ޕާޓީ އުވާލަން ނިންމީ ދުސްތޫރީ ޙައްޤު ގެއްލޭގޮތަށް، ޑިއު ޕްރޮސެސްގެ ފުރުޞަތުވެސް ނުދީ ކަމަށް މޯލްޑިވްސް ތާޑްވޭ ޑިމޮކްރެޓްސް (އެމްޓީޑީ) އިން ބުނެފި އެވެ.

ސިޔާސީގޮތުން އެމްޓީޑީއަށް ކުރިމަތި ކުރަމުންދާ ފިއްތުންތައް ކުށްވެރިކޮށް އެ ޕާޓީން ނެރުނު ބަޔާނެއްގައި ބުނެފައިވަނީ އިލެކްޝަންސް ކޮމިޝަނުން ޤާނޫނާ ޚިލާފަށް، މޯލްޑިވްސް ތަރޑްވޭ ޑިމޮކްރެޓްސް (އެމްޓީޑީ) އުވާލުމަށް ނިންމި ނިންމުން ޕާޓީން ހަރުކަށި އިބާރާތުން ކުއްވެރި ކުރާ ކަމަށެވެ. މިއީ ކަނޑައެޅިގެން މި ޕާޓީގެ މެންބަރުންގެ ރުހުމަކާ ނުލައި އަދި މި ޕާޓީއަށް ޤާނޫނު އަސާސީން ލިބިދީފައިވާ ދުސްތޫރީ ޙައްޤު ގެއްލޭގޮތަށް، ޑިއު ޕްރޮސެސްގެ ފުރުޞަތުވެސް ނުދީ ނިންމާފައިވާ ނިންމުމެއް ކަމަށް އެ ޕާޓީން ވަނީ ބުނެފަ އެވެ.

އަދި މިއީ ދިވެހިރާއްޖޭގެ ޑިމޮކްރަޓިކް ނިޒާމް ފުނޑުފުނޑުކޮށްލައި، ސިޔާސީ މަސައްކަތްތައް ހިމޭންކޮށް، މިނިވަންކަމާއެކު ސިޔާސީ ކަންކަމުގައި ޙަރަކާތްތެރިވުމާއި، ބައިވެރިވުމުގެ އަސާސީ ޙައްޤަށް ނުރައްކާވާގޮތަށް ހިންގާފައިވާ އަމަލެއް ކަމަށް އެމްޓީޑީ އިން ބުނެފައިވެ އެވެ. އިލެކްޝަންސް ކޮމިޝަނުން، ޤާނޫނާ ޚިލާފަށް ބޭއިންސާފުން ނިންމާފައިވާ މި ނިންމުމަށް އިންސާފު ހޯދުމަށް ކޯޓުތައް މެދުވެރިކޮށް ކުރެވެންހުރި މަސައްކަތެއް އެ ޕާޓީން ކުރާނެ ކަމަށް ބުނެފައިވެއެވެ. އަދި މިކަމުގައި، ޑިމޮކްރެޓިކް މުއައްސަސާތަކާއި، މަދަނީ ޖަމްޢިއްޔާތަކާއި، ބައިނަލްއަގްވާމީ ބައިވެރިން ޕާޓީއާއި ޕާޓީގެ މެންބަރުންނާއެކު ތިބުމަށް ގޮވާލާފައިވެ އެވެ.

އެ ޕާޓީ އިން ބުނެފައިވަނީ ސިޔާސީގޮތުން އެ ޕާޓީ ހިމޭން ކުރުމަށް ކުރަމުންދާ މަސައްކަތް ކާމިޔާބު ނުކުރެވޭނެ ކަމަށެވެ. އަދި އިންސާފާއި ޑިމޮކްރަސީގެ ހަމަތައް މިނިވަންކަމާއެކު ކުރިއެރުވެން ޖެހޭނެ ކަމަށް ވެސް ބުނެފައިވެއެވެ.

ކުރީގެ ނައިބު ރައީސް އަހްމަދު އަދީބު ގެ ޕާޓީ އެމްޓީޑީ އުވާލީ ސަރުކާރަށް ފާޑުކީތާ 48 ގަޑިއިރު ތެރޭގަ އެވެ.

