ކައްދޫގައި ނުރައްކާތެރި އެކްސިޑެންޓެއް ހިނގާ އުމުރުން ދުވަސްވީ މީހަކު މަރުވެއްޖެ
16 އޯގަސްޓު 2025 | ހޮނިހިރު 05:44އެކްސިޑެންޓް ހިނގީ ދުއްވާފައި އައި ސައިކަލެއް، ގަވާއިދުން މަގު ހުރަސްކުރި ބަޔެއްގެ ގައިގައި ޖެހިގެން
ކައްދޫ އެކްސިޑެންޓްގައި އަނިޔާވި މީހުންނަށް އެހީތެރިވަނީ
ހުކުރު ދުވަހުގެރޭ ލ. ކައްދޫގައި ހިނގި ނުރައްކާތެރި އެކްސިޑެންޓްގައި އަނިޔާވި އުމުރުން ދުވަސްވީ އަންހެނަކު މަރުވެއްޖެއެވެ.
މައުލޫމާތު ލިބިފައިވާގޮތުން މި އެކްސިޑެންޓްގައި މަރުވީ ލ. މާވަށު އުމުރުން 64 އަހަރުގެ މަރިޔަމް މޫސާ އެވެ.
ފުލުހުން ބުނީ ލ. ފޮނަދޫއިން ގަމަށް ދަތުރުކުރި ސައިކަލެއް ކައްދޫ އެއަޕޯޓަށް ދާން މަގު ހުރަސްކުރި ދެ މީހެއްގެ ގައިގައި ޖެހި އެކްސިޑެންޓެއް ހިނގައިގެން ހުކުރު ދުހަވުގެރޭ 19:18 ހާއިރު ރިޕޯޓުކުރި ކަމަށެވެ.
މި އެކްސިޑެންޓުގައި ކަފިހި ހުރަހުން މަގު ހުރަސްކުރި ދެ އަންހެނުންނަށާއި ސައިކަލުގައި ތިބި ދެ މީހަކަށް އަނިޔާވެގެން ހޮސްޕިޓަލަށް ގެންދިޔަ ކަމަށް ފުލުހުން ބުންޏެވެ.
އެކްސިޑެންޓްގައި ހަތަރު މީހަކަށް އަނިޔާވި ކަމަށް ފުލުހުން ބުނެފައި ވެއެވެ. އެއީ މަގު ހުރަސްކުރި ދެ އަންހެނުންނާއި ސައިކަލު ދުއްވަން އިން ފިރިހެން މީހާ އާއި އެ ސައިކަލު ފަހަތުގައި އިން އަންހެން މީހާ އަށެވެ.
ފުލުހުން ބުނީ މި އެކްސިޑެންޓުގައި އަނިޔާވި އުމުރުން 64 އަހަރުގެ އަންހެން މީހާ ގަން ރީޖަނަލް ހޮސްޕިޓަލުގައި ފަރުވާދެމުން ދަނިކޮށް ނިޔާ ވެފައިވާކަމަށެވެ. ނިޔާވި އަންހެން މީހާއަށް ލިބުނު އަނިޔާގެ ތަފްސީލު ފުލުހުން ހާމައެއް ނުކުރެއެވެ.
ފުލުހުން އަންނަނީ މިހާރު މި މައްސަލަ ތަހުގީހު ކުރަމުންނެވެ.
