މާލޭގެ ގެއެއްގެ އެޕާޓްމަންޓުން ގިނަ އަދަދެއްގެ މަސްތުވާތަކެތި ފެނުނު މައްސަލައާ ގުޅިގެން ހައްޔަރު ކުރި ޒުވާނެއް ޝަރީއަތް ނިމެންދެން ބަންދު ކުރުމަށް ދައުލަތުން އެދުނު ނަމަވެސް ބަންދަށް 10 ދުވަސް ޖަހައިފިއެވެ.

ކްރިމިނަލް ކޯޓުން މިމަހުގެ 23 ވަނަ ދުވަހު، ޅ.ކުރެންދޫއަށް އުފަން، 28 އަހަރުގެ މުހައްމަދު އަލީޝް އަހުމަދުގެ ބަންދަށް 10 ދުވަސް ވަނީ ޖަހާފައެވެ. ނަމަވެސް ދައުލަތުން އެދިފައިވަނީ ޝަރީއަތް ނިމެންދެން ބަންދު ކުރުމަށް ކަމަށެވެ.

އަލީޝް ހައްޔަރުކޮށްފައިވަނީ މަސްތުވާތަކެތި ބޭނުންކޮށް ގެންގުޅެ އެތަކެތި ޓްރެފިކް ކުރުމުގެ ކުށުގެ ތުހުމަތުގައެވެ.

ކޯޓު އަމުރުގައި ބުނެފައިވަނީ ކުށުގެ ތުހުމަތުކުރެވޭ މިންވަރަށް ހެކި ހުށަހަޅާފައިވާ ކަމަށާއި، އޭނާގެ އަތުގައި އޮތް ތަޅުދަނޑިން ހުޅުވި އެޕާޓްމަންޓުން ގިނަ އަދަދެއްގެ މަސްތުވާތަކެތި ފެނިފައިވާ ކަމަށެވެ. ހާދިސާ ހިނގިތަނަށް ދިޔަ ފުލުހުންގެ ބަޔާންތަކާއި، ފޮޓޯ ރިޕޯޓާއި، މަސްތުވާތަކެއްޗާއި، ކުޑަކަމުދާ ތަކެތީގެ ތަހުލީލު ރިޕޯޓު ހުށަހަޅާފައިވާ ކަމަށް ބުނެފައިވެއެވެ.

މި މައްސަލައާ ގުޅިގެން ގިނަ އަދަދެއްގެ މަސްތުވާތަކެތި ފެނިފައިވާއިރު، މަސްތުވާތަކެތި ވިއްކާ ވިޔަފާރި ކުރުމަށް ބޭނުންކުރާ ތަކެތި ފެނިފައިވާތީ މިތަކެއްޗަކީ ވިއްކުމަށް ތައްޔާރުކޮށްފައިވާ މަސްތުވާތަކެތިކަމާއި، އޭނާއަކީ މަސްތުވާތަކެތި ވިއްކާ ވިޔަފާރި ކުރާ މީހެއް ކަމަށް ބެލެވޭ ކަމަށް ކޯޓު އަމުރުގައިވެއެވެ.