އިލެކްޝަންސް ކޮމިޝަނުން 26 އޮގަސްޓް 2025 ގެ ތާރީޚުގައި ކޮށްފައިވައިވާ އިއުލާނެއްގައި ބުނެފައިވަނީ، ޤާނޫނު ނަންބަރު 2013/4 (ސިޔާސީ ޕާޓީގެ ޤާނޫނު) ގެ 30 ވަނަ މާއްދާގެ (ހ) ގެ 1 ވަނަ ނަންބަރުގައިވާ ގޮތުގެމަތީން މޯލްޑިވްސް ތާރޑް-ވޭ ޑިމޮކްރެޓްސް (އެމް.ޓީ.ޑީ) އުވާލުމަށް މިކޮމިޝަނުން ނިންމާފައިވާ ކަމަށެވެ.

އެމްޓީޑީ އުވާލުމަށް ނިންމި ސަބަބެއް އިއުލާނުގައި ބަޔާން ކޮށްފައެއް ނުވެއެވެ.

"އެހެންކަމުން، މޯލްޑިވްސް ތާރޑް-ވޭ ޑިމޮކްރެޓްސް އިން އަދާކުރަންޖެހޭ ދަރަންޏެއްވާނަމަ، 2025 އޮގަސްޓް 31 ވަނަ ދުވަހުގެ ނިޔަލަށް، އެކަން އެ ޕާޓީއަށް ހުށަހަޅުއްވައި ނިންމެވުމަށް ދަންނަވަމެވެ." އިލެކްޝަންސް ގެ އިއުލާނުގައި ބުނެފައިވެއެވެ.

އަދީބުގެ ޕާޓީ އުވާލަން ނިންމި އިރު، ގައުމީ ދުވަހު އަދީބް އެކްސް ގައި ކުރެއްވި ޕޯސްޓެއްގައި ވަނީ ނުސީދާ ކޮށް ސަރުކާރަށް ރައްދުވާ ގޮތައް ފާޑު ވިދާޅުވެފައެވެ.

މި ގައުމުގެ އެންމެ މުހިންމު ގައުމީ ވާޖިބަކީ އަޅުގަނޑުމެންގެ ދިވެހިން ބަނޑުފުރާނަ މުއްތިކޮށް ދަރަނިން ސަލާމަތްވެ ބޯހިޔާވަހިކަން ލިބި، ހަމަޖެހޭ ދިރިއުޅުމެއްގައި އުޅެވޭ އަދި ކޮންމެ ރައްޔިތަކީ އަމިއްލަ އީވޮލެޓެއް އޮތް ގައުމުގެ އިގްތިސާދުން ހިއްސާއެއްލިބޭ، ތަނަވަސް ދިވެހި ރައްޔަތަކަށް ހެދުން ކަމަށް އަދީބް ވިދާޅުވެފައިވެއެވެ.

އަދީބް ގެ ޕޯސްޓް ގައި ކާބަފައިން ކަންކުރީ އަމަލުން ކަމަށް ވިދާޅުވެ، "އިސްލާހީ މަސައްކަތޭ، މަތިގެޔާ ތިރީގެޔޭ ކިޔާ ފޮނިކަނޑާ ފޮނިވާހަތަކާ ޕޯޑިއަމްގައި ހަޅޭއްލަވާ ޅެންހަދާ އިނާމުދީ ހަފްލާތައް ބާއްވައިގެނެއް ނޫން،" ކަމަށް ވިދާޅުވިއެވެ. އަދި ބޮޑުތަކުރުފާނު މިގައުމު ސަލާމަތް ކުރެއްވީ އަމަލުން ކަމަށާއި ބޭރުގެ އެހީ އާއި އަދި ދިވެހި ރައްޔިތުންގެ ލޯތްބާއި އެކުގައި ކަމަށް ވިދާޅުވެފައިވެއެވެ.

"މީ އަހަރުމެންގެވެސް ގައުމެވެ، އެކަން ހަނދާންކޮށް ދެމެވެ." އަދީބް ވިދާޅުވިއެވެ.