އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގައި ދެމުން އަންނަ ހަމަލާތަކުގެ އަސަރު، ހަމާސް ޖަމާއަތުގެ ބެލުމުގެ ދަށުގައި ތިބި އިސްރާއީލްގެ ރަހީނުންނަށް ވެސް ކުރާނެ ކަމަށް އެ ޖަމާއަތުން ބުނެފި އެވެ.

އިސްރާއީލް އިން ވަނީ ދާދި ފަހުން ޣައްޒާ ސިޓީ ހިފުމުގެ އައު ޕްލޭނެއް އެކުލަވާލައި، އެކަން ތަންފީޒު ކުރުމަށް ފަށައިފަ އެވެ. އެގޮތުން ޣައްޒާ އަށް ދެމުން އަންނަ ހަމަލާތައް އިތުރަށް ވަރުގަދަ ކޮށްފައިވެ އެވެ.

ހަމާސް އިން ވަނީ، އިސްރާއީލް އިން ޣައްޒާ ސިޓީ ހިފުމަށް ރާވާފައިވާ ރޭވުންތަކާއި، ދެމުން އަންނަ ހަމަލާ ތަކުގެ ސަބަބުން އެ ޖަމާއަތުގެ ބެލުމުގެ ދަށުގައި ތިބި އިސްރާއީލްގެ ރައްޔިތުންނަށް ވެސް ނުރައްކާ ކުރިމަތި ވާނެ ކަމަށް ބުނެފަ އެވެ. އެގޮތުން ހަމާސް ޖަމާއަތުގެ މުޖާހިދުންނަށް އޮތް ކޮންމެ ނުރައްކަލެއް، ރަހީނުންނަށް ވެސް އޮންނާނެ ކަމަށް ބުނެފައިވެ އެވެ.

ހަމާސްގެ ހަނގުރާމައިގެ ތަރުޖަމާނު އަބޫ އުބައިދާ ވިދާޅުވެފައި ވަނީ، ހަމާސްގެ ބެލުމުގެ ދަށުގައި ތިބި އިސްރާއީލްގެ ރައްޔިތުންނާ މެދު ވީހާ ވެސް ރަނގަޅަށް ކަންތައް ކުރަމުން ގެންދާ ކަމަށާއި، އެމީހުންނަށް ވަރަށް ރަނގަޅަށް އަޅާލާ ކަމަށެވެ.

މީގެ އިތުރުން، އެމީހުން ވެސް ތިބޭނ ހަމާސް ޖަމާއަތުގެ ހަނގުރާމަވެރިންނާ އެކު ހަނގުރާމައިގެ މައިދާނުގައި ކަމަށާއި، އެ މީހުން ވެސް ތިބޭނީ ހަމާސްގެ ހަނގުރާމަވެރިންނާ އެއް ޙާލަތެއްގައި ކަމަށް އޭނާ ވިދާޅުވި އެވެ.

ހަމާސްގެ މި އިންޒާރު އައިސްފައި ވަނީ، އިސްރާއީލް އިން ޣައްޒާގެ އުތުރު ސަރަހައްދުގައި ހިންގަމުންދާ އޮޕަރޭޝަންތައް އިތުރަށް ޚަރުދަނާކޮށް، ޣައްޒާ ސިޓީ ހިފުމަށް ހަމަލާތައް ދީ، ރޭވުންތައް ރާވަމުންް ގެންދާ ވަގުތެއްގަ އެވެ. އިސްރާއީލް އިން ބުނެފައިވާ ގޮތުގައި، މިހާރު ކުރަމުން އަންނަނީ ހަމާސް ޖަމާއަތް ނައްތާލުމަށް ކުރެވޭ މަސައްކަތުގެ ތެރެއިން މުހިންމު މަސައްކަތްތަކެއް ކަމަށެވެ.

ހަމާސް އިން، 2023 ވަނަ އަހަރުގެ އޮކްޓޫބަރު މަހުގެ ހަތް ވަނަ ދުވަހު އިސްރާއީލް އަށް ހަމަލާ ދިނުމަށް ފަހު، އިސްރާއީލްގެ 200 އަށް ވުރެ ގިނަ މީހުން ވަނީ ރަހީނު ކޮށްފަ އެވެ. އޭގެ ތެރެއިން ބައެއް މީހުން ދޫކޮށްލާފައިވެ އެވެ. މީގެ އިތުރުން އެ ހަމަލާގައި އިސްރާއީލްގެ 1200 އަށް ވުރެ ގިނަ މީހުން މަރުވެފައިވެ އެވެ.