ނެއްލައިދޫ އަށް ވެވަޑައިގެންނެވި ވައުދުފުޅުގެ ބައެއް ކަންކަން ފެށުނީ ދޮޅު އަހަރު ފަހުން
ރިޔާސީ އިންތިހާބާއި މަޖިލިސް އިންތިހާބުގައި ވެވަޑައިގެންނެވި ވައުދުފުޅުގައި ހިމެނޭ ތަރައްގީގެ ބައެއް މަޝްރޫއުތަކުގެ އަމަލީ މަސައްކަތް ފައްޓަވައިދެއްވި
ރައީސް ޑރ. މުހައްމަދު މުއިއްޒު ނެއްލައިދޫ ރައްޔިތުންނާއި ބައްދަލުކުރައްވާ ވާހަކަފުޅުދައްކަވަނީ
ރައީސް ޑރ. މުހައްމަދު މުއިއްޒު ހދ. ނެއްލައިދޫއަށް ކޮށްދެއްވާނެކަމަށް ވެވަޑައިގެންނެވި ކަންކަމުގެ ތެރެއިން ބައެއް ކަންކަން އޭގެ ދޮޅު އަހަރު ފަހުން ބިންގާ އަޅުއްވައިފިއެވެ.
ހދ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ހޯމަ ދުވަހު ނެއްލައިދޫ އަށް ވަޑައިގެން އެރަށުގައި ވަނީ ތަރައްގީގެ ބައެއް މަޝްރޫއުތަކުގެ އަމަލީ މަސައްކަތް ފައްޓަވައިދެއްވާފައެވެ. މިއީ އިންތިހާބުވެ ވަޑައިގެންނެވި ފަހުން ނެއްލަައިދޫއަށް ވަޑައިގެންނެވި ދެވަނަ ފަހަރެވެ.
އެންމެ ފުރަތަމަ 26 ފެބްރުއަރީ 2024 ގައި ނެއްލައިދޫއަށް ވަޑައިގެންނެވި ފަހަރު ރައްޔިތުންނާއި ބައްދަލުކުރައްވާ ވިދާޅުވީ ރަށުގެ ތަރައްޤީއަށް ކުރަންހުރި ކަންކަމުގައި، އަޅުގަނޑުމެންނަށް ބަޖެޓުގެ ތެރެއިން ލިބޭ ޖާގައިންވެސް، އަދި ބަޖެޓުން ޖާގަ ނުލިބޭ ކަމަށްވަންޏާ، އޮންނަ ހުރިހާ އުޞޫލެއްގެ ތެރެއިން އިރާދަކުރެއްވިއްޔާ ފުރުޞަތުތައް ފަހިކުރައްވާނެ ކަމަށެވެ. އެހެންވީމާ، އެގޮތުގެ މަތިން ނެއްލައިދޫގެ ތަރައްޤީއަށް ކުރަންހުރި މަސައްކަތްތައް ކުރާނެ ވާހަކަ ފުރަތަމަވެސް ވިދާޅުވާ ކަމަށެވެ.
އެދުވަހުގެ ވާހަކަފުޅުގައި ގެދޮރުވެރިކަމާއި، މަސްވެރިކަމާއި، އުމްރާނީ ތަަަރައްގީގެ ވާހަކަ ރައީސް ފާހަގަކުރެއްވިއެވެ. ރައީސް އެދުވަހު ވިދާޅުވީ ޑިންގީ ޕްލެޓްފޯމާއި، އެކިކަހަލަ ކުޅިވަރު ފެސިލިޓީތަކާއި ބަޖެޓުގައި އޮތް ފުޓްބޯޅަ ދަނޑުގެ މަސައްކަތާއި، ރޮސްޓްރަމްއާއި ލައިޓް ޖެހުމުގެ މަސައްކަތާއި މިސްކިތެއްގެ މަސައްކަތް ފާހަގަކުރެއްވިއެވެ. އަދި ހުރިހާ ޚިދުމަތެއްދޭ، އެއް ފުރާޅެއްގެ ދަށުން ޚިދުމަތްދެވޭ އޮފީސް ކޮމްޕްލެކްސް ކަހަލަ އިމާރާތެއް ހުރުމަކީވެސް މުހިންމު ކަމެއްގެ ގޮތުގައި ގަބޫލުކުރައްވާ ކަމަށާއި، އެހެންކަމުން މިކަންކަމަށް މަސައްކަތް ކުރަމުންދާނެ ކަމަށް ވިދާޅުވިއެވެ.
