އަލްހާ އީދާ ދިމާކޮށް ޅ.ކުރެންދޫގައި ފުޓްސަލް މުބާރާތެއް ފަށައިފި އެވެ.

މި މުބާރާތުގައި ހުކުރު ދުވަހު ވަނީ ތިން މެޗެއް ކުޅެފައެވެ. ފުރަތަމަ މެޗުގައި އެފްސީ ބަދަވީން އަދި އެފްސީ ކަހާނީ ބައްދަލު ކޮށްފައިވާއިރު، މެޗު ނިމުނީ ދެޓީމުން ކުރެ ޓީމަކަށް ވެސް ލަނޑެއް ނުޖެހި އެއްވަރުވެގެންނެވެ. މެޗުގެ މޮޅު ކުޅުންތެރިޔަކަށް ހޮވުނީ އެފްސީ ކަހާނީގެ އަހުމަދު އިކްރާމް އެވެ.

ދެވަނަ މެޗުގައި ބައްދަލު ކުރީ އެފްސީ އަތޮޅު ގިރުވާލި އަދި އެފްސީ ވަޅުކޮޅު އެވެ. މި މެޗު ނިމުނީ 2-2 ގެ ނަތީޖާއިން ދެޓީމު އެއްވަރުވެގެންނެވެ. މެޗުގެ މޮޅު ކުޅުންތެރިޔަކަށް ހޮވިފައި ވަނީ އެފްސީ ވަޅުކޮޅުގެ އަބްދުﷲ އިބްރާހިމް އެވެ.

މުބާރާތުގެ ތިންވަނަ މެޗުގައި ބައްދަލު ކުރީ ޒިފިއަސް ޔޫތް ޒެސްޓް އަދި ރާކާ ސްޕޯޓްސް ކްލަބެވެ. މި މެޗުވެސް ނިމުނީ 2-2 ގެ ނަތީޖާއިން އެއްވަރުވެގެންނެވެ. މެޗުގެ މޮޅު ކުޅުންތެރިޔަކަށް ހޮވިފައިވަނީ ރާކާ ސްޕޯޓްސްގެ އަލީ ފައިސަލް އެވެ.

މި މުބާރާތަކީ 2015 ވަނަ އަހަރުން ފެށިގެން ކުރެންދޫގައި ބާއްވަމުން އަންނަ މުބާރާތެވެ. މިފަހަރު މުބާރާތުގައި ޖުމްލަ 8 ޓީމު ދެ ގްރޫޕަކަށް ބަހާލާފައިވާއިރު، ސެމީއަށް ދަތުރު ކުރާނީ ކޮންމެ ގްރޫޕަކުން ވެސް އެންމެ ގިނަ ޕޮއިންޓް ހޯދާ ދެޓީމެވެ.