ކ. މާލެ
|
29 އޯގަސްޓް 2025 | ހުކުރު 14:43
ކ.ގުރައިދޫއަށް އުފަން އަދީލް އަހުމަދު، އޭނާ މަރުވި ކަމަށް އާއިލާއަށް ރިޕޯޓުކޮށްފައިވަނީ މިމަހުގެ 23 ވަނަ ދުވަހު
ކ.ގުރައިދޫއަށް އުފަން އަދީލް އަހުމަދު، އޭނާ މަރުވި ކަމަށް އާއިލާއަށް ރިޕޯޓުކޮށްފައިވަނީ މިމަހުގެ 23 ވަނަ ދުވަހު
ރާއްޖެއެމްވީ
އަދީލް އަހުމަދުގެ މަރު
ގޮތް ނޭނގޭ މަރެއް، ''އާދޭސް މިކުރަނީ އަޅުގަނޑުގެ ދަރިފުޅަށް އިތުރަށް އަނިޔާނުދީ ހަށިގަނޑު ހަވާލުކޮށްދީ''
އަދީލް އޯލަވަލް ނިންމާލުމަށްފަހު މަސައްކަތް ކުރަމުންދިޔައީ ރިސޯޓުތަކުގައެވެ. އެންމެފަހުން ވަޒީފާއަށް ދިޔަ ރިސޯޓުގައި މަސައްކަތް ކުރަން ފެށިފަހުން އެއްމަސްނުވެ ޚަބަރު ލިބިގެންދިޔައީ އަދީލް މަރުވި ޚަބަރެވެ. އޯގަސްޓް މަހުގެ 23 ވަނަ ދުވަހު އަދީލް މަރުވިކަން ފުލުހުން އެންގި ކަމަށާއި، އެ މަރުގައި ބަލަންޖެހޭ ކަންތައްތަކެއް ހުރި ކަމަށް ފުލުހުން ބުނެފައިވެއެވެ. އެހެންކަމުން ހަށިގަނޑު އާއިލާއާ ހަވާލުނުކޮށް، މޯޗަރީގައި ބާއްވާފައިވާ ކަމަށާއި، މިއަދާ ހަމައަށް ވާނުވާ ނޭނގޭ ކަމަށް އަދީލްގެ މަންމަ ބުނެފައިވެއެވެ.

އެކަނިވެރި މަންމައެއްގެ އެންމެ ހަގަށްހުރި ފިރިހެން ދަރިފުޅު، އަދީލް އަހުމަދު ރިސޯޓުގައި ވަޒީފާ އަދާކުރަމުން ދިޔައީ އެ މަންމަގެ ދިރިއުޅުން ފަސޭހަކޮށްދިނުމަށެވެ. ކ.ގުރައިދޫ ސްކޫލުން އޯލެވެލް ނިންމާލުމަށްފަހު ވަޒީފާގެ މައިދާނަށް އެޒުވާނާ ނުކުތީ، މަންމައާއި، އާއިލާއަށް ޚިދުމަތް ކުރަން އަމިއްލައަށް ބޭނުންވެގެންނެވެ. ނަމަވެސް އޯގަސްޓް މަހުގެ 23 ވަނަ ދުވަހު، އަދީލްގެ މަންމަ، ނާޖިދާ ހަސަންއަށް ލިބިގެންދިޔަ ހިތާމަވެރި ޚަބަރަކީ ކުއްލިއަކަށް އަދީލް މަރުވި ޚަބަރެވެ.

ރާއްޖެއެމްވީއަށް، ނާޖިދާ ވަނީ އަދީލްގެ ކުއްލި މަރާގުޅޭގޮތުން ސުވާލު އުފައްދާ، އެހާދިސާ ހިނގާދިޔަ ގޮތް ހިއްސާކޮށްފައެވެ.

ނާޖިދާ ކިޔައިދިން ގޮތުގައި، އަދީލް އޯލެވެލް ނިންމާލުމަށްފަހު މަސައްކަތް ކުރަމުންދިޔައީ ރިސޯޓުތަކުގައެވެ. އެންމެފަހުން ވަޒީފާއަށް ދިޔަ ރިސޯޓުގައި މަސައްކަތް ކުރަން ފެށިފަހުން އެއްމަސްނުވެ ޚަބަރު ލިބިގެންދިޔައީ އަދީލް މަރުވި ޚަބަރެވެ.

އޯގަސްޓް މަހުގެ 23 ވަނަ ދުވަހު އަދީލް މަރުވިކަން ފުލުހުން އެންގި ކަމަށާއި، އެ މަރުގައި ބަލަންޖެހޭ ކަންތައްތަކެއް ހުރި ކަމަށް ފުލުހުން ބުނެފައިވާ ކަމަށެވެ. އެހެންކަމުން ހަށިގަނޑު އާއިލާއާ ހަވާލުނުކޮށް، މޯޗަރީގައި ބާއްވާފައިވާ ކަމަށާއި، މިއަދާ ހަމައަށް ވާނުވާ ނޭނގޭ ކަމަށް އޭނާ ބުނެފައިވެއެވެ. ފުލުހުންގެ ފަރާތުން ބަހެއް ހޯދުމަށް ކުރި މަސައްކަތް ކާމިޔާބުނުވާ ކަމަށް އޭނާ ބުނެފައިވެއެވެ.

