އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގައި ދެމުން އަންނަ ހަމަލާތައް ހައްދުފަހަނަ އަޅައިފި ކަމަށް، އިޓަލީގެ ބޮޑު ވަޒީރު ޖިއޯޖިއާ މެލޯނީ ވިދާޅުވެއްޖެ އެވެ.

ސިޔާސީ ބައްދަލުވުމެއްގައި ބައިވެރިވެ ވަޑައިގެން ވާހަކަ ދައްކަވަމުން މެލޯނީ ވިދާޅުވީ، އިސްރާއީލް އިން ޣައްޒާގައި ދެމުން އަންނަ ހަމަލާ ތަކުގައި "މާގިނަ އާންމު ރައްޔިތުން" މަރުވެފައިވާ ކަމަށެވެ. އަދި މިހާރު އެ ހަމަލާތައް ހައްދު ފަހަނައަޅައިފި ކަމަށާއި، ތަނަވަސްކަމުގެ އުސޫލުން ވެސް ބޭރުވެފައިވާ ކަމަށް މެލޯނީ ވިދާޅުވި އެވެ.

މެލޯނީ ވިދާޅުވީ، 2023 ވަނަ އަހަރުގެ އޮކްޓޫބަރު މަހުގެ ހަތް ވަނަ ދުވަހު ހަމާސް އިން އިސްރާއީލް އަށް ދިން ހަމަލާގެ ސަބަބުން، އަމިއްލަ ދިފާއުގައި މަސައްކަތް ކުރުމުގެ ހައްގު އިސްރާއީލް އަށް އޮތް ކަމަށެވެ. އެހެން ނަމަވެސް، މިހާރު އިސްރާއީލް އިން ދެމުން ގެންދާ ހަމަލާތަކާ މެދު ހަނު ހުރެވެން ނެތް ކަމަށް ވެސް އެކަމަނާ ވިދާޅުވެފައިވެ އެވެ.

މީގެ އިތުރުން މެލޯނީ ވިދާޅުވެފައި ވަނީ، އިސްރާއީލް އިން މިހާރު ދެމުން އަންނަ ހައްދުފަހަނަ އެޅި ހަމަލާތަކުގެ ސަބަބުން، މިހާތަނަށް އުންމީދު ކުރަމުން އައި ދެ ދައުލަތުގެ ޙައްލު ވެސް ނުރައްކަލުގެ ތެރެއަށް ވެއްޓިފައިވާ ކަމަށެވެ.

ވަކިން ޚާއްސަކޮށް މިދިޔަ ހޯމަ ދުވަހު ޣައްޒާގައި ފަސް ނޫސްވެރިން ޝަހީދު ކޮށްލާފައިވާ ހާދިސާ އަށް އިޝާރާތް ކުރައްވައި މެލޯނީ ވިދާޅުވީ، އެއީ ނޫސްވެރި ކަމުގެ މިނިވަން ކަމަށާއި، ހަނގުރާމައިގެ ޙާލަތު ރިޕޯޓު ކުރުމަަށް ފުރާނަ އަތް މައްޗަށް ލައިގެން މަސައްކަތް ކުރާ ފަރާތްތަކާ ދެކޮޅަށް ދީފައިވާ، ޤަބޫލު ކުރެވެން ނެތް ހަަމަލާއެއް ކަމަށެވެ.

މީގެ އިތުރުން ބައިނަލްއަޤުވާމީ މުޖުތަމަ އަށް މެލޯނީ ގޮވާލައްވާފައި ވަނީ، ހުރިހާ ބާރެއް ބޭނުން ކޮށްގެން، އަދި ވީ އެންމެ ބޮޑު ޕްރެޝަރެއް ކޮށްގެން ވިޔަސް، ހަމާސްގެ ބެލުމުގެ ދަށުގައި ތިބި ރަހީނުން މިނިވަން ކުރުމާއި، އިސްރާއީލް އިން ޣައްޒާ އަށް ދެމުން އަންނަ ހަމަލާތައް ހުއްޓާލުމަށާއި، އިންސާނީ އެހީ ފޯރުކޮށްދިނުމަށް މަގުފަހިކޮށް އަދި ވެސްޓް ބޭންކުގައި ޔަހޫދީ އާބާދީ އިތުރު ކުރުން ހުއްޓުވުމަށެވެ.

ޣައްޒާގެ ޞިއްޙީ ވުޒާރާ އިން ހާމަކޮށްފައިވާ ގޮތުގައި، އިސްރާއީލް އިން ކުރިއަށް ގެންދާ ހަނގުރާމައިގައި މިހާތަނަށް ވަނީ 62،000 އަށް ވުރެ ގިނަ ރައްޔިތުން ޣައްޒާ އިން ޝަހީދުވެފަ އެވެ. މީގެ އިތުރުން އެތައް ހާސް ބަޔަކަށް އަނިޔާވެފައިވާ ކަމަށް ވެސް ވަނީ ހާމަކޮށްފަ އެވެ.

އިންސާނީ ޙާލަތާ ގުޅޭ ގޮތުން ވާހަކަ ދައްކަވަމުން މެލޯނީ ވިދާޅުވެފައި ވަނީ، އިޓަލީ އަކީ ޣައްޒާ ހަނގުރާމައިގައި އެންމެ ގިނަ އިންސާނީ އެހީ ފޯރުކޮށްދީފައިވާ ޔޫރަޕުގެ ޤައުމެވެ.