރާއްޖެއަށް ފަތުރުވެރިކަން ތަޢާރަފްކޮށް އަދި ޒަމާނީ ކުރިއެރުންތައް ގެނެސްދެއްވި އެއް ބާނީ ކަމުގައިވާ ނިޝާން މުލީގޭ ޝަރަފުގެ ޢިއްޒަތުގެވެރި މުޙައްމަދު ޢުމަރު މަނިކު (އެމްޔޫ މަނިކު) އަވަހާރަވި ޚަބަރު އެހީ ނުހަނު ފުން ހިތާމަޔާއެކުގައި ކަމުގައެވެ. އަދި މިހިތާމާގައި އެމަނިކުފާނުގެ އާއިލާއާއި ބައިވެރިވާކަން ހާމަކޮށް ރައީސް ޞާލިހް ވަނީ ތައުޒިޔާ ދަންނަވާފައެވެ.
އެމްޔޫ މަނިކަކީ ފަތުރުވެރިކަމުގެ ސިނާއަތް ކުރިއެރުވުމަށް ގިނަ ހިދުމަތްތަކެއް ކުރެއްވުމުގެ އިތުރުން ދިވެހި ދައުލަތަށްވެސް 19 އަހަރަށްވުރެ ގިނަ ދުވަހު ހިދުމަތް ކުރައްވާފައިވާ ހިދުމަތް ތެރިއެއްކަން ރައީސް ޞާލިހް ވަނީ ފާހަގަކުރައްވާފައެވެ.
މީގެ އިތުރުން އިޖްތިމާއީ ދާއިރާއިންވެސް ގައުމަށް ނުހަނު ގިނަ ހިދުމަތްތަކެއް ކޮށްދެއްވަމުން ގެންދެވި އެމްޔޫ މަނިކަކީ ސިއްހީ ދާއިރާ އަށާއި ތައުލީމީ ދާއިރާއަށް، މަތީތައުލީމުގެ ފުރުސަތު ފަހިކޮށް މީހުން ބިނާކުރުމަށް ވަރަށް ގިނަބަޔަކަށް ދީލަތި އެހީތެރިކަން ފޯރުކޮށްދެއްވަމުން ގެންދެވި ބޭފުޅެއްކަން ރައީސް ޞާލިހް ފާހަގަކުރެއްވި އެވެ.
ރާއްޖޭގެ ޓޫރިޒަމްގައި އެންމެ ބޮޑު އެއް ކުންފުނި ޔުނިވާސަލް އެންޓަޕްރައިޒަސްގެ ޗެއާމަން، އެމްޔޫ މަނިކު އުމުރުފުޅުން 78 އަހަރުގައި އަވަހާރަަވީ ސިއްހީ ހާލުކޮޅު ގޯސްވެގެން ޖުލައި މަހު ފަހުކޮޅު ސިންގަޕޫރަށް ގެންގޮސް، މައުންޓު އެލިޒަބަތު ހޮސްޕިޓަލްގައި ފަރުވާ ދެމުން ދަނިކޮށެވެ.
އަވަހާރަވިއިރު އަނބިކަނބަލަކާއި ދެ ބޭފުޅުން ދުނިޔޭގައި އެބަ ތިއްބެވި އެވެ.
