މަގުތަކުގައި ތާރު އެޅުމަކީ ގުދުރަތީ ރީތިކަން ގެއްލޭނެ ކަމެއް، ކަމަދޫ މަގުތައް ހަދާނީ ރައްޔިތުން ބޭނުންވާ ގޮތައް: ރައިސް
11 އޯގަސްޓު 2025 | ހޯމަ 08:45ޓުއަރިޒަމް ފުޅާވަމުން އަންނަ ރަށްރަށުގައި ގުދުރަތީ ރީތިކަން ނުގެއްލޭނެ ގޮތަކަށް މަގުތައް ހެދުމަކީ މުހިންމު ކަމެއް
ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ބ. ކަމަދޫ ރައްޔިތުންނާ މުޙަތަބު ކުރައްވަނީ
ޓުއަރިޒަމް ފުޅާވަމުން އަންނަ ރަށްރަށުގައި ވީހާވެސް ބޮޑަކަށް ގުދުރަތީ ރީތިކަން ނުގެއްލޭނެ ގޮތަކަށް މަގުތައް ހެދުމަކީ މުހިންމު ކަމެއް ކަމަށާއި ބ. ކަމަދޫގެ މަގުތައް ހަދާނީ ރައްޔިތުން ބޭނުންވާ ގޮތައް ކަމަށް ރައިސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ.
މާޅޮސްމަޑުލު ދެކުނުބުރީގެ ރަށްތަކަށް ކުރައްވަމުން ގެންދަވާ ދަތުރުފުޅުގައި ބ. ކަމަދޫ އަށް ވަޑައިގެން އެރަށު ރައްޔިތުންނާ ބައްދަލުކުރައްވާ ރައިސް މުޢިއްޒު ވިދާޅުވީ، އެ ރަށެއްގެ ރައްޔިތުން ބޭނުންވަނީ މަގުތައް ރީތިކޮށް ބޭއްވުމަށްފަހު ބަރާބަރަށް ފެން ހިންދޭ ނިޒާމެއް ގާއިމުކުރުމަށް ކަމަށްވާނަމަ، އެ ކޮންސެޕްޓަށް މަގުތައް ހަދައިދޭނެ ކަމަށެވެ.
ރައްޔިތުން ބޭނުންވާ ގޮތައް ރަށަށް މިދެންނެވިހެން އޮގްތިސޯދީ ގޮތުން ބޭނުންވާ ކުރިއެރުމާއި އިތުރު ކުރިއެރުމެއް ލިބޭ ގޮތަށް މަގުހެދުމުގެ މަސައްކަތް ގެންދާނަން އެހެންވީމަ އެކަންވެސް އެވަނީ ކުރުމަށްޓަކައި ބަޖެޓުގެ ތެރެއިން ހަމަޖެހި ބަޔަކާ ހަވާލުކުރުމުގެ މަރުހަލާއަށް މިހާރު ގޮސްފަ، އެހެންވީމަ އެކަންވެސް އެގޮތައް ކުރިއަށް ގެންގޮސްދޭނަން.ރައިސުލްޖުމްހޫރިއްޔާ ޑރ. މުހައްމަދު މުޢިއްޒު
މުއިއްޒު ވިދާޅުވީ ތާރު އަޅައިގެން ނުވަތަ ގާ އަތުރައިގެން މުހިންމު ކަމެއް ކަމަށް ވެސް ނުދެކޭ ކަމަށާއި ތާއީދުކުރައްވަނީ ވެސް އެގޮތަށް އެކަން ނުކުރުމަށް ކަމަށެވެ.
އާބާދީ ކުދި، ގުދުރަތީ ގޮތުން ރީތި ރަށްރަށުގައި ސަރުކާރުން މަގުތަކުގައި ތާރު އެޅުމުގެ މަސައްކަތް ކުރިއަށް ގެންދާތި އެ ރަށްރަށުގެ ރައްޔިތުން އަންނަނީ ނުރުހުން ފާޅުކުރަމުންނެވެ.
