މިހާރުގެ ހާލަތަށް ސްޓެލްކޯގެ ކަންކަން ދިއުމަކީ ޤައުމީ ސަލާމަތަށް ވެސް އޮތް ނުރައްކަލެއް ކަމަށް ކުރީ ސަރުކާރުގެ ތިމާވެއްޓާއި ބެހޭ ވަޒީރު އައިމިނަތު ޝައުނާ ވިދާޅުވެއްޖެއެވެ.

ޝައުނާ އެފަދައިން ވިދާޅުވީ މާލެ ސަރަހައްދުން ފަހަކަށް އައިސް ކަރަންޓް ކެނޑުމުގެ މައްސަލަ އިތުރުވެފައިވާތީ އެކަމާއި ގުޅިގެން ރާއްޖެޓީވީ އިން ކުރި ސުވާލަކަށް ޖަވާބުދެއްވަމުންނެވެ. އިރުއިރުކޮޅާއި ކަރަންޓް ކެނޑުމުން އެނގެނީ ޤައުމުގެ ހާލަތު ދަށަށް ގޮސްފައިވާ މިންވަރު ކަމަށް ޝައުނާ ވަނީ ވިދާޅުވެފައެވެ. ސްޓެލްކޯ އަކީ ނޭޝަނަލް އިންފްރާސްޓްރަކްޗަރގެ ބައެއްގެ ގޮތުގައި ކަނޑައެޅިފައިވާ އިރު އެތަނުގެ ހާލަތާއި ޤައުމީ ސަލާމަތާއި ގުޅިފައިވާކަން ޝައުނާ ވަނީ ފާހަގަކުރައްވާފައެވެ.

ޝައުނާ ވަނީ މާލެ ސަރަހައްދުން ދިމާވެފައިވާ ކަރަންޓު ކެނޑުމުގެ މައްސަލަ އަކީ މެނޭޖްމެންޓްގެ މައްސަލަ އެއް ކަމަށް ވިދާޅުވެފައެވެ. އަދި ސަރުކާރުގެ ކޭޝް ފްލޯ މެނޭޖް ނުކުރެވި ސްޓެލްކޯ އަށް ބޭނުންވާ ތެޔޮ ގަތުމަށް ބޭނުންވާ ވަރަށް ފައިސާގެ މުއާމަލާތްތައް އެކަށީގެންވާ ގޮތެއްގައި ނުހިނގާ ކަމަށް ބެލެވޭ ކަމަށް ޝައުނާ ވަނީ ވިދާޅުވެފަ އެވެ. މާލޭގެ ކަރަންޓުގެ ހާލަތު އޮތީ ގައުމީ ސަލާމަތަށް ނުރައްކާވާ ހިސާބުގައި ކަމަށް އޭނާ ވަނީ ސިފަކުރައްވާފައެވެ.

"މާލޭގެ ކަރަންޓުގެ މައްސަލަ އަކީ ކޮންމެ ސަރުކާރަކުން ވެސް ވަރަށް އިސްކަން ދީގެން ބަލާނެ ކަމެއް. ޚާއްސަކޮށް ރައީސް އޮފީހުން އެކަމާއި މެދު ކޯޑިނޭޓް ކުރާނެ. ފިނޭންސް މިނިސްޓްރީން އެކަމާއި މެދު ކޯޑިނޭޓް ކުރާނެ. މިހާލަތަށް ސްޓެލްކޯގެ ކަންކަން ދިއުމަކީ ގައުމީ ސަލާމަތަށް ވެސް ނުރައްކާވާނެ ކަމެއް. އިރު އިރުކޮޅާ ކަރަންޓް ކެނޑުމަކީ ދައުލަތުގެ ގައުމުގެ ހާލަތު ވަރަށް ދަށަށް ދިއައީމަ ވާކަމެއް." އޭނާ ވިދާޅުވިއެވެ.

ތިލަފުށީގައި އިންޖީނުގެ އަޅަން ނިންމީ މި ސަރުކާރުން ކަމަށް ސްޓެލްކޯގެ މެނޭޖިން ޑިރެކްޓަރ ހުސައިން ފަހުމީ ވިދާޅުވި ނަމަވެސް އެއީ އިތުރުފުޅެއްކަން ވަނީ ހާމަވެފައެވެ. ބައެއް މީޑިއާތަކަށް އާދިއްތަ ދުވަހު ދެއްވި ބަސްތީގަތުމެއްގައި ފަހުމީ ވަނީ ތިލަފުށީގައި އިންޖީނުގެ އަޅަން ނިންމީ މި ސަރުކާރުން ކަމަށް ސިފަކުރައްވާ ވާހަކަދައްކަވާފަ އެވެ. ނަމަވެސް ކުރީ ސަރުކާރުން ވަނީ ތިލަފުށީގައި އިންޖީނުގެ އެޅުމަށް ނިންމާފައެވެ.