ދެން އުފެދޭނީ އެމްޑީޕީ ގެ ސަރުކާރެއް، ކައުންސިލް ތަކަށް އިހު އޮތް ބާރުވެރިކަން އެމްޑީޕީ އިން ދޭނެ: ރައީސް ސާލިހް
ދެން އަންނާނީ އެމްޑީޕީ ގެ ސަރުކާރެއް ކަމަށާއި، ކައުންސިލް ތަކަށް އިހު އޮތް ބާރުވެރިކަން އެމްޑީޕީ އިން ދޭނެ
މަގޫދޫގައި އޮތް ޖަލްސާގައި ކުރީގެ ރައީސް އިބްރާހީމް މުޙައްމަދު ޞާލިޙު ވާހަކަފުޅު ދައްކަވަނީ
ދެން އުފެދޭނީ އެމްޑީޕީ ގެ ސަރުކާރެއް ކަމަށާއި، ކައުންސިލް ތަކަށް އިހު އޮތް ބާރުވެރިކަން އެމްޑީޕީ އިން ދޭނެ ކަމަށް ކުރީގެ ރައީސް އިބްރާހިމް މުހައްމަދު ސާލިހް ވިދާޅުވެއްޖެ އެވެ.
ރައީސް ޞާލިޙު މިހެން ވިދާޅުވީ ފ.މަގޫދޫ އަށް ވަޑައިގެން އެ ރަށު ކައުންސިލް އިން ތަރައްޤީ ކޮށްފައިވާ ބައެއް ބިނާތައް ހުޅުވުމަށް ބޭއްވި ޖަލްސާގައި ވާހަކަ ދައްކަވަމުންނެވެ.
ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ ސަރުކާރުން މަސައްކަތް ކުރަމުން ދަނީ އެންމެ އަމާޒެއްގައި ކަމަށާއި، ސަރުކާރުން ބޭނުން ވަނީ ރައްޔިތުން އަޅުވެތި ކުރުމަށް ކަމަށް ވެސް ރައީސް ސާލިހް ވިދާޅުވިއެވެ.
އެ ޖަލްސާގައި ވާހަކަ ދައްކަވަމުން ރައީސް ޞާލިޙު ވިދާޅުވީ، ރަށް ރަށުގައި ފެނާއި ނަރުދަމާ ޤާއިމު ކުރުމަކީ އެންމެ އަސާސީ ޚިދުމަތް ކަމަށެވެ. އެ މަސައްކަތް އެމަނިކުފާނުގެ ސަރުކާރުން ވަރަށް ބޮޑު އަހަންމިއްޔަތު ކަމެއް ދީގެން ކޮށްފައިވާ ވާނެ ކަމަށް ވިދާޅުވި އެވެ.
އެހެން ނަމަވެސް، މިއަދުގެ ސަރުކާރުން ރަށް ރަށުގައި ކުރަން ހުރި މަސައްކަތްތައް ހުއްޓާލާފައިވާ ކަމަށާއި، ތަރައްޤީގެ މަޝްރޫއުތައް ކުރިއަށް ނުގެންދާ ކަމަށް ރައީސް ޞާލިޙު ވަނީ ވިދާޅުވެފަ އެވެ. އެކަން ފާހަގަ ކުރައްވައި އެމަނިކުފާނު ވިދާޅުވީ، 2028 ވަނަ އަހަރު އޮންނަ ރިޔާސީ އިންތިޚާބު ކާމިޔާބު ކުރަން މިހާރު އޮތް ސަރުކާރުން ކުރާ ކަމަކީ ރައްޔިތުން އަޅުވެތި ކުރުމަށް މަސައްކަތް ކުރުން ކަމަށެވެ.
ރައްޔިތުން ޙާލުގައި ޖެއްސުމަށް ފަހު ސަރުކާރުން ބޭނުން ވަނީ މަދު ފައިސާ ކޮޅެއް ދީގެން ރައްޔިތުން އަޅުވެތި ކުރުމަށް ކަމަށް އެމަނިކުފާނު ވިދާޅުވި އެވެ. އަދި ކުރިއަށް އޮތް ލޯކަލް ކައުންސިލް އިންތިޚާބުގައި އެކަން ފެނިގެން ދާނެ ކަމުގައި އެމަނިކުފާނު ފާހަގަ ކުރެއްވި އެވެ.