އެއިރު އެއީ މަޖިލިސް އިންތިހާބު ކައިރިވެފައި އޮތް ދުވަސްވަރެވެ. މަޖިލިސް އިންތިހާބަށް އެއިރު ވެވަޑައިގެންނެވި އެއްވެސް މަސައްކަތެއް ހޯމަ ދުވަހާ ޖެހެންދެން ކޮށްދެއްވާފައި ނުވެއެވެ.
ރިޔާސީ އިންތިޚާބުގައިވެސް ތިޔަބޭފުޅުން ހަމަ އެ ތާއީދު ދެއްވި. ކުރިއަށް އޮތް ރައްޔިތުންގެ މަޖިލީހުގައި، އެއަށްވުރެ ބޮޑަށް ތާއީދު ދެއްވުމަށް އަޅުގަނޑު ވަރަށް ބޮޑަށް އެދެން. ރައްޔިތުންގެ މަޖިލީހުގެ އިންތިޚާބަކީ ވަރަށް މުހިންމު އިންތިޚާބެއް. ރައްޔިތުންގެ މަޖިލީހަށް މެންބަރުން ހޮވުމަށް ބާއްވާ އިންތިޚާބަކީ، ވަރަށް މުހިންމު އިންތިޚާބެއް. އެހެންވަނީ މި ރާއްޖޭގައި މިހާރު ކަންތައްތައް ދާގޮތުން. ރެސްޕޮންސިބަލް، ޒިންމާދާރު ގޮތެއްގައި ޢަމަލުކުރާ ރައްޔިތުންގެ މަޖިލީހުގެ މެންބަރުންތަކެއް ހިމެނޭ ޤައުމެއްގައި ކަންކަން ދާގޮތަކަށް ނޫނެއްނޫންތޯ ރާއްޖޭގައި ދަނީކީއެއް.މަޖިލިސް އިންތިހާބުގެ ކެމްޕެއިންގައި ރައީސް މުއިއްޒު ނެއްލައިދޫގައި ވިދާޅުވި ވާހަކަފުޅެއް
ރައީސް މުއިއްޒު މަޖިލިސް އިންތިހާބަށް ވެވަޑައިގެންނެވި ވައުދުފުޅުތަކުގެ ތެރެއިން ކައިރީގައި އޮތް ފަޅުރަށް ނެއްލައިދޫއަށް ދިނުން ފިޔަވައި އެއްވެސް އުމްރާނީ މަސައްކަތެއް ފަށާފައި ނުވެއެވެ. އަދި މިހާރު ލޯކަލް ކައުންސިލް އިންތިހާބަށް ކެމްޕޭން ކުރައްވަން ރަށްރަށަށް ވަޑައިގަންނަވާއިރު ނެެއްލައިދޫގައި ހޯމަ ދުވަހު 3 މަސައްކަތެއްގެ ބިންގާ ވަނީ އަޅާފައެވެ. އެއީ ވައުދުވެވަޑައިގެންވިތާ ދޮޅު އަހަރު ފަހުންނެވެ.
ނެއްލައިދޫ އަށް ހޯމަ ދުވަހު ވަޑައިގެން ރައްޔިތުންނާ ބައްދަލުކުރައްވާ ރައީސް ވިދާޅުވީ މިއީ ރިޔާސީ އިންތިޚާބުގައި އަދި ފަހުންވެސް ރަށުގެ ރައްޔިތުންނަށް ކޮށްދެއްވާނެކަމަށް ވަޢުދުވެވަޑައިގެންފައިވާ ކަންތައްތައް ކަމަށެވެ. އެއިރު ވެވަޑައިގެންނެވި ވައުދުފުޅުގައި ހިމެނޭ ފިޓްނަސް އެންޑް ރެކްރިއޭޝަން ސެންޓަރުގެ ބިންގާ އެޅުމާއި ފަސްސަތޭކަ މީހުންގެ ޖާގައިގެ މިސްކިތެއް ބިނާކުރުމުގެ އަމަލީ މަސައްކަތް އަދި ޞިއްހީ މަރުކަޒަށް ބޭނުންވާ ޖާގައިތުރުކޮށް ދިނުމުގެ މަސައްކަތް ވަނީ ފަށާފައެވެ. މިއީ ރިޔާސީ އިންތިހާބުގައި އަދި މަޖިލިސް އިންތިހާބުގައިވެސް ވައުދުވެވަޑައިގެންނެވި ކަންކަމެވެ.
