ބޮޑެތި ޖޫރިމަނާތަކެއް ހިމެނޭގޮތަށް އެކުލަވާލާފައިވާ އިންޝުއަރެންސް ބިލް ފާސްކޮށްފި
18 އޯގަސްޓު 2025 | ހޯމަ 08:47ރައްޔިތުންގެ މަޖިލީހުން 67 މެންބަރުންގެ ވޯޓުން އިންޝުއަރެންސް ބިލު ފާސްކޮށްފައިވޭ
އެމްއެމްއޭ މައި އޮފީސް ބޭރުން ނަގާފައިވާ ފޮޓޯ އެއް
ބޮޑެތި ޖޫރިމަނާތަކެއް ހިމެނޭގޮތަށް އެކުލަވާލާފައިވާ އިންޝުއަރެންސް ބިލް ރައްޔިތުންގެ މަޖިލީހުން ފާސްކޮށްފިއެވެ.
ހޯމަ ދުވަހު އެ ބިލު ފާސްކޮށްފައި ވަނީ 67 މެމްބަރުންގެ ވޯޓާއި އެކުގައެވެ.
އެ ބިލުގައި ބުނާގޮތުން ލައިސަންސް ނެތި އިންޝުއަރެންސް ވިޔަފާރިކުރާނަމަ 5 މިލިޔަން ރުފިޔާއާ ހަމައަށް ޖޫރިމަނާކުރާ ކުރެވިދާނެއެވެ.
މި ބިލް ތަސްދީގުކުރުމުން އިންޝުއަރެންސް ޚިދުމަތްދޭ ތަންތަނުގެ އުސޫލްތައް އެކުލަވާލާ އެ އުސޫލުތަކާ އެއްގޮތަށް ވިޔަފާރިތައް ހިންގާތޯ ބަލާނެއެވެ. އި އިންޝުއަރެންސް ޤާނޫނު ހިންގައި ތަންފީޒު ކުރާނީ މޯލްޑިވްސް މަނިޓަރީ އޮތޯރިޓީ، އެމްއެމްއޭއިން ކަމަށް ވާއިރު އިންޝުއަރެންސް ވިޔަފާރިތައް އަދި އިންޓަރ މީޑިއަރީތައް ރެގިއުލޭޓްކޮށް އެއޮތޯރިޓީން ސުޕަވައިޒް ކުރުމަކީ އެ އިދާރާގެ ޒިންމާއެކެވެ.
މި ބިލަށް އަމަލުކުރަން ފެށުމުން ލައިސަންސް ނެތި އިންޝުއަރެންސްގެ ވިޔަފާރި ކުރާ ފަރާތްތައް 100،000 ރުފިޔާ އާއި 5 މިލިއަން ރުފިޔާއާ ދެމެދުގެ އަދަދަކުން ޖޫރިމަނާ ކުރުމުގެ ފުރުސަތު ލިބޭނެއެވެ. އަދި ތެދުނޫން މައުލޫމާތެއް ދީގެން ޙައްގުނޫން މަންފާއެއް ހޯދުން ފަދަ އަމަލެއް ކޮށްފި ނަމަ، އެކަމުގެ ކުޑަބޮޑުމިނަށް ބަލައި 100،000 ރުފިޔާ އާއި 5 މިލިއަން ރުފިޔާއާ ދެމެދުގެ އަދަދަކުން ޖޫރިމަނާކުރެވޭނެއެވެ.
އެ ބިލް ހުށަހެޅުމުގެ މަގްސަދަކީ އިންޝުއަރެންސްގެ ދާއިރާގެ ފެންވަރު ހިފެހެއްޓުން ކަމަށް އެ ބިލް ހުށަހެޅުއްވި، މަހިބަދޫ ދާއިރާގެ މެންބަރު ޠާރިޤް އިބްރާހިމް ވަނީ ފާހަގަކުރައްވާފައެވެ. މީގެ އިތުރުން، އާއްމުންގެ ބޭނުންތަކާ އެއްގޮތަށް އިންޝުއަރެންސްގެ ޚިދުމަތްތައް ފޯރުކޮށްދިނުމަކީ ވެސް ބިލުގެ މަގްސަދެއް ކަމަށް ވަނީ ބުނެފައެވެ. ހަމައެހެންމެ ރާއްޖޭގެ އިޤްތިޞާދީ ކުރިއެރުމަށް މަގުފަހިކޮށްދޭ ދާއިރާ އަކަށް އިންޝުއަރެންސްގެ ދާއިރާ ހެދުމަކީ ވެސް ބިލުގެ މަގްސަދެއް ކަމަށް ބިލުގައި ވަނީ ބުނެފައެވެ.
