އައުޓާމިނަލްއާއެކު ވީ ފަސޭހައެއް ނެތް، ހަވާ އަރުވާލާ ރެކޯޑް ހެދުން ނޫންކަމެއް ނުވި

މި ސަރުކާރަށް މިހާތަނަށް ރިބަންކަނޑަން ލިބި އަމިއްލަ އަށް ކުރި މަސައްކަތެއްގެ ގޮތުގައި ދައްކަން ގަދަފައި ވިއްދާފައި އޮތީ ވެލާނާ އިންޓަރނޭޝަނަލް އެއަރޕޯޓުގެ އައު ޓާމިނަލްއެވެ. ނަމަވެސް އެއީ ރައްޔިތުންނަށް އަދި މާ ފައިދާއެއް ލިބުނު ތަނެއްވެސް ނޫނެވެ. އައު ޓާރމިނަލް އަކީވެސް މި ސަރުކާރުގެ ސިޔާސީ މަގުސަދު ހާސިލްކުރާތަނަކަށްވެ ކަންވެ ނިމިއްޖެއެވެ.

ވެލާނާ އިންޓަނޭޝަނަލް އެއަރޕޯޓުގެ އައު ޓާރމިނަލް ހުޅުވިތާ ދުވަސްކޮޅެއް ވީއިރުވެސް، އޭގެ ފައިދާ ރައްޔިތުންނަށް ނުލިބެއެވެ. އެއިން ފައިދާ އެއް ރާއްޖޭގެ ފަތުރުވެރިކަމަށް ވެސް ނުކުރެއެވެ. މިހާރު އައު ޓާރމިނަލް ބޭނުންކުރަމުން ގެންދަނީ ހަމައެކަނި މޯލްޑިވިއަން އެއަރލައިންސްގެ ދަތުރުތަކުގައި ދަތުރުކުރާ ފަސިންޖަރުން އެކަނި ކަމަށްވާއިރު، ރާއްޖެއިން ބޭރުން އަންނަ ފަސިންޖަރުންނަށް އަދިވެސް އައު ޓާރމިނަލް ބޭނުންކުރެވެއެވެ.

އައު ޓާރމިނަލް ހުޅުވިއިރު، އޭގެ މަސައްކަތްތައް ފުރިހަމައަށް ނިމިފައި ނުވެއެވެ. ރައީސް ވިދާޅުވީ މި ހުޅުވަނީ އަދި ބައިކުޅަބައިކަމަށެވެ. ޓާރމިނަލްގެ ބައިކުޅަބައި އެކަނި ހުޅުވާލުމުން، އެއަރޕޯޓުގެ އައުޓާރމިނަލް އާއެކު ދައުލަތަށް ވަންނާނެކަމަށް ބެލެވުނު ފައިސާއެއް ނުވަދެއެވެ. ފަތުރުވެރިންނަށް ފަސޭހަވާނެ އެއްގޮތެއްވެސް ނުވިއެވެ. އެއަރޕޯޓުގެ އައު ޓާރމިނަލް ހުޅުވުމުގެ ރަސްމިއްޔާތުގައި، ސަރުކާރުން އެންމެ ބޮޑު އިސްކަމެއް ދީފައިވަނީ ޑްރޯން ޝޯވްއެއް ބާއްވައި، ގިނިސް ވާރލްޑް ރެކޯޑް ފޮތަށް އެރުމަށެވެ.

މި ޓާރމިނަލްގެ މަސައްކަތް ފުރިހަމަ ނުވެ، އަދި އޭގެ ފުރިހަމަ ބޭނުން ނުހިފި ވަނިކޮށް ހުޅުވާލުމަކީ އޭގެ އަސްލު މަޤްސަދު ގެއްލިގެން ދިޔަކަމެއްގެ ގޮތުގައި ގިނަ ފަރާތްތަކުން ދެކެއެވެ. އަދި މިކަމުގެ ސަބަބުން އިތުރު ތޮއްޖެހުން ތަކާއި ދަތިތަކާ ކުރިމަތި ލާންޖެހިފައެވެ.

