މީޑިއާ ކޮންޓްރޯލް ކުރުމަށް މަސައްކަތް ކުރަނީ މި ސަރުކާރުން ކުރާ ހުރިހާ ނޭއްގާނީ ކަންކަން ފޮރުވުމަށް: މެންބަރު ޒިޔާދު
ހުދުމުތާރު ވެރިކަމެއްގައި ނުފެނި ނުދާނެ ހުރިހާ މަންޒަރެއް ގައުމުން ދަނީ ފެންނަމުން
ރައްޔިތުން މަޖިލީހުގެ ޖަލްސާއެއްގައި ވައިކަރަދޫ ދާއިރާގެ މެންބަރު ހުސެއިން ޒިޔާދު ވާހަކަދައްކަވަނީ
މީޑިއާ ކޮންޓްރޯލް ކުރުމަށް މަސައްކަތް ކުރަނީ މިސަރުކާރުން ކުރާ ހުރިހާ ނޭއްގާނީ ކަންކަން ފޮރުވުމަށް ކަމަށް ރައްޔިތުން މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު ވިދާޅުވެއްޖެ އެވެ.
މީޑިއާ ކޮންޓްރޯލް ކުރާ ބިލާ ދެކޮޅަށް އަޑު އުފުލުމަށް ރައްޔިތުންގެ މަޖިލިސް ސަރަހައްދަށް އެމްޑީޕީގެ މެންބަރުންގެ އިތުރުން ގިނަ އަދަދެއްގެ އާއްމުން ވަނީ އެއްވެފައެވެ. އެސަރަހައްދުގައި ހުންނަވައި މެންބަރު ޒިޔާދު ވިދާޅުވީ ހުދުމުތާރު ވެރިކަމެއްގައި ނުފެނި ނުދާނެ ހުރިހާ މަންޒަރެއް މިހާރު މިގައުމުން ފެނިގެންދާ ކަމަށެވެ.
މި ސަރުކާރުން ހުދުމުހުތާރު ހުރިހާ ކަމެއް ކުރަމުންދަނީ ވަރަށް ތަރުތީބުންކަން ފާހަގަކުރައްވައި މެންބަރު ޒިޔާދު ވިދާޅުވީ ރައްޔިތުންގެ މަޖިލިސް ހިސޯރުކުރުމަށްފަހު، ޝަރުއީ ނިޒާމު މުށުތެރެއަށްލައި، މީޑީއާތައް ކޮންޓްރޯލް ކުރުމުގެ މަސައްކަތް ފަށާފައިވަނީ މިސަރުކާރުގެ ނޭއްގާނީ ހުރިހާ ކަމެއް ފޮރުވުމަށް ކަމަށެވެ.
މިދައުލަތުން މިސަރުކާރުން ކުރާ ނުރިހާ ނޭއްގާނީ ކަމެއް ފޮރުވުން ކަމަށް އެ އުންމީދުގައި ކުރާ ކަމެއް މިއީ. އެހެންނަމަވެސް ގަބޫލުކުރަންޖެހޭ ހަގީގަތަކީ މިއަދު ޓީވީއެއް ނޫހެއް ބަންދުކޮށްލައިގެން ޖަލަށް ލައިގެން ޖޫރިމަނާކޮށްގެން ނިންމާލެވޭވަރަށް ވުރެ ދިވެހިން މާ ހޭލުންތެރި. ސޯޝަލް މީޑިއާގައި ވެސް ރައްޔިތުން ބޭނުންވާ ހިޔާލުފާޅު ކުރުމުގެ މިނިވަންކަން ގާނޫނު އަސާސީން ދީފައިވާ މިންވަރަށް ރައްޔިތުން ބޭނުންކުރާނެ. މިހެން އަންނަ ބިލަކުން އެކަން ހުއްޓުވޭނެ ކަމަށް ގަބޫލުކުރާ ގަބޫލުކުރުމަކީ މޮޔަކަމެއް.ރައްޔިތުން މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު
މެންބަރު ޒިޔާދު ވިދާޅުވީ މީޑިއާ ކޮންޓްރޯލް ކުރާ ބިލު، މިނިވަން ރައްޔިތުން މަޖިލީހުގެ މެންބަރެއް ލައްވާ ހުށަހެޅުއްވި ނަމަވެސް މި ބިލުގެ ހުރިހާ ކަމެއް ކޮންޓްރޯލް ކުރަނީ ސަރުކާރުން ކަމަށެވެ. އަދި ޕީއެންސީއާ ގުޅުމެއް ނެތް ކަމަށް ރައީސް ޑރ.މުހައްމަދު މުއިއްޒު ވިދާޅުވި ނަމަވެސް މިއީ ސަރުކާރުން ކުރާ ކަމެއް ކަމަށާއި، ބިލުގެ ދިފާއުގައި ވާހަކަދައްކަވަމުންދަނީ ޕީއެންސީގެ މަޖިލިސް މެންބަރުން ކަމަށް މެންބަރު ޒިޔާދު ވިދާޅުވިއެވެ.
މެންބަރު ޒިޔާދު ވިދާޅުވީ ރައްޔިތުންނަށް ހަގީގަތް އޮޅުވާލުމަށް މަސައްކަތް ކުރި ނަމަވެސް އެކަން ކާމިޔާބުނުވާނެ ކަމަށާއި، ރައްޔިތުންނަށް ވަރަށް ސާފުކޮށް މަންޒަރު ފެންނަ ކަމަށެވެ.