މި ސަރުކާރުން މަސައްކަތް ކުރަމުން ދަނީ އެންމެ އަމާޒެއްގައި. އެއީ ކުރިއަށް އޮތް ދެހާސް އަށާވީހުގެ ރިޔާސީ އިންތިޚާބުގައި ވޯޓު ހޯދުން. އެކަން ކުރުމަށްޓަކައި އެންމެ ފުރަތަމަ ކުރާނެ ކަމަކީ ރައްޔިތުން އަޅުވެތި ކުރުމަށް. އެކަން ކުރުމަށް ރައްޔިތުންނަށް މަދު ފައިސާ ކޮޅެއް ދީގެން އަޅުވެތި ކުރުމަށް ސަރުކާރުން ބޭނުންވާނެ. އެކަން ފެނިގެން ދާނީ ކުރިއަށް އޮތް ލޯކަލް ކައުންސިލް އިންތިޚާބުގައި.ކުރީގެ ރައީސް އިބްރާހީމް މުޙައްމަދު ޞާލިޙު
އިތުރަށް އެ ޖަލްސާގައި ވާހަކަ ދައްކަވަމުން ރައީސް ޞާލިޙު ވިދާޅުވެފައި ވަނީ ކުރިއަށް އޮތް ތަނުގައި އުފެނިގެން ދާނީ އެމްޑީޕީގެ ސަރުކާރެއް ކަމަށާއި، އެ ސަރުކާރުން މަގޫދޫ އެއާޕޯޓުގެ މަސައްކަތް، އެ ރަށު ރައްޔިތުން ބޭނުންވާ ގޮތަށް ނިންމައި ދޭނެ ކަމަށެވެ.
ހަމަ އެހެންމެ މަގޫދޫ އެއާޕޯޓުގެ މަސައްކަތް ކުރުމަށް ބޭނުންވާ ފައިސާ އެމަނިކުފާނުގެ ސަރުކާރުގައި ހަމަޖައްސާފައި ވާނެ ކަަމަށާއި، މި ސަރުކާރުން އެ ފައިސާ އެހެން ކަމަކަށް ބޭނުން ކޮށްފައިވާ ކަމަށް ރައީސް ޞާލިޙު ވަނީ ވިދާޅުވެފަ އެވެ.
އިތުރަށް އެ ޖަލްސާގައި ރައީސް ޞާލިޙު ވިދާޅުވީ އެމްޑީޕީ ނޫން ބަޔަކު ވެރިކަަމަށް އަންނަ ކޮންމެ ފަހަރަކު، ލާމަރުކަޒީ ޤާނޫނަށް ބަދަލު ގެންނަ ކަމަށެެވެ. އެއީ ކައުންސިލްތަކަށް ބާރުވެރިކަން ދޫކޮށްލަން ބޭނުން ނުވާތީ ކަމަށް ވެސް ރައީސް ޞާލިޙު އެވެ.
ރައީސް މުޢިއްޒުގެ ސަރުކާރުން ލާމަރުކަޒީ ޤާނޫނަށް ބަދަލުތައް ގެނައި ނަަމަވެސް، ދެން އުފެދޭ އެމްޑީޕީގެ ސަރުކާރެއްގައި އަނެއްކާ ވެސް ކައުންސިލްތަކަަށް އިހު އޮތް ބާރުވެރިކަން ދޭނެ ކަމުގައި ރައީސް ޞާލިޙު ވަނީ ވިދާޅުވެފަ އެވެ. އަދި ލާމަރުކަޒީ ނިޒާމު ކުރިއަރުވައި، ރައްޔިތުންނާ ގާތުން މަސައްކަތް ކުރުމަށް އިސްކަން ދޭން ޖެހޭ ކަމަށް ރައީސް ޞާލިޙު ވަނީ ވިދާޅުވެފަ އެވެ.
ރައީސް ޞާލިޙުގެ ސަރުކާރުން މަގޫދޫ އެއާޕޯޓުގެ މަަސައްކަތް ފަށައި، އެ މަޝްރޫއުގެ ބޮޑު ބައެއް ނިންމާފައި އޮތް ނަަމަވެސް، ރައީސް މުޢިއްޒުގެ ސަރުކާރާ އެކު އެ މަޝްރޫއު މިހާރު ވަނީީ މަޑު ޖެހިފަ އެވެ.