އަދިވެސް ބޭރުން އަންނަ ފަސިންޖަރުން ބޭނުންކުރަނީ ބައު ޓާރމިނަލްއެވެ. އިހައްދުވަހަކު އިންޑިއާއިން ރާއްޖެ އައި ދިވެއްސެކެވެ. އޭނާ އެއަރޕޯޓުން ފޮށިތައްމަތި ހިފައިގެން ނުކުމެ ހުރެ މާނޭވާލަ ދާހިއްލާ ފޯވެފައި ހުރެ ބުންޏެވެ. މަވެސް ހީކުރީ 26 ގައި އެއަރޕޯޓުގެ އައު ޓާރމިނަލް ހުޅުވީމާ ނިކަން ފަސޭހަވާނޭއެވެ. ނަމަވެސް ވީއެހެނަކުން ނޫނެވެ. ބަލި މީހާ ގޮވައިގެން ފައިބަންޖެހުނީ ސިޑިންނެވެ. ދެން އެރީ ބަހަކަށެވެ. ހީކުރީ އައު ޓާރމިނަލްގެ އެއުރޯ ބްރިޖު އަދި ބޭނުން ނުކުރާތީ ބަހުގައިދާނީ އައު ޓާރމިނަލްއަށް ކަމަށެވެ.

ނަމަވެސް ކަމަކުދާކަށްނެތެވެ. އައު ޓާރމިނަލް ހުޅުވާ ރެކޯޑް ފޮތަށް އެވާހަކަ އެރުވިނަމަވެސް އެ ފުލައިޓުން އައި 200 އެއްހާ މީހުންނާއި އެގަޑީގައި ޖެއްސި އެއަރބަސް ބޯޓުތަކުން ފޭބި ފަސިންޖަރުންނާއެކު ގޮސް ކޮއްޕާ ވައްދާލީ އެއްކަލަ ބައު ޓާރމިނަލްގެ އެރައިވަލް ހޯލަށެވެ. ކަމަކުދާކަށް ނެތެވެ. ކިއު ދަމާލާފައި އޮތީ އެހެނަކުންނޫނެވެ. ޑޮލަރު ހިފައިގެން ރާއްޖެ އައި ފަތުރުވެރި މީހާ ކިއުގައި އިމިގްރޭޝަން ކްލިއަރެންސް ހޯދަން ހުންނަތާ 30 މިނުޓަށްވުރެ ގިނަ އިރުވެއްޖެއެވެ.

ތަނުގެ އޭސީއެއް ނެތެވެ. ތަން އޮތީ ތޮއްޖެހިފައެވެ. ފިތި ބާރުވެފައެވެ. އެކި މީސް މީހުންގެ ގައިން ދުވާވަހުން މުޅިތަނުގެ މާހައުލު އޮތް ގޮތް ކިޔައިދޭންވެސް ނޭނގުނެވެ. ފޮށިތައްމަތި ނަގަން ބެލްޓާ ހަމައަށް ދެވުނު އިރު މީހާ ހުރީ ތެމި ފޯވެފައެވެ. މަތި ބަލާލި އިރު ބޮކިތައް ހުރީ ދިއްލާފައެވެ. އޭސީއެއް ޖައްސާފައި ނެތެވެ. އެއްފަހަރާ 300 އެއްހާ މީހުން އެތަނުގައި ތިބި އިރު އެތަން ހީވަނީ ކުޑަ ގުދަނެއްހެނެވެ.

އެތަނުން މުވައްޒަފެއް ކައިރި އަހާލީމަ ދިން ޖަވާބުން އަދި ހިތަށް މާ އަސަރުކުރިއެވެ. އޭސީ ޖައްސާލާ ކަންކަން ކުރީމަ ލޯޑު ބޮޑުވެގެން ކަރަންޓް ދާ ވާހަކައެވެ. އެތަނުގެ މަރާމާތެއް ނުކުރާ ވާހަކައެވެ. އަޅާވެސް ނުލާ ވާހަކައެވެ. އައު ޓާރމިނަލްއަށް ނުދެވޭހެއްޔޭ ސުވާލުކޮށްލީމަ މަލާމާތުގެ ރާގަކުން އެ މުވައްޒަފު ބުނީ އެއީ ލޮލުގެ އަޅުވާލި އަދުނެކެވެ. އެއީ ހަމައް ދައްކާލި ކުލަވަރެކެވެ. މި ނޫން ގޮތެއް ނެތެ ކަމަށެވެ.

މި ސަރުކާރުން ކްރެޑިޓް ހޯދަން އެހާ މަސައްކަތް ކުރި ޓާރމިނަލް އަދިވެސް ހުރީ ހުރި ގޮތަށެވެ. އެއިން ރާއްޖެއިން ބޭރުން އައި މީހަކަށްވި ފައިދާއެއް ނެތެވެ. އައު ޓާރމިނަލް ވެސް ވެގެން ދިޔައީ މި ސަރުކާރުން މެޑަލް ޖަހާލާ މޮޅު ހެޑްލައިން ހަދާލަން ލިބުނު ފުރުސަތަކަށެވެ.