ނާޖިދާގެ ހުރި އެންމެހަގު ދަރިފުޅުގެ ހަށިގަނޑު ހަވާލުނުކޮށް ވާނުވާ ނޭނގި ތަހުގީގެއް ހިންގަމުންދާތީ، އެކަމުގެ ކަންބޮޑުވުން އޭނާ ފާޅުކޮށްފައިވެއެވެ. މިއީ ނިކަމެތި އާއިލާއަކަށްވާތީ ބޭނުންހާ ގޮތެއް ހަދަނީ ކަމަށް ވެސް އޭނާ ބުނެފައިވެއެވެ.

އާއިލާއާ ގާތްގުޅުމެއް އޮތް 22 އަހަރުގެ އަދީލް އަމިއްލައަށް މަރުވީކަމުގެ އަޑުތަކެއް ފެތުރި ނަމަވެސް އެކަން އޭނާގެ މަންމަ ނާޖިދާ ދޮގުކުރެއެވެ. އެއީ ހިތްވަރުގަދަ ޒުވާނެއް ކަމަށާއި، ދިރިއުޅުމާމެދު ގިނަ އުންމީދުތަކެއް ކުރި ކުއްޖެއް ކަމަށް އޭނާ ބުނެފައިވެއެވެ. އެއްބަނޑުއެއްބަފާ ތިން ކުދިން ތިބިއިރު، އެކުދިންނާ ވެސް ސަމާސާކޮށް، ދިރިއުޅުމުގެ ވާހަކަތައް ހިއްސާކުރެއެވެ. އަދި ހިތްނުތަނަވަސްވެ، ދެރަކަމެއް ދިމާވިނަމަ އެ ވާހަކައެއް އެތަނުން ކޮންމެވެސް އެއްކުއްޖަކާ ހިއްސާކުރާނެ ކަމަށާއި، މިފަހުން އެފަދަ ވާހަކައެއް ވެސް ދައްކާފައިނުވެއެވެ.

އެހެންކަމުން އަދީލްގެ މަރަކީ އާދައިގެ މަރެއް ނޫންކަމަށާއި، ކަންތައްތަކެއް ސިއްރުކުރާކަމުގެ ތުހުމަތުތަކެއް ވަނީ ކޮށްފައެވެ.

އަޅުގަނޑު އާދޭސް މިކުރަނީ. ދަރިފުޅުގެ ހަށިގަނޑު ހަވާލުކޮށްދީ. ދެން އެކުއްޖާއަށް އެންމެ އަނިޔާއެއް ވެސް ދޭކަށް ބޭނުމެއް ނުވޭ. ކިހައި ބޮޑު އަނިޔާއެއްތޯ މިއީ. މިއަދު މިއީ 7 ދުވަސް. ވާނުވާއެއް ނޭނގޭ. ކީއްވެގެން ކަމެއް ނާނގޭ. ބައެއް މީހުން ކިޔާތީ އަޑުއެހިން އެކުއްޖާ އޮތީ ދުއްވާ ލޯންޗުގެ ދަގަނޑުގަޑެއްގެ ވަލެއް ކަރުގައި އައްސާގެން މޫދަށް ފާބާފައޭ. ދެން އެ ބުނަނީ ދަންޖެހިގެން މަރުވީއޭތާ. އެކަމަކު މަގޭ ދަރިފުޅު ދަންޖެހިގެން އަމިއްލައަކަށް މަރެއް ނުވާނެ. ޔަގީން އަމިއްލައަކަށް މަރެއް ނުވާނެ. އެއަށްވުރެ ހިތްވަރުގަދަ ރަނގަޅު ކުއްޖެއް އެއީ.

ނާޖިދާ ހަސަން

އަދީލްގެ ހަށިގަނޑު އާއިލާއާ ހަވާލުނުކޮށް ހަފްތާއެއް ވެފައިވާއިރު، މިއަދާ ހަމައަށް އޭނާގެ ފޯނާއި، އަންނައުނު ވެސް ހަވާލުކޮށްފައިނުވެއެވެ. މި މައްސަލާގައި އެ ރިސޯޓުގެ ފަރާތުން ވެސް އެއްބާރުލުމެއް ނުލިބޭ ކަމަށް އާއިލާގެ ފަރާތުން ބުނެފައިވެއެވެ.

އަދީލްގެ މަރާ ގުޅޭގޮތުން ސުވާލު ކުރުމުން ފުލުހުން ބުނެފައިވަނީ މިފަހުން ރިސޯޓެއްގައި ޒުވާނެއްގެ މަރުވި ކަމުގެ މައުލޫމާތު ލިބިފައިވާ ކަމަށާއި، ތަފްސީލު ބަލާލުމަށްފަހު ހިއްސާކުރާނެ ކަމަށެވެ.

- ކޮމެންޓް