ސޯޝަލް މީޑީއާ ޕްލެޓްފޯމެއް ކަމަށްވާ ޓިކްޓޮކްގައި ކުޑައަންހެން ކުއްޖަކު ވިއްކާލަން އިއުލާން ކުރި މައްސަލަ އެއް ފުލުހުން ތަހުގީގުކުރަން ފަށައިފި އެވެ.

އެކަން ހާމަކޮށް ފުލުހުން އަންގާރަ ދުވަހު ބުނީ ޓިކްޓޮކް ލައިވް އެއް ގައި، 13 އަހަރުގެ އަންހެން ކުއްޖެއްގެ ފޮޓޯ ދެއްކުމަށް ފަހު އެ ކުއްޖާއާ ގުޅޭ ގޮތުން ހަޑިހުތުރު ވާހަކަތަކެއް ދައްކާފައިވާ ކަމަށެވެ. އަދި އެ ކުއްޖާގެ ކަރާމާތަށް އުނިކަން އަންނާނެ ފަދަ އަަމަލެއް ހިންގާފައިވާ ކަމުގެ ރިޕޯޓް ފުލުހުންނަށް ލިބިފައިވާ ކަމަށާއި އެ ރިޕޯޓް ލިބިފައި ވަނީ މިދިޔަ ހޮނިހިރު ދުވަހުގެ ރޭ ކަމަށް ފުލުހުން ވަނީ ބުނެފައެވެ.

ޓިކްޓޮކްގައި އެ މީހާ ވަނީ އެ ކުއްޖާ ވިއްކާލާނެ ކަމަށް ބުނެ، އެ ކުއްޖާގެ ފޮޓޯ ވެސް އާއްމުކޮށްފައެވެ. އެކަން ހިނގާފައި ވަނީ މިދިޔަ ހުކުރު ދުވަހު އެވެ. އެ މީހާ ކުއްޖާގެ ފޮޓޯ އާންމުކޮށް ވިއްކާލާނެ ކަމަށް ޖަހާފައި ވަނީ އެ ކުއްޖާގެ މަންމަ އާއި ޖެހުނު މައްސަލައަކާއި ގުޅިގެން ކަމަށް މީސްމީޑިއާގައި އެކަމާއި މެދު ވާހަކަދައްކާ އާއްމުން ދަނީ ބުނަމުންނެވެ.

ފުލުހުން ބުނިގޮތުގައި އެ މައްސަލައިގައި ތުހުމަތުކުރެވޭ މީހާ ފުލުހުންގެ ބެލުމުގެ ދަށަށް ގެންދިއުމަށް ފަހު ވަނީ ދޫކޮށްލާފައެވެ. ފުލުހުން ބުނީ އެ މައްސަލައިގެ ތަހުގީގަށް އެ މީހާގެ ފޯނު ފުލުހުންގެ ބެލުމުގެ ދަށަށް މިހާރު ގެންގޮސްފައިވާ ކަމަށެވެ.

އެ މައްސަލަ ފުލުހުންގެ އިތުރުން ސޯޝަލް އެންޑް ފެމެލީ ޑިވެލޮޕްމެންޓް މިނިސްޓްރީއަށް ވެސް ވަނީ ރިޕޯޓްކޮށްފައެވެ.